កាលពីថ្ងៃអង្គារ ទី ២៦ មករា ប្រធានាធិបតីសហរដ្ឋអាមេរិកលោក Joe Biden បានសន្ទនាតាមទូរស័ព្ទដំបូងជាមួយប្រធានាធិបតីរុស្ស៊ីលោក Vladimir Putin ដោយពិភាក្សាគ្នាលើបញ្ហាជាច្រើនរវាងប្រទេសទាំង។
យោងតាមសេតវិមាន លោក Biden បានលើកឡើងពីការព្រួយបារម្ភមួយចំនួនដូចជា ការបំពុល និងការចាប់ខ្លួនមេដឹកនាំចលនាប្រឆាំង Alexe-Navalny ការចោទប្រកាន់ថា រុស្ស៊ីពាក់ព័ន្ធនឹងយុទ្ធនាការចារកម្មតាមអុីនធឺណិតដ៏ធំមួយ ជ្រៀតជ្រែកក្នុងការបោះឆ្នោតប្រធានាធិបតីអាមេរិក ការរាយការណ៍ថា រុស្ស៊ីបានលើកទឹកចិត្តឱ្យមានការសម្លាប់ទាហានអាមេរិកនៅអាហ្វហ្គានីស្ថាន។
បន្ថែមពីលើចំណុចទាំងនេះ សេតវិមានបាននិយាយថា លោក Biden មានជំហររឹងមាំចំពោះការគាំទ្ររបស់សហរដ្ឋអាមេរិកចំពោះអធិបតេយ្យភាពរបស់អ៊ុយក្រែន ខណៈរុស្ស៊ីគាំទ្រក្រុមបំបែកខ្លួននៅភាគខាងកើតរបស់ប្រទេសនេះ។
សេចក្ដីថ្លែងការណ៍មួយរបស់សេតវិមានបានសរសេរថា៖ «លោកប្រធានាធិបតី Biden បានបញ្ជាក់យ៉ាងច្បាស់ថា សហរដ្ឋអាមេរិកនឹងធ្វើសកម្មភាពការពារផលប្រយោជន៍ជាតិរបស់ខ្លួនជា ការឆ្លើយតបចំពោះសកម្មភាពរបស់ប្រទេសរុស្ស៊ីដែលប៉ះពាល់យើង ឬសម្ព័ន្ធមិត្តរបស់យើង»។
បើទោះជាយ៉ាងនេះក៏ដោយ ប្រធានាធិបតីទាំង ២ រូប បានយល់ព្រមធ្វើការបន្តសន្ធិសញ្ញា New Start ដែលជាសន្ធិសញ្ញាធ្វើនៅជំនាន់ប្រធានាធិបតី Barrack Obama សម្រាប់កំណត់បរិមាណក្បាលគ្រាប់មីស៊ីល និងឧបករណ៍បាញ់ក្នុងស្តុកអាវុធនុយក្លេអ៊ែរអាមេរិក និងរុស្ស៊ី។
មន្ត្រីដែលដឹងពីការសន្ទនាទូរស័ព្ទនេះបាននិយាយថា ទីក្រុងម៉ូស្គូកាលពីសប្តាហ៍មុនបានស្នើសុំការធ្វើការពិភាក្សានេះ។ លោក Biden បានយល់ព្រម ប៉ុន្តែលោកចង់រៀបចំជាមុនជាមួយបុគ្គលិករបស់លោក ហើយនិយាយជាមួយសម្ព័ន្ធមិត្តនៅអឺរ៉ុបដូចជា អង់គ្លេស បារាំង និងអាល្លឺម៉ង់ ជាមុនសិន។
មុនពេលដែលលោកបាននិយាយជាមួយលោក Putin លោក Biden ក៏បានជួបជាមួយអគ្គលេខាធិការអង្គការ NATO លោក Jens Stoltenberg ដើម្បីធានាលើការប្ដេជ្ញាចិត្តរបស់សហរដ្ឋអាមេរិកចំពោះសម្ពន្ធភាពនេះ។
វិមានក្រឹមឡាំងវិញ មិនបាននិយាយទាក់ទងចំណុចកកិតដែលសេតវិមានបាននិយាយថា លោក Biden បានលើកឡើងក្នុងពិភាក្សាជាមួយនឹងលោក Putin ទេ។ វិមានក្រឹមឡាំងបានផ្ដោតទៅលើគោលបំណងរបស់លោក Biden ក្នុងការបន្តសន្ធិសញ្ញា New Start ទៅវិញ។
ក្នុងចំណោមបញ្ហាដែលវិមានក្រឹមឡាំងបាននិយាយថា ត្រូវបានពិភាក្សារួមមានការរាលដាលជំងឺកូវីដ ១៩ កិច្ចព្រមព្រៀងនុយក្លេអ៊ែរអ៊ីរ៉ង់ និងបញ្ហាទាក់ទងនឹងពាណិជ្ជកម្មនិងសេដ្ឋកិច្ច។
សេចក្ដីថ្លែងការណ៍របស់វិមានក្រឹមឡាំងបានសរសេរថា លោក Putin បាន «កត់សម្គាល់ថា ការធ្វើឱ្យទំនាក់ទំនងរវាងប្រទេសរុស្ស៊ី និងសហរដ្ឋអាមេរិកប្រក្រតីឡើងវិញ នឹងបំពេញនូវផលប្រយោជន៍របស់ប្រទេសទាំង ២ និងសហគមន៍អន្តរជាតិទាំងមូល បើសិនរួមបញ្ជូលការទទួលខុសត្រូវពិសេសរបស់ពួកគេក្នុងការថែរក្សាសន្តិសុខ និងស្ថិរភាពនៅក្នុងពិភពលោក»។
សេចក្ដីថ្លែងការណ៍បានបន្តទៀតថា៖ «សរុបមក ការសន្ទនារវាងមេដឹកនាំរុស្ស៊ី និងសហរដ្ឋអាមេរិកគឺមានលក្ខណៈបែបធុរកិច្ច និងស្មោះត្រង់»។
បញ្ជីប្រធានបទដ៏វែងក្នុងការសន្ទនាលើកដំបូងរបស់លោក Biden ជាមួយលោក Putin បង្ហាញពីស្ថានភាពទំនាក់ទំនងពោរពេញដោយបញ្ហារវាងវ៉ាស៊ីនតោន និងមូ៉ស្គូ ដែលភាគច្រើនបន្សល់ពីរដ្ឋបាលមុន។ លោក Biden បានចោទប្រកាន់អតីតប្រធានាធិបតី Donald Trump ទន់ខ្សោយជាមួយរុស្ស៊ីដោយហៅលោក Trump ថាជា «កូនឆ្កែរបស់ Putin» ក្នុងការតស៊ូមតិបោះឆ្នោតប្រធានាធិបតី។
លោក Trump បានបដិសេធមិនប្រឈមមុខជាមួយក្រុងមូ៉ស្គូ និងមិនព្រមទទួលស្គាល់ថា រុស្ស៊ីបានធ្វើការវាយប្រហារស្ថាប័នរដ្ឋាភិបាលអាមេរិកតាមអ៊ីនធឺណិត។ បើទោះជាយ៉ាងនេះក៏ដោយក៏មន្ត្រីរដ្ឋបាល Trump បានកាន់ជំហររឹងមាំជាមួយរុស្ស៊ី ដែលរួមមាន ការដាក់ទណ្ឌកម្មផងដែរ។
កាលពីធ្វើយុទ្ធនាការបោះឆ្នោតលោក Biden បានសន្យាថា លោកនឹងប្រកាន់ជំហររឹងមាំជាមួយរុស្ស៊ី។
សារព័ត៌មាន AP បានរាយការណ៍ថា លោក Biden បានប្រាប់លោក Putin ថា សហរដ្ឋអាមេរិកនឹងការពារខ្លួនហើយចាត់វិធានការដែលអាចរួមបញ្ចូលទាំងការដាក់ទណ្ឌកម្មបន្ថែមទៀតដើម្បីធានាថា ទីក្រុងមូ៉ស្គូមិនធ្វើសកម្មភាពដោយនិទ្ទណ្ឌភាព។
តែដោយសារបញ្ហាក្នុងស្រុកធ្ងន់ធ្ងរ និងការសម្រេចចិត្តលើបញ្ហាជាមួយចិន និងអុីរ៉ង់ការប្រឈមមុខដោយផ្ទាល់ជាមួយនឹងរុស្ស៊ី គឺមិនមែនជាអ្វីដែលលោក Biden ចង់បាននៅពេលឥឡូវនេះទេ៕