.jpg)
បុរសស៊ីរីលក់នំបុ័ងនៅលើផ្លូវក្នុងផ្សារមួយនៅក្នុងក្រុងរ៉ាហ្គាភាគខាងជើងកាលពីថ្ងៃទី ១០ ខែតុលា។ AFP
ក្រុងបេរូតៈ អង្គការលើកលែងទោសអន្តរជាតិ (Amnesty International) កាលពីថ្ងៃចន្ទ បានថ្កោលទោសក្រុមចម្រុះ ដឹកនាំដោយអាមេរិកដែលខកខានមិនបានទទួលស្គាល់ និងស៊ើបអង្កេតតួនាទីរបស់ខ្លួន ក្នុងការសម្លាប់ជន ស៊ីវិលយ៉ាងច្រើននៅក្នុងអំឡុងការប្រយុទ្ធគ្នា ១ ឆ្នាំកន្លងទៅដើម្បីបណ្តេញក្រុមជីហាដចេញពីក្រុងរ៉ាហ្គានៃប្រទេសស៊ីរី។
នៅក្នុងខែតុលា ឆ្នាំ ២០១៧ ដែលត្រូវបានគាំទ្រដោយការវាយប្រហារផ្លូវអាកាសរបស់ក្រុមចម្រុះដឹកនាំដោយអាមេរិកនោះ ក្រុមសម្ព័ន្ធមិត្តឃើដ អារ៉ាប់ បានរុញច្រានរដ្ឋអ៊ិស្លាមចេញពីក្រុងភាគខាងជើង។
អង្គការ Amnesty និយាយថា នៅក្នុងអំឡុងយុទ្ធនាការបណ្តេញក្រុមជីហាដនិយមចេញពីក្រុងនេះជនស៊ីវិលរាប់រយនាក់បានស្លាប់នៅក្នុងការប្រយុទ្ធគ្នានោះ ភាគច្រើនក្នុងចំណោមពួកគេស្លាប់ដោយសារការវាយប្រហាររបស់ក្រុមចម្រុះដឹកនាំដោយអាមេរិក។
នៅក្នុងសេចក្តីថ្លែងការណ៍មួយក្រុមសិទ្ធិមនុស្សមានមូលដ្ឋាននៅក្រុងឡុងដ៍ បានឲ្យដឹងថា ការខកខានមិនបានទទួលស្គាល់ជាបន្តបន្ទាប់របស់ក្រុមចម្រុះដឹកនាំដោយអាមេរិក គឺជាការមើលងាយមើលថោកដល់ក្រុមអ្នកនៅរស់។
រយៈពេល ១ ឆ្នាំមកនេះអង្គការ Amnesty និយាយថាក្រុមចម្រុះនេះសារភាពថា បានបណ្តាលឲ្យជនស៊ីវិលត្រឹមតែ ១០០ នាក់ស្លាប់ក្នុងការវាយប្រហារនៅក្រុងរ៉ាហ្គា។
អគ្គលេខាថ្មីនៃអង្គការ Amnesty លោក Kumi Naidoo បានថ្លែងថា៖ «វាជាកំហុសមួយដែលក្រុមចម្រុះ បានបដិសេធមិនទទួលស្គាល់តួនាទីរបស់ខ្លួនដែលបានបណ្តាលឲ្យជនស៊ីវិលស្លាប់យ៉ាងច្រើននោះ»។
លោក បានថ្លែងថា វាគឺជា រឿងមួយគួរស្អប់ខ្ពើមចំពោះការមិនទទួលខុសត្រូវ និងមិនទទួលយកកាតព្វកិច្ចចំពោះជនរងគ្រោះទាំងនោះ។
អគារមន្ទីរពេទ្យដែលរងការបំផ្លិចបំផ្លាញដោយការវាយប្រហាររបស់ក្រុមចម្រុះដឹកនាំដោយ US នៅក្រុងរ៉ាហ្គា។ AFP
អគ្គលេខាធិការថ្មីនៃអង្គការ Amnesty លោក Kumi Naidoo បានបន្តថា៖ «វាគឺជារឿងមួយ ដែលសមទទួលការរិះគន់ដែលថា ក្រុមចម្រុះបដិសេធមិនទទួលស្គាល់តួនាទីរបស់ខ្លួន ដែលបានបណ្តាលឲ្យជនស៊ីវិលស្លាប់ច្រើន។
ទាក់ទងនឹងការសម្លាប់ជនស៊ីវិលទាំងនោះ ក្រុមសិទ្ធិមនុស្សនេះ បានជំរុញឲ្យក្រុមចម្រុះធ្វើការស៊ើបអង្កេត ដើម្បីស្វែងរកការពិតនៅពីក្រោយការវាយប្រហារដែលបណ្តាលឲ្យមនុស្សស្លាប់យ៉ាងច្រើន និងដើម្បីចៀសវាងកំហុសឆ្គងនៅពេលអនាគត។
លោក បានថ្លែងថា៖ «ទាំងនេះ គឺជាសេចក្តីលម្អិតដ៏សំខាន់ ដើម្បីស្វែងរកការពិត និងវាយតម្លៃភាពត្រឹមត្រូវតាមច្បាប់ និងរៀនមេរៀនចាំបាច់ដើម្បីចៀសវាងកំហុសប្រហាក់ប្រហែលគ្នានេះ»។
លោកក៏បានថ្លែងថា នៅទីបញ្ចប់ គឺចាំបាច់ត្រូវកាត់បន្ថយការធ្វើឲ្យប៉ះពាល់ដល់ក្រុម ជនស៊ីវិល ដែលជាកាតព្វកិច្ចស្របច្បាប់មួយ៕
យុទ្ធជនក្រុមឧទ្ទាមស៊ីរីមកពីរណសិរ្សរំដោះជាតិ (NLF) ពិនិត្យមើលទីតំាងឈរជើងមួយនៅខ្សែត្រៀមជួរមុខ។ AFP
