កាលពីថ្ងៃសុក្រ ទី ១៨ រដ្ឋបាលម្ហូបអាហារ និងឱសថ (FDA) អនុញ្ញាតឱ្យប្រើប្រាស់ក្នុងគ្រាអាសន្ននូវវ៉ាក់សាំងជំងឺ Covid-19 ផលិតដោយក្រុមហ៊ុន Moderna ក្រោយពីគណៈកម្មការប្រឹក្សាយោបល់របស់ខ្លួនបានបោះឆ្នោតគាំទ្រជាឯកច្ឆន្ទ។ គណៈកម្មការប្រឹក្សាយោបល់បានធ្វើការអនុញ្ញាតដោយផ្អែកលើឯកសារវិភាគទិន្នន័យការសាកល្បងជាមួយជនស្ម័គ្រចិត្តចំនួន ៣០ ០០០ នាក់របស់ FDA ចុះផ្សាយកាលពីថ្ងៃអង្គារ ដែលបានបង្ហាញថា វ៉ាក់សាំង Moderna មានប្រសិទ្ធភាព ៩៤,១ % និងមិនមានផលប៉ះពាល់ធ្ងន់ធ្ងរចំពោះមនុស្សមានអាយុ ១៨ ឆ្នាំឡើងទៅ។
នាយឧត្ដមសេនីយ៍កងទ័ពជើងគោក Gustave Perna ដែលជានាយកប្រតិបត្តិបេសកកម្មចែកចាយវ៉ាក់សាំង Operation Warp Speed របស់អាមេរិកបាននិយាយកាលពីថ្ងៃសៅរ៍ថា ការចែកចាយវ៉ាក់សាំង Moderna កំពុងតែដំណើរការ ហើយដូសដំបូងបង្អស់គឺគ្រោងនឹងទៅដល់ទីតាំងនានានៅទូទាំងសហរដ្ឋអាមេរិកនៅថ្ងៃចន្ទ។
លោក Perna បាននិយាយថា៖ « រដ្ឋជាច្រើនបានបញ្ជាទិញវ៉ាក់សាំងរួចហើយយើង ដឹងថា វ៉ាក់សាំងនេះនឹងទៅដល់ទីតាំង ៣ ៧០០ កន្លែងដោយមានសំណើកាន់តែច្រើនចូលមកជារៀងរាល់ថ្ងៃ»។
ការអនុញ្ញាតឱ្យប្រើប្រាស់នេះធ្វើឱ្យវ៉ាក់សាំង Moderna ក្លាយជាវ៉ាក់សាំង Covid-19 ទី ២ ដែលនឹងផ្ដល់ដល់សាធារណជនអាមេរិក បន្ទាប់ពី FDA បានអនុញ្ញាតឱ្យប្រើប្រាស់វ៉ាក់សាំង Pfizer/BioNTech កាលពី ១ សប្ដាហ៍មុនដែលទទួលបានសំឡេងគាំទ្រ ១៧៣ ដោយមានសមាជិក ១ រូបមិនបោះឆ្នោត។
លោកឧត្ដមសេនីយ៍ Perna បានបញ្ជាក់ថា ចាប់ផ្ដើមពីថ្ងៃចន្ទវ៉ាក់សាំង Moderna ចំនួន ៥,៩ លានដូស និងវ៉ាក់សាំង Pfizer/BioNTech ចំនួន ២ លានដូស ដែលសរុបមានចំនួន ៧,៩ លានដូសនឹងត្រូវបានចែកចាយទៅដល់កន្លែងចាក់។
កាលពីសប្ដាហ៍មុន Pfizer/BioNTech បានផ្ដល់វ៉ាក់សាំងចំនួន ២,៩ លានដូស ហើយការចាក់បានចាប់ផ្ដើមនៅថ្ងៃចន្ទទី ១៤។ Moderna ធ្លាប់បានប្រកាសថា ពួកគេមានគោលដៅចែកចាយវ៉ាក់សាំងចំនួន ២០ លានដូសត្រឹមដំណាច់ឆ្នាំ ២០២០។
វ៉ាក់សាំង Pfizer/BioNTech និងវ៉ាក់សាំង Moderna គឺជាវ៉ាក់សាំងប្រភេទវ៉ាក់សាំង messenger RNA ឬ mRNA ដែលមានប្រសិទ្ធភាពប្រហាក់ប្រហែលគ្នា។ ក្រៅពីសហរដ្ឋអាមេរិក វ៉ាក់សាំង Pfizer/BioNTech ត្រូវបានអនុញ្ញាតឱ្យប្រើប្រាស់នៅឯបារ៉ែន កាណាដា ស៊ីលី កូស្តារីកា អេក្វាទ័រ កូវ៉ែត ម៉ិកស៊ិក ប៉ាណាម៉ា អារ៉ាប៊ី សាអ៊ូឌីត សិង្ហបុរី ទុយនីស៊ី និងចក្រភពអង់គ្លេសហើយមានការបញ្ជាទិញយកដោយក្រុមហ៊ុន Fosun ចំនួន ១០០ លានដូសសម្រាប់ធ្វើការចែកចាយក្នុងប្រទេសចិន។ ក្រៅពីសហរដ្ឋអាមេរិក មិនទាន់មានប្រទេសណាផ្សេងទៀតដែលបានអនុញ្ញាតឱ្យប្រើប្រាស់វ៉ាក់សាំង Moderna តែមានកិច្ចព្រមព្រៀងទិញយកជាមួយសហភាពអឺរ៉ុបកាណាដា ជប៉ុន និងកាតា។
វ៉ាក់សាំង Moderna មានភាពងាយស្រួលក្នុងការដឹកជញ្ជូនជាងវ៉ាក់សាំង Pfizer/BioNTech ដោយសារវ៉ាក់សាំង Moderna អាចទុកក្នុងសីតុណ្ហភាពទូទឹកកកធម្មតាបាន ៣០ ថ្ងៃ ហើយទុកក្នុងសីតុណ្ហភាព -២០ អង្សាសេបានរយៈពេល ៦ ខែ។ ចំណែកឯវ៉ាក់សាំង Pfizer/BioNTech ត្រូវការទុកក្នុងសីតុណ្ហភាព -៧០ អង្សាសេ ជានិច្ចធ្វើឱ្យពិបាកក្នុងការដឹកជញ្ជូនជាពិសេសទៅតំបន់ជនបទដែលមិនមានហេដ្ឋារចនាសម្ព័ន្ធសម្រាប់រក្សាទុក។
បើគិតតាមកិច្ចសន្យាទិញទុកមុនរបស់រដ្ឋបាល Donald Trump កាលពីខែកក្កដា ដែលបានចំណាយប្រាក់អស់ ១,៩៥ ពាន់លានដុល្លារ ទិញយកវ៉ាក់សាំងចំនួន ១០០ លានដូសនោះ វ៉ាក់សាំងនេះអាចមានតម្លៃ ២០ ដុល្លារក្នុង ១ ដូស។
កាលពីខែកញ្ញារដ្ឋបាល Trump បានធ្វើកិច្ចសន្យាជាមួយ Mordena ទិញយក ១០០ លានដូសក្នុងតម្លៃ ១,៥ ពាន់លានដុល្លារធ្វើឱ្យមានតម្លៃ ១៥ ដុល្លារក្នុង ១ ដូស។ នៅខែធ្នូ រដ្ឋបាល Trump ក៏បានបញ្ជាទិញវ៉ាក់សាំង Moderna ចំនួន ១០០ លានដូសទៀតសម្រាប់ការប្រើប្រាស់នៅត្រីមាសទី ២ ឆ្នាំ ២០២១។
តែតម្លៃទាំងនេះគឺជាតម្លៃនៅសហរដ្ឋអាមេរិកប៉ុណ្ណោះដោយ ក្រសួងសុខាភិបាលប្រទេសទុយនីស៊ីបានប្រកាសថា កិច្ចព្រមព្រៀងរបស់ពួកគេជាមួយ Pfizer/BioNTech គឺនឹងធានាតម្លៃប្រមាណ ៧ ដុល្លារក្នុង ១ ដូស។ Moderna ធ្លាប់បានឱ្យដឹងថា ពួកគេអាចលក់វ៉ាក់សាំងរបស់ពួកគេក្នុងតម្លៃជាង ៣០ ដុល្លារក្នុង ១ ដូស។
វ៉ាក់សាំងទាំង ២ នេះគឺត្រូវការចាក់ចំនួន ២ ដូសដើម្បីមានប្រសិទ្ធភាពដូចខាងលើ។ ការចាក់វ៉ាក់សាំង Pfizer/BioNTech គឺត្រូវមានគម្លាតរយៈពេល ៣ សប្ដាហ៍ រីឯការចាក់វ៉ាក់សាំង Moderna វិញត្រូវការគម្លាតរយៈពេល ៤ សប្ដាហ៍។
មកដល់ពេលនេះមានការរាយការណ៍ថា មានករណីអាល្លែកហ្ស៊ីធ្ងន់ធ្ងរក្រោយពីបានទទួលវ៉ាក់សាំង Pfizer/BioNTech ចំនួន ៦ ករណីនៅសហរដ្ឋអាមេរិក និងចំនួន ២ ករណីនៅចក្រភពអង់គ្លេស។ ក្នុងការសាកល្បងវ៉ាក់សាំង Moderna គេមិនបានរកឃើញករណីអាល្លែកហ្ស៊ីធ្ងន់ធ្ងរ ប៉ុន្តែជាការប្រុងប្រយ័ត្ន CDC អាមេរិកបានណែនាំឱ្យជនដែលមានប្រវត្តិអាល្លែកហ្ស៊ីធ្ងន់ធ្ងរមិនឱ្យទទួលវ៉ាក់សាំងទាំងនេះទេ៕