.jpg)
លោកប្រធានអង្គការ WHO តេ្រដូស អាដហាណូម ហ្គឺប្រីយេស៊ុស ថ្លែងពាក់ព័ន្ធការប្រយុទ្ធប្រឆាំងជំងឺកូវីដ ១៩។ AFP
ក្រុងអ៊ីស្លាម៉ាបាដ៖ មន្ត្រីម្នាក់បានថ្លែងកាលពីថ្ងៃអង្គារថា អង្គការសុខភាពពិភពលោក (WHO) បានប្រាប់ប្រទេសប៉ាគីស្ថាន ថា ពួកគេគួរតែអនុវត្តការបិទប្រទេស ដើម្បីប្រយុទ្ធប្រឆាំងការកើនឡើងនៃការឆ្លងវីរុសកូរ៉ូណា ដែលកើតឡើង ខណៈប្រទេសនេះបន្ធូរបន្ថយការបិទ។
ចាប់តាំងពីការផ្ទុះឆ្លងរាលដាលវីរុសនេះ នៅក្នុងប្រទេសប៉ាគីស្ថាន នៅក្នុងខែមីនា លោកនាយករដ្ឋមន្ត្រី អ៊ីមរ៉ាន់ ខាន់ បានប្រឆាំងជំទាស់នឹងការបិទទូទាំងប្រទេស ដែលត្រូវបានគេមើលឃើញធ្វើដូចគ្នា នៅកន្លែងផ្សេងទៀត ដោយបានបញ្ជាក់ថា ប្រទេសដ៏ក្រីក្រនេះ មិនអាចទប់ស្កាត់ការឆ្លងនេះបានទេ។
ជំនួសមកវិញ ខេត្តចំនួន ៤ របស់ប្រទេសប៉ាគីស្ថាន បានបញ្ជាឲ្យបិទ ប៉ុន្តែកាលពីសប្តាហ៍មុននេះលោក ខាន់ បានថ្លែងថាការបិទភាគច្រើននោះ នឹងត្រូវដកវិញ។
ការសម្រេចនេះ បានកើតឡើង ខណៈអត្រានៃការឆ្លងវីរុសផ្លូវដង្ហើមនៅប៉ាគីស្ថានកាន់តែធ្ងន់ធ្ងរឡើង ខណៈវីរុសនេះបានឆ្លងរាលដាលទូទាំងអាស៊ីខាងត្បូង ដែលរហូតមកពេលថ្មីៗនេះ បានបណ្តាលឲ្យមនុស្សជាច្រើនស្លាប់ នៅបណ្តាប្រទេសលោកខាងលិច។
មន្ត្រីសុខាភិបាលបានថ្លែងកាលពីថ្ងៃអង្គារថា ពួកគេបានកត់ត្រាចំនួនអ្នកឆ្លងវីរុសកូរ៉ូណា ១០៨ ៣១៧ នាក់ និងស្លាប់ ២ ១៧២ នាក់ ទោះបីជាការធ្វើតេស្តមានកំណត់ក្តី ថ្វីបើអត្រាពិតប្រាកដ ត្រូវបានគេគិតថាខ្ពស់ជាងនេះ ច្រើនណាស់។
មន្ត្រីសុខាភិបាល (ឆ្វេង) យកសំណាកឈាមពីបុរសម្នាក់ដើម្បីធ្វើតេស្ត។ AFP
នៅក្នុងលិខិតមួយច្បាប់ផ្ញើជូនរដ្ឋមន្ត្រីសុខាភិបាលខេត្តពុនចាប លោក យ៉ាសមីន រ៉ាស៊ីដ WHO បានថ្លែងថា រហូតមកទល់ពេលនេះប្រទេសប៉ាគីស្ថានមិនទាន់បានកំណត់លក្ខខណ្ឌណាមួយជាមុន ដើម្បីបើកប្រទេសឡើងវិញនោះទេ។
លិខិតនោះ បានបញ្ជាក់ថា ដោយសារប្រជាជនភាគច្រើនមិនបានអនុវត្តការផ្លាស់ប្តូរឥរិយាបថដូចជាការរក្សាគម្លាតពីគ្នានៅក្នុងសង្គម និងលាងដៃញឹកញាប់ជាដើម ការសម្រេចចិត្តដ៏លំបាកទាំងអស់នេះ នឹងតម្រូវឲ្យអនុវត្តនៅក្នុងនោះមានការបិទនៅក្នុងតំបន់គោលដៅមួយចំនួន នៅក្នុងប្រទេសប៉ាគីស្ថាន។
អង្គការសុខភាពពិភពលោកក៏បានណែនាំឲ្យបិទ ២ សប្តាហ៍ ហើយបើក ២ សប្តាហ៍ នៅតាមកន្លែងខ្លះ។
លោក រ៉ាស៊ីដ បានថ្លែងប្រាប់អ្នកសារព័ត៌មានកាលពីថ្ងៃអង្គារ ខណៈបញ្ជាក់ពីការទទួលលិខិតកាលពីថ្ងៃទី ៧ ខែមិថុនា ថា៖ «លិខិតរបស់ WHO បានបង្ហាញពីសារៈសំខាន់នៃការអនុវត្តតាមនីតិវិធីប្រតិបត្តិការមានស្តង់ដា (SOPs) និងរដ្ឋាភិបាលខេត្តពុនចាបក៏ចេញបទបញ្ជាឲ្យចាត់វិធានការតឹងរ៊ឹងប្រឆាំងអ្នកដែលបំពាន SOPs៕ AFP/PSA
