កាលពីថ្ងៃចន្ទ ទី ២២ មីនា ក្រុមហ៊ុនឱសថ AstraZeneca បានប្រកាសថា ទិន្នន័យការសាកល្បងវ៉ាក់សាំងកូវីដ ១៩ ពួកគេនៅអាមេរិកបានបង្ហាញថាវ៉ាក់សាំងនេះមានប្រសិទ្ធភាព ៧៩%។
AstraZeneca បាននិយាយថាអ្នកជំនាញរបស់ខ្លួនក៏មិនបានរកឃើញករណីបញ្ហាសុវត្ថិភាពទាក់ទងនឹងវ៉ាក់សាំងនេះក្នុងចំណោមជនស្ម័គ្រចិត្តជាង ២ ម៉ឺននាក់ ដែលបានចាក់ថ្នាំ AstraZeneca យ៉ាងហោចណាស់មួយដូស។ បើទោះបីជាវ៉ាក់សាំងរបស់ក្រុមហ៊ុន AstraZeneca ត្រូវបានអនុញ្ញាតឱ្យប្រើប្រាស់នៅក្នុងប្រទេសជាង ៥០ ក៏ដោយ វ៉ាក់សាំងនេះមិនទាន់ត្រូវបានផ្ដល់ភ្លើងខៀវនៅសហរដ្ឋអាមេរិកនៅឡើយទេ។ ការសិក្សានៅសហរដ្ឋអាមេរិកមានអ្នកស្ម័គ្រចិត្តជាង ៣ ម៉ឺននាក់ ដែលក្នុងនោះ ២ ភាគ ៣ ត្រូវបានចាក់វ៉ាក់សាំងខណៈអ្នកស្ម័គ្រដទៃទៀតមិនបានទទួលវ៉ាក់សាំងទេ។
ការរកឃើញដំបូងពីការសិក្សានៅសហរដ្ឋអាមេរិក គឺគ្រាន់តែជាសំណុំព័ត៌មានមួយដែល AstraZeneca ត្រូវតែដាក់ជូនរដ្ឋបាលចំណីអាហារ និងឱសថ (FDA)។
គណៈកម្មាធិការប្រឹក្សារបស់ FDA នឹងធ្វើការតស៊ូមតិជាសាធារណៈអំពីប្រសិទ្ធភាព និងសុវត្ថិភាពវ៉ាក់សាំងនេះមុនពេលដែលទីភ្នាក់ងារសម្រេចថាតើត្រូវអនុញ្ញាតឱ្យប្រើវ៉ាក់សាំងនេះក្នុងគ្រាអាសន្នដែរ ឬទេ៕