បុរីញូវយ៉ក៖ មូលនិធិអាកាសធាតុបៃតងគាំទ្រដោយ UN (GCF) បានថ្លែងឲ្យដឹងថា ទឹកប្រាក់ជាង ៣៩ លានដុល្លារអាមេរិក ជាមូលនិធិ ត្រូវបានអនុម័តកាលពីថ្ងៃពុធសម្រាប់គម្រោងមួយ ដែលនឹងស្តារ និងកាត់បន្ថយផលប៉ះពាល់ពីការប្រែប្រួលអាកាសធាតុ ដោយបានផ្តល់ផលប្រយោជន៍ដល់ប្រជាជននេប៉ាល់ជិត ១ លាននាក់។
GCF បានថ្លែងនៅក្នុងសេចក្តីចេញផ្សាយព័ត៌មានមួយកាលពីថ្ងៃពុធថា ដោយបានផ្តល់មូលនិធិរួមគ្នាដល់គំនិតផ្តួចផ្តើមនេះ ក្រសួងរុក្ខាប្រមាញ់ និងបរិស្ថាន (MoFE) នៃប្រទេស នេប៉ាល់ កំពុងបន្ថែមទឹកប្រាក់ចំនួន ៨ លានដុល្លារបន្ថែមទៀត សម្រាប់ចំនួនទឹកប្រាក់សរុបជាង ៤៧ លានដុល្លារអាមេរិក ដែលនឹងមើលឃើញថាគម្រោងនេះ នឹងផ្តល់ផលផែ្លផ្កាក្នុងរយៈពេល ៧ ឆ្នាំ។
សហគមន៍ជាច្រើននៅក្នុងតំបន់ភ្នំ Churia ជាតំបន់ជួរភ្នំចុងខាងត្បូងនៃជើងភ្នំហិមាល័យ ដែលលាតសន្ធឹងពីកើតទៅលិចឆ្លងកាត់ប្រទេស នេប៉ាល់ នឹងត្រូវបានយកជាគោលដៅ ខណៈដែលតំបន់នេះផ្តល់មុខងារជាច្រើននៃប្រព័ន្ធបរិស្ថានដ៏មានសារៈសំខាន់ដល់តំបន់វាលទំនាប ដែលមានប្រជាជនយ៉ាងច្រើន ជាទីដែលដីកសិកម្មមានជីជាតិបំផុតស្ថិតនៅ។
លោក Somsak Pipoppinyo តំណាងអង្គការស្បៀងអាហារ និងកសិកម្មអង្គការសហប្រជាជាតិ (FAO) ប្រចាំនៅប្រទេស នេប៉ាល់ បានថ្លែងថា វិភាគទាន GCF ដ៏សំខាន់នេះនឹងផ្តល់ផលប្រយោជន៍ដល់ប្រជាជន ២០ ម៊ឺនគ្រួសារនៅក្នុងតំបន់ភ្នំ Churia ដោយបានបញ្ជាក់ថា ជំនួយនេះនឹងជួយដល់ប្រជាជនជាច្រើនគ្រួសារនៅតំបន់ជនបទកាន់តែរឹងមាំ ដើម្បីទប់ទល់នឹងអាកាសធាតុប្រែប្រួលដែលពួកគេកំពុងរស់នៅ»។
ការប្រើប្រាស់ធនធានធម្មជាតិមិនបានការពារត្រឹមត្រូវរយៈពេលជាច្រើនទសវត្សរ៍ បាននាំឲ្យមានការបំផ្លាញព្រៃឈើ ទឹកជំនន់ និងការហូរច្រោះដី។ ចំណែកឯផលប៉ះពាល់អវិជ្ជមានទៅលើសហគមន៍តាមតំបន់ខ្សែទឹកកាន់ខ្លាំងឡើងៗ ដោយការកើនឡើងគ្រោះរាំងស្ងួត និងផលវិបាកពីអាកាសធាតុកាន់ច្រើនឡើងដែលបង្កឡើងពីវិបត្តិអាកាសធាតុ។
សេចក្តីចេញផ្សាយព័ត៌មាននោះបានឲ្យដឹងថា ផលប៉ះពាល់ទាំងនោះនឹងកើនឡើងនៅក្នុងប៉ុន្មានឆ្នាំខាងមុខនេះ ដោយគំរាមកំហែងដល់សន្តិសុខស្បៀង និងជីវភាពរស់នៅរបស់ប្រជាជន។
លោក Kailash Pokharel នៃក្រសួងហិរញ្ញវត្ថុរបស់នេប៉ាល់បានបង្ហាញថា តំបន់នោះជាតំបន់អាទិភាពរបស់ជាតិដែលមានសារៈសំខាន់ចំពោះសន្តិសុខស្បៀង និងគោលនយោបាយប្រែប្រួលអាកាសធាតុ និងបានសន្យាធានាថា គម្រោងនេះនាំឲ្យមានការផ្លាស់ប្តូរនៅតាមសហគមន៍មូលដ្ឋាន និងធ្វើឲ្យការស្តារផលប៉ះពាល់ពីការប្រែប្រួលអាកាសធាតុល្អប្រសើរឡើង។
ដោយត្រូវបានរៀបចំដើម្បីរួមចំណែកដល់វិភាគទាន ដែលកំណត់ជាទូទៅរបស់ប្រទេស នេប៉ាល់ ដើម្បីកាត់បន្ថយការបញ្ចេញឧស្ម័នផ្ទះកញ្ចក់នៅក្នុងសន្ធិសញ្ញាក្របខ័ណ្ឌការងាររបស់អង្គការសហប្រជាជាតិស្តីពីការប្រែប្រួលអាកាសធាតុ (UNFCCC) ភាគច្រើននៃការងារនេះ បានផ្តោតទៅលើការអភិវឌ្ឍហេដ្ឋារចនាសម្ព័ន្ធ ដើម្បីបញ្ចៀសពីការធ្វើឲ្យប៉ះពាល់ដល់ការអនុវត្តការងារគ្រប់គ្រងធនធានធម្មជាតិដែលកាន់តែខ្សត់ខ្សោយនោះ។
យោងតាមសេចក្តីចេញផ្សាយព័ត៌មាននោះបានឲ្យដឹងថា ភាពអាចទ្រទ្រង់បានយូរអង្វែងនៃមូលនិធិនេះ នឹងពឹងផ្អែកលើការកសាងសមត្ថភាពរបស់បុគ្គល និងស្ថាប័នគ្រប់លំដាប់ថ្នាក់៕ Xinhua/PSA