ក្រុងរីយោដឺហ្សេនេរ៉ូ៖ ដោយមនុស្សជិត ៣ ម៊ឺននាក់ស្លាប់ នៅប្រទេសប្រេស៊ីល និងជាង ១ ម៊ឺននាក់ស្លាប់ នៅក្នុងម៊ិកស៊ិកវីរុសរាតត្បាតកូរ៉ូណាប្រភេទថ្មី គំរាមបំផ្លាញប្រព័ន្ធមន្ទីរពេទ្យនៅទូទាំងអាមេរិកឡាទីន ខណៈប្រទេសបារាំង ដែលកំពុងចាកចេញពីស្ថានភាពអាក្រក់កាលពីថ្ងៃអង្គារ បានចាប់ផ្តើមវិលត្រឡប់ទៅរកភាពធម្មតាឡើងវិញហើយ។
លោកប្រធានគ្រប់គ្រងស្ថានភាពគ្រាអាសន្នរបស់អង្គការសុខភាពពិភពលោក (WHO) មីឆែល រីអាន បានថ្លែងថា ប្រទេស ៤ ក្នុងចំណោម ១០ ដែលបានបង្ហាញចំនួនករណីឆ្លងកូវីដ ១៩ ថ្មីច្រើនជាងគេបំផុតក្នុងរយៈពេល ២៤ ម៉ោងចុងក្រោយនេះ គឺនៅក្នុងអាមេរិកឡាទីន។
ជំងឺរាតត្បាតនៅពេលបច្ចុប្បន្ននេះបានបង្កឲ្យមនុស្សជាង ៣៧៧ ០០០ នាក់ស្លាប់ និងបានឆ្លងទៅមនុស្សយ៉ាងតិច ៦,៣ លាននាក់ ចាប់តាំងពីផ្ទុះឡើងដំបូងនៅក្នុងប្រទេសចិន កាលចុងឆ្នាំ ២០១៩។ កិច្ចខិតខំប្រឹងប្រែងជាច្រើន ដើម្បីបញ្ឈប់ជំងឺរាតត្បាតនេះដោយបានការរឹតបន្តឹងទៅលើជីវិតប្រចាំថ្ងៃ បានធ្វើឲ្យសេដ្ឋកិច្ចធ្លាក់ចុះយ៉ាងខ្លាំង។
ទោះបីជាយ៉ាងណា ក៏នៅអឺរ៉ុបសាលារៀន អាងហែលទឹក រង្គសាល និងកន្លែងទេសចរណ៍ជាច្រើន បានចាប់ផ្តើមបើកឡើងវិញ ដោយផ្គើននឹងការព្រមានដែលថា ការធ្វើបែបនេះអាចបង្កឲ្យមានរលកឆ្លងរាលដាលទី ២។
អាមេរិកជាទីដែលជំងឺរាតត្បាតនេះត្រូវគ្របដណ្តប់ដោយភាពចលាចលបន្ទាប់ពីការស្លាប់របស់បុរសស្បែកខ្មៅម្នាក់នៅក្នុងកណ្តាប់របស់ដៃប៉ូលិសស្បែកសម្នាក់ នៅតែជាប្រទេសដែលរងការប៉ះពាល់អាក្រក់បំផុត។
ប៉ុន្តែករណីឆ្លងវីរុសកូរ៉ូណាប្រភេទថ្មីនេះ កំពុងរាលដាលយ៉ាងឆាប់រហ័សនៅអាមេរិកឡាទីន។ ប្រទេសប្រេស៊ីល ប៉េរូ ស៊ីលី និងម៊ិកស៊ិក កំពុងជួបប្រទះការកើនឡើងប្រចាំថ្ងៃច្រើនបំផុត ខណៈចំនួនឆ្លងនោះ កំពុងកើនឡើងនៅក្នុងប្រទេសអាហ្សង់ទីន បូលីវី កូឡុំប៊ី និងប្រទេសហៃទី។
លោក រីអាន បានថ្លែងនៅសន្និសីទសារព័ត៌មានពីក្រុងហ្សឺណែវថា៖ «ប្រទេសជាច្រើនកំពុងប្រឹងប្រែងធ្វើការ ដើម្បីដឹងពីទំហំនៃការឆ្លងហើយប្រព័ន្ធសុខាភិបាលចាប់ផ្តើមប៉ះពាល់នៅទូទាំងតំបន់នេះ»។
អាមេរិកឡាទីន បានធ្វើតេស្តរកឃើញអ្នកឆ្លងវីរុសកូរ៉ូណាជាង ១ លាននាក់ និងបានកត់ត្រាអ្នកស្លាប់ជាង ៥ ម៊ឺននាក់។ ប្រទេសប្រេស៊ីល បានរាយការណ៍ថា មានអ្នកឆ្លងជាងពាក់កណ្តាលនៃករណីឆ្លងនោះ និង ៦០ ភាគរយនៃចំនួនអ្នកស្លាប់នោះដែរ។
ទោះបីជាយ៉ាងណាក៏ដោយ ក៏អភិបាលក្រុងរីយោដឺហ្សេនេរ៉ូ បានប្រកាសកាលពីថ្ងៃចន្ទថា ក្រុងទេសចរណ៍ដ៏ពេញនិយមនេះ នឹងចាប់ផ្តើមបន្ធូរបន្ថយវិធានការបិទជាបណ្តើរៗដោយចាប់ផ្តើមកាលពីថ្ងៃអង្គារ គឺចាប់ផ្តើមបើកកន្លែងគោរពបូជា និងកន្លែងហែលទឹកឡើងវិញ។
ប្រទេសម៊ិកស៊ិក ក៏បានចាប់ផ្តើមបើកឡើងវិញកាលពីថ្ងៃចន្ទ ដោយធ្វើឲ្យឧស្សាហកម្មរថយន្ត វ៉ែ និងសំណង់ដំណើរការឡើងវិញ ថ្វីបើប្រទេសនេះ បានកត់ត្រាថា មានអ្នកស្លាប់ជាង ១ ម៊ឺននាក់ក្តី៕ AFP/PSA