.jpg)
ពលរដ្ឋយេមែន ទទួលការព្យាបាលជំងឺនៅមជ្ឈមណ្ឌលមួយនៅក្នុងក្រុងសាណា។ AFP
ក្រុងហ្សឺណែវៈ ប្រធានសិទ្ធិមនុស្សអង្គការសហប្រជាជាតិ បានព្រមានកាលពីថ្ងៃពុធថា កុមារនៅក្នុងប្រទេស យេម៉ែន បានបន្តស្លាប់ និងរងរបួស ជាអត្រាដែលគួរឲ្យព្រួយបារម្ភយ៉ាងខ្លាំង ទោះបីជាមានបទឈប់បាញ់រយៈពេល ៣ ខែនៅ កំពង់ផែហូដេដាក្តី។
លោកស្រី Michelle-Bachelet បានថ្លែងប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅក្រុងហ្សឺណែវថា៖ «ចាប់តាំងពីកិច្ចព្រមព្រៀងនៅក្រុង Stockholm កាលពីថ្ងៃទី ១៣ ខែធ្នូមក ទើបត្រូវបានគេវាយតម្លៃថា ក្មេង ៨ នាក់ បានស្លាប់ ឬរងរបួសនៅយេម៉ែនជារៀងរាល់ថ្ងៃ»។
រដ្ឋាភិបាលគាំទ្រដោយអារ៉ាប៊ី សាអ៊ូឌីត និងក្រុមឧទ្ទាមហ៊ូធីមានសម្ព័ន្ធមិត្តជាមួយអ៊ីរ៉ង់ បានឯកភាពគ្នានៅក្នុងប្រទេស ស៊ុយអែត ទៅលើបទឈប់បាញ់មួយ ដែលក្នុងនោះមាន បទឈប់បាញ់មួយ នៅក្រុងហូដេដា ជាច្រកចូលកំពង់ផែសមុទ្រក្រហម។
ក្មេងពិការយេមែន ទទួលជំនួយរទេះពីប្រទេស កូវ៉ែត នៅក្នុងកំពង់ផែហូដេដា។ AFP
ប៉ុន្តែលោកស្រី Bachelet បានថ្លែងថា នៅពេលបប្ចុប្បន្ននេះ ក្មេងៗកំពុងរស់នៅក្នុង តំបន់ជម្លោះយ៉ាងសកម្ម ៣១ តំបន់នៅទូទាំងប្រទេស ហើយត្រូវបានគេមើលឃើញថាមាន «អំពើហិង្សាទាក់ទងទៅនឹងសង្គ្រាមយ៉ាងខ្លាំងក្លា» នៅក្នុងនោះមាននៅក្រុង Taez ក្រុង Hajjah និង Saada។
ក្រុមប្រឹក្សាជនភៀសខ្លួនន័រវែស បានថ្លែងថា កាលពីដើមសប្តាហ៍នេះ ដែលជនស៊ីវិលចំនួន ៣៤៨ នាក់ បានស្លាប់នៅក្រុង Hajjah និង Taez ចាប់តាំងពីកិច្ចព្រមព្រៀងក្រុង Stockholm ត្រូវបានចុះហត្ថលេខារួចមក។
ប្រធានសិទ្ធិមនុស្សអង្គការសហប្រជាជាតិរូបនេះបានសម្តែងការព្រួយបារម្ភជាពិសេសកាន់តែខ្លាំងឡើងកាលពីពេលថ្មីៗនេះនៅក្រុង Hajjah ភាគខាងជើងជាទីដែលមនុស្ស ២២ នាក់ ក្មេង ១២ នាក់ និងស្ត្រី ១០ នាក់ បានស្លាប់ ហើយ ៣០ នាក់ ផ្សេងទៀត ដែលជិតពាក់កណ្តាលនៅក្នុងចំណោមពួកគេ គឺជាកុមារដែលបានរងរបួសនៅក្នុងការវាយប្រហារជាច្រើនលើកកាលពីដើមខែនេះ។
មនុស្ស ១ ម៉ឺននាក់ ត្រូវបានគេវាយតម្លៃថាស្លាប់ ចាប់តាំងពីខែមីនាឆ្នាំ ២០១៥ នៅពេលអារ៉ាប៊ី សាអ៊ូឌីត និងប្រទេស អារ៉ាប់រួម ដែលមានការគាំទ្រទាំងផ្នែកនយោបាយទំាងផ្នែកសម្ភារពីអាមេរិក បានរៀបចំសកម្មភាពវាយប្រហារផ្លូវអាកាសប្រឆាំងទៅនឹងក្រុមឧទ្ទាមហ៊ូធី៕ AFP/SK
