ក្រុងប្រ៊ុចសែល: សហភាពអឺរ៉ុប (EU និងអង្គការសហប្រជាជាតិ (UN) កាលពីថ្ងៃអង្គារ បានចាប់ផ្តើមបើកសន្និសីទរយៈពេល ២ ថ្ងៃ ដើម្បីស្វែងរកជំនួយថ្មីៗទៀតសម្រាប់ទឹកដីស៊ីរី ដែលរងការបំផ្លិចបំផ្លាញ និងបន្តពង្រឹងដំណើរស្វែងរកសន្តិភាពក្នុង ទីក្រុងហ្សឺណែវ ដែលកំពុងតែអាក់ដំណើរការ ខណៈជម្លោះនោះបានឈានដល់ឆ្នាំទី ៨ ហើយ។
ក្រុមប្រទេសផ្តល់ជំនួយ ក្រុមអង្គការផ្តល់ជំនួយ និងទីភ្នាក់ងារអង្គការសហប្រជាជាតិ នឹងប្រមូលផ្តុំគ្នានៅក្នុងក្រុងប្រ៊ុចសែល ដើម្បីចូលរួមបើកសន្និសីទប្រចាំឆ្នាំទី ៧ ស្តីអំពីអនាគតរបស់ស៊ីរី ខណៈក្រុមអធិការកិច្ចអន្តរជាតិ ធ្វើការស៊ើបអង្កេតអំពីបទសង្ស័យការវាយប្រហារឧស្ម័ននៅក្នុងទីប្រជុំជនដូម៉ា (Douma) ដោយបង្ហាញអំពីភាពសហាវឃោរឃៅនៃសង្គ្រាម។
កិច្ចប្រជុំធ្វើឡើងបន្ទាប់ពីមានការវាយប្រហារពីអាមេរិក បារាំង និង ចក្រភពអង់គ្លេសទៅលើទីតាំងឈរជើងរបស់យោធាស៊ីរី បង្កឡើងជាការឆ្លើយតប ទៅនឹងការវាយប្រហារក្នុងទីក្រុងដូម៉ា ដែលត្រូវបានដាក់ការចោទប្រកាន់លើក្រុងដាម៉ាស។
ក្រុមមន្ត្រី EU ជាច្រើនមានក្តីសង្ឃឹមថា អាចទទួលបានជំនួយឧបត្ថម្ភ៦ពាន់លានដុល្លារ នៅពេលបើកកិច្ចប្រជុំកាលពីឆ្នាំ ២០១៧ ខណៈការ វាយប្រហារដ៏ស្វិតស្វាញមួយបង្កឡើងដោយលោកបាសារ អាល់-អាសាដ គាំទ្រដោយសម្ព័ន្ធមិត្តដ៏សំខាន់គឺរុស្ស៊ីធ្វើឲ្យវិបត្តិនេះកាន់តែតានតឹងឡើង។
មន្ត្រីជាន់ខ្ពស់ម្នាក់របស់ EU បានឲ្យដឹងថា៖ «យើងបានមើលឃើញស្ថានភាពធ្លាក់ចុះដុនដាប ចាប់តាំងពីដើមឆ្នាំ។ យើងមានពលរដ្ឋនៅខាងក្នុងទឹកដីស៊ីរីដែលបំផ្លាស់ទីប្រហែល ៧០ ម៉ឺននាក់អំឡុងរយៈពេល ៤ ខែ»។
យោងតាមប្រភពព័ត៌មានពី EU បានឲ្យដឹងថា ពេលនេះពលរដ្ឋប្រហែល ៦,១ លាននាក់ ធ្វើការបំផ្លាស់ទីនៅខាងក្នុងប្រទេស ដែលពលរដ្ឋស៊ីរីជាង ៥ លាននាក់ បាននាំគ្នារត់ភៀសខ្លួនពីប្រទេសរបស់ពួកគេនោះ៕