.jpg)
អ្នកដំណើរដែលពាក់ម៉ាស់ដើរឆ្លងកាត់ស្ថានីយរថភ្លើងក្រោមដីនៅក្នុងក្រុងប៉េកាំងកាលពីថ្ងៃទី ១៥ ខែមិថុនា។ AFP
ក្រុងប៉េកាំង៖ ប្រទេសចិន កាលពីថ្ងៃអង្គារបានរាយការណ៍អំពីករណីឆ្លងវីរុសកូរ៉ូណាក្នុងតំបន់ចំនួន ២៧ នាក់ នៅក្នុងក្រុងប៉េកាំង ជាទីដែលក្រុមឆ្លងថ្មីនេះ មានទំនាក់ទំនងជាមួយនឹងផ្សារលក់ម្អូបអាហារបោះដុំមួយ បានធ្វើឲ្យអង្គការសុខភាពពិភពលោក (WHO) ព្រួយបារម្ភ និងជំរុញឲ្យមានកម្មវិធីតាមដាន និងធ្វើតេស្តទ្រង់ទ្រាយធំ។
ករណីឆ្លងថ្មីនេះ បាននាំឲ្យចំនួនអ្នកឆ្លងដែលត្រូវបានបញ្ជាក់អះអាងនៅក្នុងរដ្ឋធានីរយៈពេល ៥ ថ្ងៃកន្លងទៅនេះកើនឡើងដល់ ១០៦ នាក់ ខណៈមន្ត្រីក្រុងនេះបានបិទសហគមន៍ជិត ៣០ នៅក្នុងក្រុងនេះ និងបានធ្វើតេស្តមនុស្សរាប់ម៊ឺននាក់។
ទូរទស្សន៍របស់រដ្ឋបានរាយការណ៍ថា អាជ្ញាធរបានបិទផ្សារ ១ ទៀតកាលពីថ្ងៃអង្គារគឺផ្សារ Tiantaohonglian នៅក្នុងសង្កាត់ Xicheng ភាគកណ្តាល ក្រោយពីបុគ្គលិកម្នាក់នៅទីនោះ ត្រូវបានធ្វើតេស្តរកឃើញថា បានឆ្លងជំងឺកូវីដ ១៩។
ផ្ទះជាច្រើននៅជុំវិញផ្សារនោះ ក៏ត្រូវបានបិទដែរ។
អង្គការសុខភាពពិភពលោកបានថ្លែងថា ក្រុមឆ្លងថ្មីនេះ គឺជាមូលហេតុនាំឲ្យមានការព្រួយបារម្ភចំពោះទំហំ និងសកម្មភាពទំនាក់ទំនងនៅក្នុងក្រុងប៉េកាំង។
លោកប្រធានគ្រប់គ្រងគ្រាអាសន្នរបស់ WHO មីឆែល រីអាន បានថ្លែងថា៖ «ក្រុមមួយឆ្លងបែបនេះ គឺជាកង្វល់មួយ និងការឆ្លងនេះ ត្រូវការឲ្យមានការស៊ើបអង្កេត និងគ្រប់គ្រងឲ្យបានត្រឹមត្រូវ និងនោះ គឺជាអ្វីដែលអាជ្ញាធរចិនកំពុងធ្វើយ៉ាងពិតប្រាកដ»។
មន្ត្រីក្រុងប៉េកាំងបាននិយាយថា ពួកគេនឹងធ្វើតេស្តម្ចាស់ និងអ្នកគ្រប់គ្រងហាងនៅតាមផ្សារម្ហូបអាហារ នៅក្នុងក្រុងនេះ និងកង់ទីនរបស់ទីភ្នាក់ងាររបស់រដ្ឋាភិបាល។
កន្លែងលេងកីឡា និងកន្លែងកម្សាន្តនានានៅក្នុងក្រុងនេះដែរ ត្រូវបានបញ្ជាឲ្យបិទកាលពីថ្ងៃចន្ទ និងក្រុងខ្លះទៀតនៅទូទាំងប្រទេសចិន បានព្រមានថា ពួកគេនឹងដាក់អ្នកមកពីក្រុងប៉េកាំង ឲ្យនៅដាច់ដោយឡែកពីគេ។
គណៈកម្មការសុខភាពជាតិក៏បានរាយការណ៍ករណីឆ្លងនៅក្នុងស្រុកថ្មីចំនួន ៤ នាក់ នៅក្នុងខេត្តហឺប៊ី ដែលនៅជុំវិញក្រុងប៉េកាំង។
មន្ត្រីបាននិយាយកាលពីថ្ងៃអាទិត្យថា ករណីឆ្លងថ្មីទាំងអស់នេះទាក់ទងទៅនឹងផ្សារ Xinfadi ដែលមនុស្ស ២០ ម៊ឺននាក់ បានទៅលេងផ្សារនេះចាប់តាំងថ្ងៃទី ៣០ ឧសភា មក។
អ្នកធ្វើការ ៨ ពាន់នាក់ មកពីផ្សារនេះ ត្រូវបានធ្វើតេស្តហើយត្រូវបញ្ជូនទៅកាន់អគារដាក់ឲ្យដាច់ដោយឡែក។
រហូតមកទល់មានការផ្ទុះឆ្លងថ្មីៗនេះ ភាគច្រើននៃករណីឆ្លងក្នុងប៉ុន្មានខែថ្មីៗនេះ គឺជាជនជាតិចិន ដែលវិលត្រឡប់មកស្រុកកំណើតវិញ ខណៈវីរុសរាតត្បាតនេះ បានរាលដាលទៅដល់ប្រទេសផ្សេងៗនៅលើពិភពលោក៕ AFP/PSA
