អតីតប្រធានាធិបតីអាមេរិកលោក Donald Trump នឹងធ្វើការវិលត្រឡប់មកបណ្ដាញសង្គមជាមួយនឹងការបង្កើតវេទិកាបណ្ដាញថ្មីរបស់លោកផ្ទាល់។ នេះបើតាមទីប្រឹក្សាជាន់ខ្ពស់របស់លោក ១ រូប បានប្រាប់សារព័ត៌មាន Fox News កាលពីថ្ងៃអាទិត្យ ទី ២១ មីនា។
«ខ្ញុំគិតថា យើងនឹងឃើញលោកប្រធានាធិបតី Trump ត្រឡប់មកបណ្ដាញសង្គមវិញប្រហែលជា ២ ទៅ ៣ ខែ ជាមួយនឹងវេទិកាផ្ទាល់ខ្លួនរបស់គាត់»។ ទីប្រឹក្សាជាន់ខ្ពស់របស់លោក Trump លោក Jason Miller បាននិយាយបែបនេះ។
លោក Miller បាននិយាយថា លោកមិនអាចផ្ដល់ព័ត៌មានលម្អិតបន្ថែមទៀតនៅចំណុចនេះទេ ប៉ុន្តែលោកបានបង្ហាញថា លោក Trump បាន «មានការប្រជុំខ្ពស់» ជាមួយក្រុមផ្សេងៗទាក់ទងនឹងការបណ្ដាក់ទុន ហើយ «ក្រុមហ៊ុនជាច្រើន» បានទាក់ទងទៅលោក៕