កាលពីថ្ងៃអង្គារ ទី ១៥ ធ្នូ រដ្ឋបាលម្ហូបអាហារ និងឱសថ (FDA) អាមេរិកបានបង្ហាញក្នុងឯកសារវិភាគទិន្នន័យការសាកល្បងដំណាក់កាលទី៣ នៃវ៉ាក់សាំងបង្ការជំងឺ Covid-19 របស់ក្រុមហ៊ុន Moderna ថា វ៉ាក់សាំងនេះមានប្រសិទ្ធភាពល្អ និងគ្មានផលប៉ះពាល់ធ្ងន់ធ្ងរទេ។
ការចុះផ្សាយឯកសារវិភាគនេះ គឺធ្វើឡើងរយៈពេល ២ ថ្ងៃមុនការជួបប្រជុំនៃគណៈកម្មាធិការប្រឹក្សាយោបល់នៃ FDA ដែលនឹងពិភាក្សាថា តើគួរអនុញ្ញាតឱ្យប្រើប្រាស់វ៉ាក់សាំងនេះក្នុងគ្រាអាសន្នដែរឬទេ?
កាលពីពាក់កណ្ដាលខែវិច្ឆិកា Moderna បានចេញលទ្ធផលបឋមថា វ៉ាក់សាំងពួកគេគឺមានប្រសិទ្ធភាព ៩៤,១ % និងគ្មានផលប៉ះពាល់ធ្ងន់ធ្ងរក្នុងការសាកល្បងជាមួយជនស្ម័គ្រចិត្តចំនួន ៣០ ០០០ នាក់ ហើយបានស្នើ FDA ឱ្យអនុញ្ញាតប្រើប្រាស់ក្នុងគ្រាអាសន្ន។ ការពិនិត្យទិន្នន័យឡើងវិញដោយ FDA បានបញ្ជាក់ពីការវាយតម្លៃមុនៗរបស់ Moderna ថា វ៉ាក់សាំងរបស់ពួកគេពិតជាមានអត្រាប្រសិទ្ធភាព ៩៤,១ %។ FDA ក៏បានកត់សម្គាល់ថា វ៉ាក់សាំងនេះមានផលប៉ះពាល់ស្រាលដូចជា គ្រុនក្ដៅ ឈឺក្បាល និងអស់កម្លាំង ប៉ុន្តែមិនមានគ្រោះថ្នាក់ទេ។
ការចេញផ្សាយទិន្នន័យនេះ គឺជាជំហានដំបូងនៃដំណើរការពិនិត្យឡើងវិញជាសាធារណៈដែលនឹងរួមមានការប្រជុំរយៈពេល ១ ថ្ងៃនៅថ្ងៃព្រហស្បតិ៍ នៃគណៈកម្មាធិការប្រឹក្សាយោបល់វ៉ាក់សាំង និងផលិតផលជីវសាស្ត្រពាក់ព័ន្ធរបស់ FDA។ គណៈកម្មាធិការប្រឹក្សាយោបល់នេះនឹងស្ដាប់ការផ្ដល់សក្ខីកម្មពី Moderna ពីអ្នកវិទ្យាសាស្ត្ររបស់ FDA និងពីសាធារណជនមុននឹងបោះឆ្នោតថា តើគួរអនុញ្ញាតឱ្យប្រើប្រាស់ដែរឬទេ? គេរំពឹងថា គណៈកម្មាធិការនឹងបោះឆ្នោតអនុញ្ញាតឱ្យប្រើប្រាស់ ហើយ FDA ជាទូទៅធ្វើតាមការណែនាំនេះ។
បើសិន FDA សម្រេចអនុញ្ញាតឱ្យប្រើប្រាស់ការចែកចាយវ៉ាក់សាំងចំនួន ៦ លានដូស អាចនឹងចាប់ផ្ដើមនៅសប្ដាហ៍ក្រោយ ដែលជាចំនួនបន្ថែមយ៉ាងខ្លាំងទៅលើកម្មវិធីចែកចាយវ៉ាក់សាំងឥតគិតថ្លៃទូទាំងប្រទេស ដែលបានចាប់ផ្ដើមការចែកចាយវ៉ាក់សាំង Pfizer/BioNTech រួចទៅហើយ។
កាលពីថ្ងៃព្រហស្បតិ៍ ទី ១០ ខែធ្នូ សប្ដាហ៍មុន គណៈកម្មាធិការដដែលបានបោះឆ្នោត ១៧-៤ (មានសមាជិក ១ រូប មិនបោះឆ្នោត) ណែនាំ FDA ឱ្យអនុញ្ញាតប្រើប្រាស់វ៉ាក់សាំង Pfizer/BioNTech ក្នុងគ្រាអាសន្ន។ ការចាក់វ៉ាក់សាំង Pfizer/BioNTech នៅសហរដ្ឋអាមេរិកបានចាប់ផ្ដើមនៅថ្ងៃចន្ទ ទី ១៤ ដោយបានផ្ដល់អាទិភាពទៅកាន់វេជ្ជបណ្ឌិត និងបុគ្គលិកដែលមានហានិភ័យឆ្លងខ្ពស់។
វ៉ាក់សាំង Pfizer/BioNTech និងវ៉ាក់សាំង Moderna គឺជាវ៉ាក់សាំងប្រភេទវ៉ាក់សាំង messenger RNA ឬ mRNA ដែលមានប្រសិទ្ធភាពប្រហាក់ប្រហែលគ្នា។ ក្រៅពីសហរដ្ឋអាមេរិកវ៉ាក់សាំង Pfizer/BioNTech ត្រូវបានអនុញ្ញាតឱ្យប្រើប្រាស់នៅបារ៉ែន កាណាដា កូវ៉ែត ម៉ិកស៊ិក អារ៉ាប៊ី សាអ៊ូឌីត សិង្ហបុរី ទុយនីស៊ី និងចក្រភពអង់គ្លេស រីឯ Moderna វិញគឺមិនទាន់បានទទួលការអនុញ្ញាតឱ្យប្រើប្រាស់នៅប្រទេសណាមួយឡើយ។
វ៉ាក់សាំង Pfizer/BioNTech គឺត្រូវតែរក្សាទុកក្នុងសីតុណ្ហភាព -៧០ អង្សាសេ ធ្វើឱ្យមានការពិបាកក្នុងការស្តុកទុក និងដឹកជញ្ជូន។ រីឯវ៉ាក់សាំង Morderna វិញដើមឡើយ គិតថាវ៉ាក់សាំងរបស់ពួកគេត្រូវការស្តុកទុកក្នុងសីតុណ្ហភាព -២០ អង្សាសេរយៈពេល ៦ ខែ តែក្រោយមកពួកគេប្រកាសថា អាចទុកក្នុងសីតុណ្ហភាពទូទឹកកកធម្មតាក្នុងរយៈពេល ១ ខែ ដែលធ្វើឱ្យងាយប្រើប្រាស់ និងដឹកជញ្ជូនជាងវ៉ាក់សាំង Pfizer។
បើគិតតាមកិច្ចសន្យាទិញទុកមុនរបស់រដ្ឋបាល Donald Trump កាលពីខែកក្កដា ដែលបានចំណាយប្រាក់អស់ ១,៩៥ ពាន់លានដុល្លារ ទិញយកវ៉ាក់សាំងចំនួន ១០០ លានដូស នោះវ៉ាក់សាំងនេះអាចមានតម្លៃ ២០ ដុល្លារ ក្នុង ១ ដូស។ កាលពីខែកញ្ញា រដ្ឋបាល Trump បានធ្វើកិច្ចសន្យាជាមួយ Mordena ទិញយក ១០០ លានដូស ក្នុងតម្លៃ ១,៥ ពាន់លានដុល្លារ ធ្វើឱ្យមានតម្លៃ ១៥ ដុល្លារ ក្នុង ១ ដូស។ នៅខែធ្នូ រដ្ឋបាល Trump ក៏បានបញ្ជាទិញវ៉ាក់សាំង Moderna ចំនួន ១០០ លានដូសទៀតសម្រាប់ការប្រើប្រាស់នៅត្រីមាសទី២ ឆ្នាំ ២០២១។
តែតម្លៃទាំងនេះ គឺជាតម្លៃនៅសហរដ្ឋអាមេរិកប៉ុណ្ណោះ ដោយក្រសួងសុខាភិបាលប្រទេសទុយនីស៊ី បានប្រកាសថា កិច្ចព្រមព្រៀងរបស់ពួកគេជាមួយ Pfizer/BioNTech គឺនឹងធានាតម្លៃប្រមាណ ៧ ដុល្លារ ក្នុង ១ ដូស។ Moderna ធ្លាប់ឱ្យដឹងថា ពួកគេអាចលក់វ៉ាក់សាំងរបស់ពួកគេក្នុងតម្លៃជាង ៣០ ដុល្លារ។
វ៉ាក់សាំងទាំង ២ នេះ គឺត្រូវការចាក់ចំនួន ២ ដូស ដើម្បីមានប្រសិទ្ធភាពដូចខាងលើ។ ការចាក់វ៉ាក់សាំង Pfizer/BioNTech គឺត្រូវគម្លាតរយៈពេល ៣ សប្ដាហ៍ រីឯការចាក់វ៉ាក់សាំង Moderna វិញត្រូវការគម្លាតរយៈពេល ៤ សប្ដាហ៍៕