ក្រុងម៉ិកស៊ីកូៈ រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ កាលពីថ្ងៃអាទិត្យ បានអរគុណសមភាគីម៉ិកស៊ិករបស់លោក អំពីការបង្កើនការអនុវត្តច្បាប់ជនអន្តោប្រវេសន៍របស់ប្រទេសមួយនេះ ដែលលោកបានថ្លែងថា កំពុងនាំឲ្យចំនួនជនចំណាកស្រុកតិចតួចចូលទៅអាមេរិក។
ក្រោយមក លោក ប៉ុមប៉េអូ បានធ្វើដំណើរទៅកាន់ប្រទេស អែលសាល់វ៉ាឌ័រ ដើម្បីជួបជាមួយលោកប្រធានាធិបតី ណាយីប បូគីលី ដោយភាគីទាំង ២ បានប្តេជ្ញាធ្វើការងាររួមគ្នាលើបញ្ហាជនអន្តោប្រវេសន៍។
ជំនួបរបស់អ្នកការទូតកំពូលអាមេរិកនៅក្រុងម៉ិកស៊ីកូ បានបញ្ជាក់អះអាងថា ការទំនាក់ទំនងរវាងក្រុងវ៉ាស៊ីនតោន និងក្រុងម៉ិកស៊ីកូ បានធ្លាក់់ចុះគួរឲ្យកត់សម្គាល់ ចាប់តាំងពីដើមខែមិថុនា នៅពេលប្រធានាធិបតីអាមេរិក លោក ដូណាល់ ត្រាំ បានគំរាមយកពន្ធពាណិជ្ជកម្មនាំចូលថ្មីប្រឆាំងប្រទេសជិតខាងភាគខាងត្បូងអាមេរិក ប្រសិនបើប្រទេសនោះមិនបានជួយទប់ស្កាត់លំហូរនៃជនចំណាកស្រុកឲ្យមានប្រសិទ្ធភាពទេនោះ។
លោក ប៉ុមប៉េអូ នៅក្នុងទីក្រុងម៉ិកស៊ីកូ កាលពីថ្ងៃអាទិត្យ បានជួបជាមួយរដ្ឋមន្ត្រីការបរទេសលោក ម៉ាស៊ីឡូ អេប្រាដ នៅក្នុងដំណើរទស្សនកិច្ចប្រចាំតំបន់ ដែលបានចាប់ផ្តើមនៅប្រទេស អាហ្សង់ទីន និងប្រទេស អេក្វាទ័រ។
ក្រសួងការបរទេសនោះបានថ្លែងថា៖ «លោករដ្ឋមន្ត្រី ប៉ុមប៉េអូ បានអរគុណលោករដ្ឋមន្ត្រី អេប្រាដ ចំពោះកិច្ចខិតខំប្រឹងប្រែងបង្កើនការអនុវត្ត ច្បាប់អន្តោប្រវេសន៍របស់ប្រទេស ម៉ិកស៊ិក»។
ដោយថ្លែងនៅក្នុងប្រទេស អែលសាល់វ៉ាឌ័រ លោក ប៉ុមប៉េអូ បានថ្លែងថា ប្រទេស ម៉ិកស៊ិក បាន «ធ្វើឲ្យរីកចម្រើនយ៉ាងពិតប្រាកដ» ទៅលើជនចំណាកស្រុកទាំងនោះ។
លោក ប៉ុមប៉េអូ បានថ្លែងប្រាប់នៅក្នុងសន្និសីទសារព័ត៌មានមួយនៅក្រុង សាន់សាល់វ៉ាឌ័រថា៖ «ចំនួនជនអន្តោប្រវេសន៍ បានធ្លាក់ចុះគួរឲ្យកត់សម្គាល់ ហើយមានការព្រួយបារម្ភតិចតួច ដែលបានកើតឡើងនៅពេលបច្ចុប្បន្ន នៅតាមព្រំដែនភាគខាងត្បូង ប៉ុន្តែយើងត្រូវធ្វើដំណើរវែងឆ្ងាយតទៅទៀត ដែលនៅមិនទាន់ទៅដល់គោលដៅនៅឡើយ គឺនៅមានការងារជាច្រើនដែលត្រូវធ្វើបន្ថែមទៀត»។
រដ្ឋមន្ត្រីការបរទេសម៉ិកស៊ិកបានថ្លែងថា ជំនួបរវាងលោក អេប្រាដ និងលោក ប៉ុមប៉េអូ បានផ្តោតជាពិសេសទៅលើជនអន្តោប្រវេសន៍ ដោយបានរាប់បញ្ចូលកិច្ចពិភាក្សាអំពីការរឹបអូសយកទ្រព្យសម្បត្តិរបស់លោក ជូគីន អែលឆាប៉ូ ហ្គូម៉ាន់ ជាឈ្មួញជួញដូរគ្រឿងញៀនខុសច្បាប់ដ៏ល្បីឈ្មោះម្នាក់ ដែលបានកាត់ទោសឲ្យជាប់ពន្ធនាគារអស់មួយជីវិតនៅអាមេរិក និងស្ថានការណ៍នៃកិច្ចព្រមព្រៀងពាណិជ្ជកម្មនៅអាមេរិកខាងជើង នៅមិនទាន់បានអនុម័តនៅឡើយទេ»។
សេចក្តីថ្លែងការណ៍ប្រទេស ម៉ិកស៊ិក បានថ្លែងថា លោក ប៉ុមប៉េអូ ទទួលស្គាល់ថា មានការរីកចម្រើនគួរឲ្យកត់សម្គាល់លើបញ្ហាចំណាកស្រុក ចាប់តាំងពីមានជំនួបនៅក្រុងវ៉ាស៊ីនតោនមក៕ AFP/SK