លោក Donald Trump អតីតប្រធានាធិបតីអាមេរិកអាចប្រឈមនឹងការចោទប្រកាន់មួយចំនួន ក្រោយពីលោកអស់តំណែងជាប្រធានាធិបតីកាលពីថ្ងៃទី ២០ មករា កន្លងទៅនេះ។
តាមច្បាប់សហរដ្ឋអាមេរិកប្រធានាធិបតីមិនអាចត្រូវចោទប្រកាន់ពីបទល្មើសណាមួយឡើយ ដោយក្រសួងយុត្តិធម៌មានបទប្បញ្ញត្តិមួយដើម្បីរារាំងការអនុវត្តការចោទប្រកាន់ទៅប្រធានាធិបតីដែលកំពុងកាន់តំណែង។
ការស៊ើបអង្កេតព្រហ្មទណ្ឌនៅក្រុងញូវយ៉កទាក់ទងនឹងជំនួញអចលនទ្រព្យរបស់លោក Trump អាចជាបញ្ហាមួយដែលលោកអាចនឹងត្រូវប្រឈម។ លោកអាចប្រឈមនឹងការចោទប្រកាន់ទាក់ទងនឹងអាជីវកម្មរបស់គ្រួសារលោក និងសកម្មភាពរបស់លោកមុនពេលចូលកាន់តំណែង។
លោក Trump ធ្លាប់ត្រូវបានចោទប្រកាន់ទាក់ទងនឹងការមិនបង់ពន្ធដោយសារលោកមិនបញ្ចេញទិន្នន័យពន្ធអាជីវកម្មរបស់លោកដែលបានបង់។ ចាប់តាំងពីពេលនោះមកលោក Trump បានព្យាយាមរារាំងដីកាកោះហៅពីតុលាការដោយលើកហេតុផលនៅក្នុងតុលាការថា សកម្មភាពនេះ គឺរំខានដល់ការធ្វើនយោបាយ។
រដ្ឋអាជ្ញាប្រចាំសង្កាត់ Manhattan ក្នុងទីក្រុង New York លោក Cyrus Vance បានសង្កត់ធ្ងន់ទៅលើសារៈសំខាន់នៃការបង់ពន្ធរបស់លោក Trump នៅក្នុងឯកសារតុលាការ។ ដោយកាលពីខែសីហា ឆ្នាំ ២០២០ កន្លងទៅលោក Vance បានលើកឡើងពីរបាយការណ៍សាធារណៈអំពីបទល្មើសដែលលោក Trump អាចប្រព្រឹត្ត។
នៅក្រុងញូវយ៉ក សហរដ្ឋអាមេរិកប្រភេទនៃការក្លែងបន្លំពន្ធមួយចំនួនអាចជាបទល្មើសដែលអាចជាប់ពន្ធនាគារ។ យោងតាមសារព័ត៌មាន New York Times បានរាយការណ៍ថា លោក Trump ដែលជាមហាសេដ្ឋីបានបង់ពន្ធប្រាក់ចំណូលចំនួន ៧៥០ ដុល្លារ សម្រាប់ឆ្នាំ ២០១៦ និង ២០១៧ ដែលចំនួននេះ មើលទៅហាក់ដូចជាតិចសម្រាប់លោកដែលជាអ្នកធ្វើជំនួញខាងអចលនទ្រព្យ។
លោក Nick Akerman អតីតរដ្ឋអាជ្ញាបាននិយាយនៅក្នុងទូរទស្សន៍ CNN កាលពីខែកញ្ញា ឆ្នាំ ២០២០ ថា សកម្មភាពរបស់លោក Trump អាចជាការបន្លំពន្ធមិនមែនការគេចពន្ធឡើយ។ លោក Trump បានបដិសេធការចោទប្រកាន់ទាក់ទងនឹងការបង់ពន្ធរបស់លោក ហើយបាននិយាយថា លោកបានចំណាយទៅលើការបង់ពន្ធជាច្រើន។
ក្រៅពីការចោទប្រកាន់ពីរឿងបង់ពន្ធ លោក Trump ក៏អាចប្រឈមនឹងបញ្ហាផ្លូវច្បាប់ទាក់ទងនឹងការបំពានផ្លូវភេទផងដែរ។
លោកស្រី E Jean Carroll អ្នកនិពន្ធបានចោទប្រកាន់លោក Trump ពីបទបរិហារកេរ្តិ៍ដែលលោកស្រីបានចោទប្រកាន់លោក Trump បានរំលោភលោកស្រីកាលពីឆ្នាំ ១៩៩០។ ចំណែកលោកស្រី Summer Zervos ដែលអតីតបេក្ខនារីក្នុងកម្មវិធីទូរទស្សន៍មួយបានចោទប្រកាន់លោក Donald Trump ដូចគ្នាទាក់ទងនឹងការបំពានផ្លូវភេទកាលពីឆ្នាំ ២០០៧។
លោកក៏អាចនឹងត្រូវដោះស្រាយទៅលើការចោទប្រកាន់ពីបទរំលោភច្បាប់ក្នុងអំឡុងពេលដែលលោកនៅកាន់តំណែងផងដែរ។ អ្នកជំនាញផ្នែកច្បាប់ធ្លាប់និយាយថា បណ្តឹងទាក់ទងនឹងករណីនេះអាចនឹងត្រូវលុបចោល ដោយតុលាការកំពូលបានបដិសេធរួចទៅហើយ។
លោក Trump នៅតែប្រឈមមុខនឹងការចោទប្រកាន់ពីបទញុះញង់ទាក់ទងនឹងកុបកម្មនៅវិមានកាពីតូល [អគារសភា] កាលពីថ្ងៃទី ៦ មករា។ ប្រធានសភាលោកស្រី Nancy Pelosi គ្រោងនឹងបញ្ជូនពាក្យបណ្តឹងនេះទៅព្រឹទ្ធសភានៅថ្ងៃទី ២៥ មករានេះ ដើម្បីចាប់ផ្តើមជំនុំជម្រះនេះ។
លោក Trump ត្រូវបានក្រុមប្រជាធិបតេយ្យ និងគណបក្សសាធារណរដ្ឋរិះគន់យ៉ាងខ្លាំងបន្ទាប់ពីលោកនិយាយទៅកាន់អ្នកគាំទ្ររបស់លោកមុនមានការវាយលុកនៅវិមានកាពីតូល។ លោក Trump បានអះអាងម្តងហើយម្តងទៀត ដោយមិនមានអំណះអំណាងមូលដ្ឋានជាក់លាក់ដែលថាមានការលួចបន្លំឆ្នោត៕