មនុស្សជាង ១ ម៉ឺននាក់ បានចូលរួមបាតុកម្មប្រឆាំងអាមេរិកនៅរដ្ឋធានី Addis Ababa ក្នុងប្រទេសអេត្យូពី ដើម្បីបរិហារពីគោលនយោបាយរបស់លោកប្រធានាធិបតីអាមេរិក លោក Joe Biden ស្តីពីជម្លោះនៅតំបន់ភាគខាងជើងប្រទេសតំបន់ Tigray។
នៅក្នុងអំឡុងពេលបាតុកម្មនោះ ប្រជាជនបានកាន់បដារិះគន់សហរដ្ឋអាមេរិក ខណៈអ្នកផ្សេងទៀត បែរសាទរដល់ប្រធានាធិបតីរុស្ស៊ី លោក Vladimir Putin និងមេដឹកនាំចិន លោក Xi Jinping វិញ។
គួរបញ្ជាក់ផងដែរថា ជម្លោះនៅតំបន់ Tigray បានចាប់ផ្តើមកាលពីខែវិច្ឆិកា ឆ្នាំមុន នៅពេលដែលនាយករដ្ឋមន្រ្តី Abiy Ahmed បានបញ្ជាឱ្យធ្វើការវាយប្រហារទៅលើកងកម្លាំង អតីតគណបក្សកាន់អំណាចក្នុងតំបន់គឺរណសិរ្សរំដោះប្រជាជនរបស់ Tigray (TPLF) និងក្រោយមកពួកគេបានកាន់កាប់មូលដ្ឋានកងទ័ពសហព័ន្ធនៅតំបន់នោះ។
ប្រជាជនរាប់ពាន់នាក់ ដែលភាគច្រើនជាជនស៊ីវិលត្រូវបានសម្លាប់ និងយ៉ាងហោចណាស់ ២ លាននាក់ផ្សេងទៀត ត្រូវបានផ្លាស់លំនៅ។ ក្រុមសិទ្ធិមនុស្សបានចោទប្រកាន់ភាគីទាំង ២ ថា បានប្រព្រឹត្តិបទឧក្រិដ្ឋប្រឆាំងនឹងជនស៊ីវិល រួមទាំងការសម្លាប់រង្គាល និងការរំលោភសេពសន្ថវៈផងដែរ។
កាលពីសប្តាហ៍មុនលោក Biden បានអំពាវនាវឱ្យមានការបញ្ឈប់ការរំលោភសិទ្ធិមនុស្សទ្រង់ទ្រាយធំ ដែលរួមមាន « អំពើហិង្សាផ្លូវភេទ» ដែលកើតមាននៅទីប្រជុំជន Tigray និងគ្រោះទុរភិក្សផងដែរ។ បន្ថែមពីនេះ រដ្ឋបាលលោក Biden ក៏កំពុងជំរុញឱ្យមានការដកកងទ័ព Eritrean ដែលនៅសេសសល់ក្នុងតំបន់ Tigray បើទោះបីជាអាជ្ញាធរអេត្យូពីបាននិយាយកាលពីប៉ុន្មានសប្តាហ៍មុនថា ពួកគេនឹងចាកចេញពីប្រទេសនេះដោយខ្លួនឯងក៏ដោយ។
យ៉ាងណាមិញក្រសួងការបរទេសអាមេរិកបាននិយាយថា គោលនយោបាយរបស់លោក Biden អាចនឹងធ្វើឱ្យអន្តរាយដល់ទំនាក់ទំនងរវាងសហរដ្ឋអាមេរិកនិងប្រទេសអេត្យូពី៕