.jpg)
លោកស្រី Ursula von der Leyen ធ្វើសន្និសីទកាសែតក្រោយទីភ្នាក់ងារឱសថអឺរ៉ុបអនុញ្ញាតឱ្យប្រើវ៉ាក់សាំង Pfizer/BioNTech។ AFP
កាលពីថ្ងៃចន្ទ ទី ២១ សហភាពអឺរ៉ុប (EU) បានអនុញ្ញាតឱ្យប្រើប្រាស់វ៉ាក់សាំងជំងឺ Covid-19 ផលិតដោយក្រុមហ៊ុន Pfizer និងដៃគូអាល្លឺម៉ង់ BioNTech នៅប្រទេសជាសមាជិកទាំង ២៧ ដោយពួកគេកំពុងត្រៀមចាប់ផ្ដើមការចាក់ក្រោយពីបុណ្យណូអែល។
ការសម្រេចអនុញ្ញាតរបស់ EU គឺធ្វើឡើងប៉ុន្មានម៉ោង ក្រោយទីភ្នាក់ងារឱសថអឺរ៉ុប (EMA) បានឱ្យភ្លើងបៃតងសម្រាប់ «ការអនុញ្ញាតប្រើប្រាស់ក្នុងទីផ្សារដោយមានលក្ខខណ្ឌ» ដែលការអនុញ្ញាតនេះ មានសុពលភាពរយៈពេល ១ ឆ្នាំ ហើយអាចបន្តជារៀងរាល់ឆ្នាំ។
EMA បានពន្លឿនដំណើរការពិនិត្យឡើងវិញនូវទិន្នន័យបឋមពីការសាកល្បងរបស់ Pfizer បន្ទាប់ពីទទួលសម្ពាធពីប្រទេសជាសមាជិកទាក់ទងនឹងភាពយឺតយ៉ាវក្នុងដំណើរការពិនិត្យនេះ។
ប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា៖ «ថ្ងៃនេះយើងបន្ថែមជំពូកសំខាន់មួយទៅរឿងជោគជ័យរបស់អឺរ៉ុប។ យើងបានអនុម័តវ៉ាក់សាំងប្រឆាំងនឹង Covid-19 ដែលមានសុវត្ថិភាព និងប្រសិទ្ធភាពដំបូងគេ។ វ៉ាក់សាំងច្រើនទៀតនឹងមកដល់ឆាប់ៗនេះ»។
ក្រុមហ៊ុន Pfizer នឹងទទួលខុសត្រូវការដឹកជញ្ជូនពីរោងចក្ររបស់ពួកគេនៅប្រទេសបែលហ្ស៊ិក និងអាល្លឺម៉ង់ទៅកាន់ប្រទេសសមាជិកនីមួយៗ។ រដ្ឋាភិបាលប្រទេសនីមួយៗនឹងទទួលខុសត្រូវការចែកចាយវ៉ាក់សាំងក្នុងប្រទេសតាមតម្រូវការពួកគេ។
លោកស្រី Leyen បានធានាថា វ៉ាក់សាំងនឹងមាននៅគ្រប់ប្រទេសសហភាពអឺរ៉ុបក្នុងពេលតែមួយ និងក្នុងលក្ខខណ្ឌដូចគ្នា។ លោកស្រីក៏បានបង្ហាញថា EMA គឺកំពុងពិចារណាការអនុញ្ញាតឱ្យប្រើប្រាស់វ៉ាក់សាំងរបស់ក្រុមហ៊ុន Moderna ដែលអាចបង្កើនសមត្ថភាពសហភាពអឺរ៉ុបក្នុងការបង្ការជំងឺ Covid-19។
ប្រទេសបារាំង អូទ្រីស អាល្លឺម៉ង់ និងអ៊ីតាលី បានបង្ហាញថា ពួកគេនឹងចាប់ផ្ដើមការចាក់វ៉ាក់សាំងនៅថ្ងៃទី ២៧ ខែ ធ្នូ ហើយប្រទេសផ្សេងទៀតនឹងចាប់ផ្ដើមការចាក់នៅថ្ងៃបន្តបន្ទាប់ពីនេះ។
ការប្រកាសអនុញ្ញាតឱ្យប្រើប្រាស់នេះ គឺចំពេលដែលរលកទីពីរ គឺនៅបន្តកើតឡើងនៅផ្នែកខ្លះនៃសហភាពអឺរ៉ុបធ្វើឱ្យករណីឆ្លង និងករណីស្លាប់កើនឡើងជាថ្មី។ បន្ថែមពីលើបញ្ហា នេះមានការរកឃើញការប្រែប្រួលវីរុស Covid-19 ថ្មីនៅចក្រភពអង់គ្លេសដែលមានលក្ខណៈឆ្លងខ្លាំងជាងធម្មតាបណ្ដាលឱ្យប្រទេសអឺរ៉ុបជាច្រើនបិទការធ្វើដំណើរចេញចូលចក្រភពអង់គ្លេស។
EMA និងក្រុមហ៊ុន BioNTech បាននិយាយថា វ៉ាក់សាំង Pfizer/BioNTech គឺមានសមត្ថភាពបង្ការនឹងវីរុស Covid19 ថ្មីនេះ រីឯប្រទេសរុស្ស៊ី វិញក៏បានអះអាងថា វ៉ាក់សាំង Sputnik V របស់ពួកគេក៏មានសមត្ថភាពនេះដែរ។
មកដល់ពេលនេះ សហភាពអឺរ៉ុបបានធានាថា គេនឹងទទួលវ៉ាក់សាំងចំនួនជាង ២ ពាន់លានដូស តាមរយៈការធ្វើកិច្ចព្រមព្រៀងជាមួយក្រុមហ៊ុនឱសថជាច្រើន។
ការបញ្ជាទិញយករបស់សហភាពអឺរ៉ុបរួមមាន វ៉ាក់សាំង Pfizer/BioNTech ចំនួន ៣០០ លានដូស វ៉ាក់សាំង Moderna ចំនួន ១៦០ លានដូស វ៉ាក់សាំង AstraZeneca/Oxford ចំនួន ៤០០ លានដូស វ៉ាក់សាំងអាល្លឺម៉ង់ CureVac ចំនួន ៤០៥ លានដូស វ៉ាក់សាំងអាមេរិក Johnson&Johnson ៤០០ លានដូស វ៉ាក់សាំងអាមេរិក Novovax ប្រមាណ ២០០ លានដូស និងវ៉ាក់សាំងបារាំង/អង់គ្លេស GlaxoSmithKline/Sanofi ចំនួន ៣០០ លានដូស។
បើទោះជាយ៉ាងនេះក៏ដោយ ក្នុងកិច្ចព្រមព្រៀងទាំងនេះសហភាពអឺរ៉ុប គឺគ្រាន់ផ្ដល់ប្រាក់កក់ប៉ុណ្ណោះ ដែលចុងក្រោយប្រទេសជាសមាជិក គឺជាអ្នកចេញថវិកាដោយផ្ទាល់ ដើម្បីទិញយកវ៉ាក់សាំងទាំងនេះ៕
