ក្រុងរ៉ូមៈ ស្នងការជាន់ខ្ពស់អង្គការសហប្រជាជាតិ លោក Filippo Grandi កាលពីថ្ងៃសុក្រ បានអំពាវនាវឲ្យបង្កើតយន្តការច្បាស់លាស់មួយសម្រាប់ប្រទេសនៅអឺរ៉ុប ចែករំលែកបន្ទុកនៃក្រុមជនចំណាកស្រុកដែលត្រូវបានជួយសង្រ្គោះនៅសមុទ្រ ប្រសើរជាងធ្វើការទៅលើសំណុំរឿងមួយដោយផ្អែកតែទៅលើមូលដ្ឋានតែមួយនោះ។
ប្រមុខនៃឧត្តមស្នងការទទួលបន្ទុកជនភៀសខ្លួន អ.ស.ប.បានថ្លែងប្រាប់សន្និសីទសារព័ត៌មានមួយ ក្រោយពីកិច្ចពិភាក្សារយៈពេល ២ ថ្ងៃជាមួយក្រុមអាជ្ញាធរនៅក្នុងប្រទេស អ៊ីតាលី របស់លោកថា អ្នកដែលបានមកដល់ត្រូវបាន បែងចែកគ្នានៅទូទាំងអឺរ៉ុប និងយើងត្រូវតែមានយន្តការមួយច្បាស់លាស់។
ប្រទេសអ៊ីតាលី បានបិទកំពង់ផែជាច្រើនចំពោះអង្គការ NGOs ដែលបានជួយសង្រ្គោះ ក្រុមជនចំណាកស្រុកនៅក្នុងមហាសមុទ្រមេឌីទែរ៉ាណេ និង មានការស្ទាក់ស្ទើរក្នុងការទទួលយកអ្នកទាំងឡាយណាដែលបានមកដល់ឆ្នេរសមុទ្រនេះដោយទូកឬនាវាផ្ទាល់របស់ពួកគេ ដោយបានបង្កើតឲ្យមានលក្ខខណ្ឌទទួលយកអ្នកដែលមកដល់ ត្រូវបានចែកទៅឲ្យបណ្តាប្រទេសនៅអឺរ៉ុប។
លោក Grandi បានថ្លែងថា៖ «យើងមិននិយាយអំពីតួលេខមិនគួរឲ្យទុកចិត្តនោះទេ ប្រសិនបើប្រទេសលីប៊ី អាចដោះស្រាយបញ្ហាជនភៀសខ្លួនមួយលាននាក់ ហើយអឺរ៉ុបអាចគ្រប់គ្រងជនចំណាកស្រុករាប់ម៉ឺននាក់»។
លោកបានបន្ថែមថា ចន្លោះពី ៨០ ទៅ ៩០ ភាគរយនៃជនភៀសខ្លួន ៦៨ លាននាក់ស្ថិតនៅក្នុងបណ្តា ប្រទេសក្រីក្រ៕