ក្រុងយ៉ាំងហ្គោន: កាលពីថ្ងៃពុធ អង្គការ Amnesty International បានឲ្យដឹងនៅក្នុងរបាយការណ៍មួយ ដែលផ្តោតអារម្មណ៍ជាថ្មីទៀតទៅលើការបង្កជម្លោះយ៉ាងស្មុគស្មាញលើក្រុមជនជាតិភាគតិចនៅក្នុងរដ្ឋនេះថា ក្រុមឧទ្ទាមរ៉ូហ៊ីងយ៉ា បានបង្កការសម្លាប់រង្គាលលើក្រុមអ្នកភូមិជនជាតិហិណ្ឌូអំឡុងការបះបោរកាលពីឆ្នាំទៅឯរដ្ឋរ៉ាក់ឃីននៅក្នុងទឹកដីមីយ៉ាន់ម៉ា។
របាយការណ៍ដដែល បានឲ្យដឹងថា ការសម្លាប់នេះ បានកើតឡើងកាលពីថ្ងៃទី ២៥ ខែសីហា ឆ្នាំ ២០១៧ នៅថ្ងៃតែមួយដែលក្រុមឧទ្ទាមរ៉ូហ៊ីងយ៉ាបានធ្វើការវាយប្រហារយ៉ាងសាហាវទៅលើប៉ុស្តិ៍ឈរជើងរបស់ក្រុមអាជ្ញាធរប៉ូលិសដែលបានបង្កឲ្យរដ្ឋនេះធ្លាក់ក្នុងវិបត្តិមួយ។
យោធាមីយ៉ាន់ម៉ា បានធ្វើការឆ្លើយតបចំពោះការវាយប្រហារពីក្រុមឧទ្ទាមជាមួយនឹងការផ្ចាញ់តបយ៉ាងសាហាវដែលបានបង្ខំឲ្យជនមូស្លីមរ៉ូហ៊ីងយ៉ាប្រមាណ ៧០ ម៉ឺននាក់រត់ភៀសខ្លួនចេញពីប្រទេសដែលពលរដ្ឋភាគច្រើនកាន់ព្រះពុទ្ធសាសនាជាទីដែលពួកគេបានប្រឈមជាមួយការធ្វើទុក្ខបុកម្នេញអស់រយៈពេលជាច្រើនឆ្នាំមក។
អង្គការសហប្រជាជាតិ បានឲ្យដឹងថា ការបង្ក្រាបពីសំណាក់យោធា បាននាំទៅរកការបោសសម្អាតពូជសាសន៍ភាគតិចរ៉ូហ៊ីងយ៉ា ដោយក្រុមទាហាន និងក្រុមប្រជាការពាររងការចោទប្រកាន់ពីបទសម្លាប់ក្រុមជនស៊ីវិលនិងដុតបំផ្លាញផ្ទះសំបែងរបស់ពួកគេ ប៉ុន្តែ ក្រុមឧទ្ទាមរ៉ូហ៊ីងយ៉ា ក៏ត្រូវបានចោទប្រកាន់ដែរ៕