.jpg)
លោក Donald Trump ប្រធានាធិបតីសហរដ្ឋអាមេរិក ថ្លែងនាពេលកន្លងមក។ រូបថត AFP
កាលពីថ្ងៃសៅរ៍ ទី ២ ខែ មករា ២០២១ ប្រធានាធិបតីសហរដ្ឋអាមេរិកលោក Donald Trump បានធ្វើការហៅទូរស័ព្ទទៅកាន់រដ្ឋលេខាធិការនៃរដ្ឋ Georgia លោក Brad Raffensperger និងមន្ត្រីរៀបចំការបោះឆ្នោតផ្សេង ឱ្យ «រក» សន្លឹកឆ្នោតគ្រប់គ្រាន់ ដើម្បីច្រានចោលលទ្ធផលជ័យជម្នះរបស់ប្រធានាធិបតីជាប់ឆ្នោត Joe Biden នៅរដ្ឋនេះ។ នេះបើតាមការរាយការណ៍ដំបូងដោយកាសែត The Washington Post។
លោក Trump បាននិយាយថា៖ «ប្រជាជននៃរដ្ឋ Georgia គឺកំពុងខឹងហើយមិនមានអ្វីខុសនឹងការនិយាយថា អ្នកនឹងធ្វើការគណនាសាឡើងវិញ»។
លោក Raffensperger បានឆ្លើយនឹងលោក Trump ថា៖ «លោកប្រធានាធិបតីការតវ៉ាដែលអ្នកមាន គឺទិន្នន័យរបស់អ្នកមានគឺខុស»។
លោក Trump បានបន្តនិយាយថា៖ «អ្វីដែលខ្ញុំចង់ធ្វើ គឺខ្ញុំគ្រាន់តែចង់ស្វែងរកសំឡេងឆ្នោតចំនួន ១១ ៧៨០ ដែលជាចំនួនមួយលើសពីអ្វីដែលយើងមាន ពីព្រោះយើងបានឈ្នះរដ្ឋ»។ ក្នុងការរាប់សន្លឹកឆ្នោតឡើងវិញនៅរដ្ឋ Georgia កាលពីខែវិច្ឆិកា បានរកឃើញលោក Biden បានទទួលសំឡេងច្រើនជាង លោក Trump ចំនួន ១១ ៧៧៩។
នៅក្នុងការសន្ទនាជាង ១ ម៉ោងនេះ លោក Trump បានរិះគន់សមាជិកបក្សសាធារណរដ្ឋទាំងនេះថា ពួកគេមិនព្រមទទួលស្គាល់ថា លោកបានឈ្នះនៅរដ្ឋ Georgia ហើយបានបន្តធ្វើការអះអាងដោយមិនមានភ័ស្តុតាងថា មានការក្លែងការបោះឆ្នោត។
លោក Trump បាននិយាយថា៖ «អ្នកគួរតែចង់ឱ្យមានការបោះឆ្នោតត្រឹមត្រូវ ហើយអ្នកជាសមាជិកបក្សសាធារណរដ្ឋ»។
លោក Raffensperger បានឆ្លើយវិញថា៖ «យើងជឿជាក់ថា យើងពិតជាមានការបោះឆ្នោតត្រឹមត្រូវ»។
លោក Trump តបថា៖ «ទេ ទេ អ្នកមិនមានទេ...មិនទាំងជិតផង។ អ្នករាប់ខុសសន្លឹកឆ្នោតរាប់សែន»។
មន្ត្រីនៅក្នុងការិយាល័យរបស់លោក Raffensperger បានថតទុកការហៅទូរស័ព្ទជាមួយលោក Trump នេះ។ ប្រភពក្នុងការិយាល័យបានប្រាប់ CNN ថា លោក Raffensperger មិនចង់ផ្សាយការថតទុកនេះទេ លុះត្រាតែលោក Trump វាយប្រហារលោក។
កាលពីថ្ងៃអាទិត្យ លោក Trump បានវាយប្រហារលោក Raffensperger តាមប្រព័ន្ធសង្គម Twitter ថា៖ «ខ្ញុំបាននិយាយជាមួយរដ្ឋលេខាធិការ កាលពីម្សិលមិញអំពីស្រុក Fulton និងការបន្លំអ្នកបោះឆ្នោតនៅរដ្ឋ Georgia។ លោកមិនមានឆន្ទៈ ឬមិនអាចឆ្លើយសំណួរដូចជា ការបោកប្រាស់ «សន្លឹកឆ្នោតនៅក្រោមតុ» ការបំផ្លាញសន្លឹកឆ្នោត «អ្នកបោះឆ្នោត» ក្រៅរដ្ឋអ្នកបោះឆ្នោតស្លាប់ និងច្រើនទៀត។ គាត់មិនមានតម្រុយសោះ»។
លោក Raffenesperger បានឆ្លើយនឹងលោក Trump វិញថា៖ «ដោយមានការគោរពប្រធានាធិបតី Trump អ្វីដែលអ្នកកំពុងនិយាយមិនមែនជាការពិតទេ។ ការពិតនឹងចេញមក»។
ប៉ុន្មានម៉ោងក្រោយពីការ ដោះដូរសម្ដីនេះ កាសែត The Washington Post បានធ្វើការរាយការណ៍អំពីការហៅតាមទូរស័ព្ទនេះ។
លោក Raffensperger ដែលជាសមាជិកបក្សសាធារណរដ្ឋ និងជាអ្នកគាំទ្រលោក Trump បានបដិសេធជានិច្ចនូវការអះអាងរបស់ លោក Trump អំពីការលួចបន្លំអ្នកបោះឆ្នោតនៅរដ្ឋ Georgia។ លោកបានមើលពីលើការរាប់សន្លឹកឆ្នោតឡើងវិញចំនួន ៣ ផ្សេងគ្នា និងបានធ្វើការត្រួតពិនិត្យជាច្រើនទៀតអំពីដំណើរការនេះ។ ថ្មីៗនេះលោកបានប្រគល់ភារកិច្ចឱ្យការិយាល័យស៊ើបអង្កេតនៃរដ្ឋ Georgia ឱ្យធ្វើសវនកម្មនៃប្រព័ន្ធពិនិត្យហត្ថលេខានៅក្នុងស្រុក Cobb ដែលបានកំណត់ថា ប្រព័ន្ធនេះមានភាពត្រឹមត្រូវ ៩៩,៩% ហើយមិនបានបង្ហាញភ័ស្តុតាងនៃការក្លែងបន្លំឡើយ។
កាលពីដើមខែធ្នូ លោក Trump ធ្លាប់បានហៅទូរស័ព្ទស្រដៀងគ្នានេះទៅកាន់អភិបាលរដ្ឋ Georgia លោក Brian Kemp ដោយលោក Trump ក៏បានដាក់សម្ពាធឱ្យច្រានចោលលទ្ធផលបោះឆ្នោត តែលោក Kemp មិនព្រមធ្វើតាមការទាមទាររបស់លោក Trump ទេ។
លោក Biden ត្រូវបានអង្គបោះឆ្នោត (Electoral College) បញ្ជាក់ក្នុងសំឡេង ៣០៦ ទល់ ២៣២ ជាប្រធានាធិបតីសហរដ្ឋអាមេរិកទី៤៦ ហើយសភាអាមេរិកនឹងធ្វើការសម្រេចបន្តក្នុងសម័យប្រជុំរួមនៅថ្ងៃ ៦ ខែមករា។ តែសមាជិកសភាតំណាងរាស្ត្រ និងសមាជិកព្រឹទ្ធសភាមកពីបក្សសាធារណរដ្ឋបានប្ដេជ្ញាជំទាស់លទ្ធផលនេះ។
អ្នកវិភាគបានគិតថា ការតវ៉ានេះ នឹងមិនជោគជ័យទេដោយសារតែសភាតំណាងគឺគ្រប់គ្រងដោយបក្សប្រជាធិបតេយ្យ ហើយថ្នាក់ដឹកនាំបក្សសាធារណរដ្ឋក្នុងព្រឹទ្ធសភាបានទទួលស្គាល់លទ្ធផលបោះឆ្នោតរួចហើយ។ យ៉ាងណាមិញ លោក Trump គឺកំពុងរៀបចំបាតុកម្មតវ៉ានៅរដ្ឋធានីវ៉ាស៊ីនតោននៅថ្ងៃទី ២០ មករា ដែលជាថ្ងៃលោក Biden ត្រូវចូលកាន់អំណាច៕
