.jpg)
ក្មេងៗជនភៀសខ្លួនរ៉ូហ៊ីងយ៉ារៀនគម្ពីរកូរ៉ាន នៅក្នុងជំរំជនភៀសខ្លួននៅបង់ក្លាដែស។ AFP
បុរីញូវយ៉កៈ របាយការណ៍របស់អង្គការ បានឲ្យដឹងកាលពីថ្ងៃចន្ទថា អង្គការសហប្រជាជាតិ បានជួបប្រទះ «ការបរាជ័យជាប្រព័ន្ធ» នៅក្នុងការដោះស្រាយស្ថានការណ៍នៅក្នុងប្រទេស មីយ៉ាន់ម៉ា ដែលបានកើតឡើងកាលពីឆ្នាំ ២០១៧ មានក្រុមជនរ៉ូហ៊ីងយ៉ាយ៉ាងច្រើនសន្ធឹកសន្ធាប់ បានរត់ភៀសខ្លួនទៅបង់ក្លាដែស។
ការរកឃើញនោះ បានកើតឡើងក្រោយពីអគ្គលេខាធិការអង្គការសហប្រជាជាតិលោក Antonio Guterres កាលពីខែកុម្ភៈ បានបញ្ជាឲ្យត្រួតពិនិត្យមើលកិច្ចការផ្ទៃក្នុងនៃប្រតិបត្តិការរបស់អង្គការពិភពលោកនេះ នៅប្រទេស មីយ៉ាន់ម៉ា ក្រោយពីក្រុមមន្ត្រីរបស់ខ្លួននៅក្នុងប្រទេសនោះ ត្រូវបានចោទប្រកាន់ពីបទមិនយកចិត្តទុកដាក់អំពីសញ្ញាព្រមាននៃការវាយប្រហារនានាប្រឆាំងជនរ៉ូហ៊ីងយ៉ា ដែលជាជនមូស្លីមភាគតិចនោះ។
បច្ចុប្បន្ន ជនរ៉ូហ៊ីងយ៉ាប្រហែល ៧៤ ម៉ឺននាក់ កំពុងរស់នៅក្នុងជំរំនៅបង់ក្លាដែស ក្រោយពីបានរត់ភៀសខ្លួនចេញពីរដ្ឋរ៉ាក់ឃីនភាគខាងជើងប្រទេស មីយ៉ាន់ម៉ា នៅអំឡុងយុទ្ធនាការបង្ក្រាបយោធាកាលពីឆ្នាំ ២០១៧ អង្គការសហប្រជាជាតិ បានពិពណ៌នាថា ជាយុទ្ធនាការបោសសម្អាតជនភាគតិចរ៉ូហ៊ីងយ៉ាទាំងនោះ។
របាយការណ៍នោះនិយាយថា ខណៈមានការលំបាកក្នុងការកំណត់ការទទួលខុសត្រូវចំពោះការខកខានជាប្រព័ន្ធនោះមានការទទួលខុសត្រូវរួមទៅលើផ្នែកនៃគ្រប់ភាគីដែលពាក់ព័ន្ធ មិនមែនគ្រាន់តែពាំនាំកង្វល់របស់អង្គការសហប្រជាជាតិ ដែលទាក់ទងនឹងការរំលោភសិទ្ធិមនុស្សយ៉ាងធ្ងន់ធ្ងរនោះទេ។
ការរិះគន់ខ្លះរបស់អង្គការសហប្រជាជាតិ បានផ្តោតទៅលើការចោទប្រកាន់ថា អតីតអ្នកសម្របសម្រួលនៅក្នុងស្រុកលោក Renata Lok-Dessallien បាននិយាយសម្រាលអំពីស្ថានភាពនៃការធ្វើបាបជនរ៉ូហ៊ីងយ៉ាយ៉ាងធ្ងន់ធ្ងរនោះ៕ AFP/SK
