ភ្នំពេញៈ សហព័ន្ធកីឡាអេឡិចត្រូនិកកម្ពុជា (E-Sport) បានចាប់ផ្ដើមពង្រីកការគ្រប់គ្រង និងទទួលចុះឈ្មោះក្លិបជាសមាជិកផ្លូវការស្របតាមច្បាប់កីឡាសហព័ន្ធជាតិ ខណៈកន្លងមកសហព័ន្ធកីឡាប្រភេទនេះគឺលេងតាមប្រព័ន្ធអនឡាញដែលមានការគ្រប់គ្រងដោយប្រយោល។
កាលពីព្រឹកថ្ងៃសៅរ៍ទី ៤ ខែឧសភា ឆ្នាំ ២០១៩ លោក លន់ សាមឌី អគ្គលេខាធិការសហព័ន្ធបានអញ្ជើញទៅប្រារព្ធពិធីទទួលស្គាល់ក្លិប MCT E-Sport តាមលក្ខណៈស្តង់ដារ និងបានបំពេញតាមលក្ខខណ្ឌល្អជាងគេដើម្បីឲ្យក្លាយជាសមាជិកពេញសិទ្ធិដំបូងគេក្នុងសហព័ន្ធ។
នៅក្នុងពិធីនោះលោក លន់ សាមឌី បានថ្លែងថាក្លិប MCT E-Spor បានបំពេញតាមលក្ខខណ្ឌគ្រប់គ្រាន់មានសក្តានុពល និងមានកីឡាករឆ្នើមៗដែលគេជឿទុកចិត្តថា មានលទ្ធភាពខ្ពស់ក្នុងការចេញទៅប្រកួតខ្នាតអន្តរជាតិ។
លោកបានបន្តថានៅមានក្លិបចំនួន ៥ ទៀតដែលកំពុងតែបំពេញលក្ខខណ្ឌឲ្យបានគ្រប់គ្រាន់ដើម្បីចូលជាសមាជិករបស់សហព័ន្ធជាបន្តបន្ទាប់។
ការពង្រីកគោលការណ៍ច្បាប់ ឬការគ្រប់គ្រងនេះគឺដើម្បីរួមចំណែកអភិវឌ្ឍវិស័យកីឡាទំនើបមួយនេះឲ្យកាន់តែរីកចម្រើន និងបណ្ដុះបណ្ដាលធនធានកីឡាកររួមទាំងថ្នាលសម្រាប់ការចូលរួមប្រកួតថ្នាក់ជាតិ និងលើឆាកអន្ដរជាតិជាពិសេសគឺត្រៀមខ្លួនឲ្យបានល្អក្នុងដំណើរឆ្ពោះទៅព្រឹត្តិការណ៍កីឡាស៊ីហ្គែមដែលព្រះរាជាណាចក្រកម្ពុជាធ្វើម្ចាស់ផ្ទះឆ្នាំ ២០២៣ ខាងមុខ។
លោកបញ្ជាក់ថា៖ «ថ្ងៃនេះយើងបានអនុម័តទទួលស្គាល់ក្លិប MCT E-Sport ជាសមាជិករបស់យើងបន្ទាប់ពីយើងមើលឃើញការអភិវឌ្ឍវិស័យកីឡា E-Sport កម្ពុជាមានការរីកចម្រើនខ្លាំងក្នុងកម្រិតថ្នាក់តំបន់។ ជាមួយគ្នានេះយើងត្រូវការការអភិវឌ្ឍធនធាន និងថ្នាលបណ្ដុះបណ្ដាលច្រើនដើម្បីចូលរួមការប្រកួតផ្សេងៗព្រោះបច្ចុប្បន្ននេះកីឡា E-Sport ត្រូវបានដាក់ទៅជាកីឡាកម្រិតតំបន់ដូចជាស៊ីហ្គេមមានកម្រិតនាំមុខគេ ហើយយើងសង្ឃឹមថា ក្លិប MCT នឹងក្លាយជាផ្នែកមួយដើម្បីរួមចំណែកដល់ការអភិវឌ្ឍ និងការហ្វឹកហាត់តាមរបៀបវារៈជាមួយសហព័ន្ធ» ។
លោកអគ្គលេខាធិការរូបនេះបានបន្ដទៀតថាក្លិប MCT ទើបជាក្លិបដំបូងប៉ុណ្ណោះដែលសហព័ន្ធបានទទួលស្គាល់ជាសមាជិកសហព័ន្ធជាមួយការចាប់ផ្ដើមទទួលចុះឈ្មោះក្លិបជាសមាជិកជាបន្ដបន្ទាប់ទៀត ដោយពិនិត្យទៅលើស្ថានភាពជាក់ស្ដែងរបស់ក្លិបនីមួយៗពិសេសត្រូវគោរពឲ្យបានដាច់ខាតតាមលក្ខខណ្ឌរបស់សហព័ន្ធឲ្យស្របតាមក្រសួងអប់រំ យុវជន និងកីឡា និងស្របតាមគោលការណ៍របស់គណៈកម្មាធិការជាតិអូឡាំពិកកម្ពុជាដែលក្នុងនោះមានបម្រាមដូចជា កីឡាករមិនត្រូវជក់បារី ឬប្រើប្រាស់គ្រឿងញៀន និងការជួញដូរផ្លូវភេទព្រមទាំងហាមមិនឲ្យធ្វើសកម្មភាពផ្សេងៗទៀតដែលប៉ះពាល់សង្គមជាដើម។
ទន្ទឹមនេះដែរលោកក៏បានជំរុញ និងលើកទឹកចិត្តក្លិបខាងលើបន្ដរៀបចំសកម្មភាព និងការប្រកួតផ្សេងៗដើម្បីចម្រាញ់បាននូវធនធានកីឡាករឆ្នើមៗ៕