.jpg)
សកម្មភាពប្រកួតកង់ភ្នំ ជុំទី ៤ នៅភ្នំប្រសិទ្ធិ៍ កាលពីឆ្នាំ ២០១៨។ រូបថត ឈន ណន
ភ្នំពេញ៖ ព្រឹត្តិការណ៍ប្រកួតកង់ភ្នំ Cambodia MTB Series 2019 បានឈានដល់ការប្រកួតជុំទី ៤ ហើយ ដែលនឹងត្រូវធ្វើនៅព្រឹកថ្ងៃអាទិត្យ ទី ៣ ខែ វិច្ឆិកា ហើយជុំនេះគឺមានការប្រកួតស្វិតស្វាញកាន់តែខ្លាំង និងជក់ចិត្ត ព្រោះត្រូវធ្វើនៅបរិវេណភ្នំប្រសិទ្ធិ៍ ក្នុងខេត្តកំពង់ស្ពឺដែលមានផ្លូវបត់បែន ឡើងទួល ចុះទួលពោរពេញដោយឧបសគ្គ ជាងការប្រកួត ៣ ជុំកន្លងមក។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានប្រាប់ភ្នំពេញប៉ុស្តិ៍ថា៖ «ការប្រកួតជុំទី ១ នៅទីលានព្រែកលៀប ជុំទី ២ នៅខេត្តកែប និងជុំទី ៣ នៅភ្នំជាល ក្នុងខេត្តកំពង់ស្ពឺ កន្លងមកនេះ វាមិនសូវជាមានឧបសគ្គប៉ុន្មានទេ ប៉ុន្តែការប្រកួតជុំទី ៤ នៅភ្នំប្រសិទ្ធិ៍នេះ គឺមានឧបសគ្គខ្លាំងជាង ដោយសារជម្រាល និងទួល ដែលត្រូវឡើង គឺខ្ពស់ៗ និងអាចមានភាពរអិលផងដែរ អ៊ីចឹងការប្រកួតជុំទី ៤ នេះ នឹងមានភាពស្វិតស្វាញខ្លាំង ជាងការប្រកួត ៣ ជុំកន្លងមក»។
តាមគណៈកម្មការរៀបចំការប្រកួតកង់ភ្នំនេះបានឲ្យដឹងថា ការទទួលការចុះឈ្មោះចូលរួមរបស់ក្រុមអត្តពលិក ត្រូវបានបិទកាលពីថ្ងៃព្រហស្បតិ៍ម្សិលមិញ ដោយមានអត្តពលិកប្រមាណ ១៥០ នាក់ បានចុះឈ្មោះចូលរួមប្រកួត គឺប្រហាក់ប្រហែលគ្នា ទៅនឹងការប្រកួត ជុំទី ៤ កាលពីឆ្នាំ ២០១៨ ដែរ ហើយអ្នកទាំងនេះ ត្រូវបានបែងចែកការប្រកួតទៅតាមប្រភេទអាយុ និងវិញ្ញាសាប្រកួតផ្សេងៗទៅតាមការកំណត់របស់សហព័ន្ធខ្មែរកីឡាទោចក្រយាន។
ជាមួយគ្នានេះ ការប្រកួតនៅលើទីលាន ដែលមានឧសគ្គច្រើន ក្នុងជុំទី ៤ នេះ ត្រូវបានលោក នូ ចំរើន ចាត់ទុកថាជាការប្រកួតសាកល្បង និងដកស្រង់បច្ចេកទេសយ៉ាងសំខាន់ទៅដល់ក្រុមអត្តពលិកកង់ភ្នំកម្ពុជា ក្នុងការពង្រឹងសមត្ថភាពបន្ថែម ពិសេសកីឡាករ ហួត លយរស្មី និងតាំង សីហា ដែលនឹងត្រូវចូលរួមការប្រកួតកង់ភ្នំ ក្នុងព្រឹត្តិការណ៍កីឡាស៊ីហ្គេម នៅប្រទេស ហ្វីលីពីន ពីថ្ងៃទី ៣០ ខែ វិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩ ខាងមុខនេះ។
អគ្គលេខាធិការថ្មីថ្មោង លោក នូ ចំរើន បានបន្ថែមថា៖ «តាមរយៈការឆ្លងកាត់ឧបសគ្គច្រើនបែបនេះ វានឹងជួយឲ្យកីឡាកររបស់យើងទាំង ២ នាក់ ទទួលបានបទពិសោធកាន់តែច្រើន និងមានភាពសមកាន់តែខ្លាំងទៅ នឹងការប្រកួត ដែលមានស្ថានភាពផ្លូវលំបាកបែបនេះ ព្រោះការប្រកួតកង់ភ្នំនៅស៊ីហ្គេម ក៏មានស្ថានភាពផ្លូវលំបាកបែបនេះដែរ»។
លោកបានបញ្ជាក់ថា៖ «ការប្រកួតនេះ វាជាពេលដែលពួកគាត់ បានវាស់ស្ទង់នូវកម្រិតបច្ចេកទេស ចំពោះការខិតខំហ្វឹកហាត់ប៉ុន្មានខែមកនេះ ដើម្បីយើងអាចដឹងថា តើពួកគាត់នៅខ្វះខាតចំណុចណាទៀត ដែលយើងត្រូវបំពេញបន្ថែម មុននឹងពួកគាត់ទៅចូលរួមការប្រកួតស៊ីហ្គេម នៅហ្វីលីពីន៕
