.jpg)
លោកស្រីនីកគី ហាលី ថ្លែងនៅក្រសួងការបរទេសក្នុងរដ្ឋធានីវ៉ាស៊ីនតោន។ AFP
ក្រុងវ៉ាស៊ីនតោនៈ អាមេរិកបានប្រកាសដកខ្លួនចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃអង្គារ ដោយបានថ្កោលទោសចំពោះភាពមិនស្មោះត្រង់របស់ក្រុមសមាជិកអង្គការនេះ និងតាមការចោទប្រកាន់ ជំរុញឲ្យប្រឆាំងជំទាស់នឹងអ៊ីស្រាអែលឥតឈប់ឈរ។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី នីកគី ហាលី បានមកកាន់ក្រុងវ៉ាស៊ីនតោនដើម្បីប្រកាសសេចក្តីសម្រេចរួមជាមួយ អ្នកការទូតកំពូលរបស់លោក ប្រធានាធិបតី ដូណាល់ ត្រាំ គឺលោករដ្ឋមន្ត្រីការបរទេស Mike Pompeo។
អ្នកការទូត កំពូលទាំង ២ រូប បានបញ្ជាក់ថា អាមេរិកនឹងនៅតែជាអ្នកគាំទ្រសិទ្ធិមនុស្សឈានមុខគេ ប៉ុន្តែសម្រាប់មនុស្សជាច្រើន សេចក្តីសម្រេចនេះ នឹងបង្ហាញពីភាពជាសត្រូវទូទៅរបស់លោកត្រាំ ចំពោះអង្គការពិភពលោកមួយនេះនិងចំពោះកិច្ចការទូតទ្វេភាគីជាទូទៅដែរ។
សេចក្តីប្រកាសនោះ បានកើតឡើង ក្រោយពីមន្ត្រីសិទ្ធិមនុស្សអង្គការសហប្រជាជាតិបានរិះគន់ក្រុងវ៉ាស៊ីនតោនចំពោះការបំបែកកូនៗរបស់ជនចំណាកស្រុកចេញពីឪពុកម្តាយរបស់ពួកគេ ដែលបាន និងកំពុងស្វែងរកសិទ្ធិជ្រកកោន ក្រោយពីឆ្លងពីម៊ិកស៊ិកចូលប្រទេសនេះ។
ប៉ុន្តែ លោកស្រីហាលី និងលោក Pompeo បានបញ្ជាក់ថា សេចក្តីសម្រេចនេះត្រូវបានធ្វើឡើង ក្រោយពីកិច្ចប្រឹងប្រែងរយៈពេល ១ ឆ្នាំ ដើម្បីជំរុញឲ្យក្រុមប្រឹក្សានេះធ្វើការកែទម្រង់ និងដកចេញនូវរដ្ឋជាសមាជិក ដែលបានរំលោភបំពានលក្ខខណ្ឌនានានោះ។
លោកបានថ្លែងថា៖ «កំណែទម្រង់ទាំងនោះ ត្រូវការជាចាំបាច់ដើម្បីធ្វើឲ្យក្រុមប្រឹក្សានេះក្លាយជាអ្នកគាំទ្រសិទ្ធិមនុស្សដ៏ខ្លាំងក្លាមួយ»។ «អស់រយៈពេលជាយូរមកហើយក្រុមប្រឹក្សាសិទ្ធិមនុស្សនេះ គឺជាអ្នកការពារចំពោះអ្នករំលោភសិទ្ធិមនុស្ស និងក្រុមលម្អៀងនយោបាយ។ គួរឲ្យសោកស្តាយណាស់ ឥឡូវនេះវាពិតជាបង្ហាញយ៉ាងច្បាស់ណាស់ថា ការអំពាវនាវរបស់យើងឲ្យមានការកែទម្រង់ មិនចាំបាច់ទេ»៕
