.jpg)
លោក ជា ប៊ុនហេង ពេលឡើងបំពាក់មេដាយ និងផ្តល់រង្វាន់ដល់ម្ចាស់ជយលាភី។ ពន្លក
ភ្នំពេញៈ ការប្រកួតកីឡាវាយកូនឃ្លីលើតុពានរង្វាន់សម្ដេចក្រឡាហោម ស ខេង លើកទី ៣ ប្រចាំឆ្នាំ ២០១៩ ដែលបានធ្វើឡើងចំនួន ៣ ថ្ងៃនៅក្លិបកីឡាអលស្តារ សង្កាត់បឹងត្របែក រាជធានីភ្នំពេញនោះបានបញ្ចប់កាលពីថ្ងៃចន្ទ ម្សិលមិញ ខណៈក្រុមអត្តពលិករបស់សមាគមក្រសួងមហាផ្ទៃដណ្តើមបានមេដាយច្រើនជាងគេ។
តាមរបាយការណ៍របស់លោកឧត្តមសេនីយ៍ឯក ជា ប៊ុនហេង អគ្គខាធិការក្រុមប្រឹក្សាកីឡាក្រសួងមហាផ្ទៃ និងជាប្រធានអង្គភាពកីឡាអគ្គស្នងការនគរបាលជាតិកម្ពុជាបានឲ្យដឹងថា ព្រឹត្តិការណ៍ប្រកួតនៅឆ្នាំនេះមានកីឡាករ កីឡាការិនីចូលរួមចំនួន ១០៩ នាក់ (ស្រី ៩ នាក់) គឺមានចំនួនច្រើនជាងការប្រកួតជើងឯកថ្នាក់ជាតិប្រចាំឆ្នាំកន្លងមក។
ទាក់ទងទៅនឹងការប្រកួតនេះលោក ជា ប៊ុនហេង បានបញ្ជាក់ថា៖ «ការប្រកួតកីឡាវាយកូនឃ្លីលើតុពានរង្វាន់សម្ដេចក្រឡាហោម ស ខេង លើទី ៣ ប្រចាំឆ្នាំ ២០១៩ នេះគឺធ្វើឡើងដើម្បីអបអរសាទរខួបជ័យជម្នះលើកទី ៤០ នៃថ្ងៃរំដោះ ៧ មករា ឆ្នាំ ១៩៧៩-២០១៩ ហើយព្រឹត្តិការណ៍នេះមានអត្តពលិក ១០៩ នាក់ចូលរួមដោយពួកគេលេងតំណាងឲ្យក្លិបចំនួន ១១ មកពីទូទាំងប្រទេសកម្ពុជា»។
អត្តពលិកតំណាងក្លិបទាំង ១១ ដែលបានចូលរួមនៅក្នុងការប្រកួតកីឡាវាយកូនឃ្លីលើតុពានរង្វាន់ ស ខេង លើកទី ៣ ឆ្នាំ ២០១៩ នេះគឺពួកគេត្រូវប្រកួតប្រជែងនៅលើវិញ្ញាសាប្រកួតចំនួន ៦ រួមមានប្រកួតវាយ ឯកត្តជនអាយុ ៥០ ឆ្នាំឡើងអាយុក្រោម ៥០ ឆ្នាំអាយុក្រោម ៣០ ឆ្នាំ និងវាយឯកត្តជននារី ព្រមទាំងការប្រកួតវាយគូ និងប្រកួតវាយគូចម្រុះ។
តាមរយៈការប្រកួតយ៉ាងស្វិតស្វាញចំនួន ៣ ថ្ងៃនោះគឺក្រុមក្រសួងមហាផ្ទៃបានឈរនៅចំណាត់ថ្នាក់លេខ ១ ក្នុងនាមជាក្លិបដែលប្រជែងបានមេដាយច្រើនជាងគេ គឺមេដាយមាស ២ ប្រាក់ ៣ និងសំរឹទ្ធ ៣ ហើយតាមពីក្រោយដោយក្លិបអលស្តារដោយឈ្នះមេដាយមាស ២ ប្រាក់ ១ សំរឹទ្ធ ២ ក្លិបកីឡាមានជ័យឈ្នះបានមេដាយមាស ២ និងប្រាក់ ១ ។
ចំណែកក្លិបកីឡាស៊ីធីស្ពតឈ្នះមេដាយមាស ១ សំរឹទ្ធ ១ ក្លិបអគ្គស្នងការនគរបាលជាតិឈ្នះបានមេដាយមាស ១ និងក្លិបមកពីអង្គភាពអគ្គភ័ស្តុភារហិរញ្ញវត្ថុឈ្នះបានមេដាយប្រាក់ ១ ។ ចំពោះប្រាក់រង្វាន់ដែលទទួលបានពីការប្រកួតនេះគឺអ្នកឈ្នះមេដាយមាសបានចំនួន ១ លានរៀលមេដាយប្រាក់បាន ៦០ ម៉ឺនរៀល និងអ្នកឈ្នះមេដាយសំរឹទ្ធបានប្រាក់រង្វាន់ ១០ ម៉ឺនរៀល។
តាមផែនការសកម្មភាព និងចក្ខុវិស័យរបស់សហព័ន្ធកីឡាវាយកូនឃ្លីលើតុកម្ពុជាក៏ដូចជាអង្គភាពកីឡា ក្រសួងមហាផ្ទៃទាំងមូលគឺនៅមុនបុណ្យចូលឆ្នាំប្រពៃណីខ្មែរឆ្នាំ ២០១៩ នេះនឹងរៀបចំព្រឹត្តិការណ៍ប្រកួតយុវជនអាយុ ១៥ ឆ្នាំ និង ១៨ ឆ្នាំដើម្បីពង្រឹងសមត្ថភាពថ្នាក់ថ្នាលសម្រួចទៅប្រកួតកីឡាជាតិ និងស៊ីហ្គេមលើកទី ៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ៕
