.jpg)
លោក ហង់ ជួនណារ៉ុន ពេលថ្លែងក្នុងពិធីបិទកិច្ចប្រជុំបូកសរុបការងារអនុវិស័យអប់រំកាយ និងកីឡា។ ណន
ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានធ្វើការរិះគន់មិនចំមុខទៅដល់សហព័ន្ធកីឡាជាតិមួយចំនួនដែលនៅតែមានភាពអសកម្មក្នុងការពង្រឹងគុណភាពថ្នាក់ថ្នាលឲ្យបានល្អ និង មានវិជ្ជាជីវៈក្នុងការត្រៀមខ្លួនធ្វើជាម្ចាស់ផ្ទះស៊ីហ្គេម ឆ្នាំ ២០២៣ ប៉ុន្តែលោកហាក់នៅតែទុកមុខដល់សហព័ន្ធទាំងនោះដោយលោកមិនបង្ហាញឈ្មោះឲ្យចំៗចំពោះសហព័ន្ធទាំងនោះ ដើម្បីឲ្យសាធារណជនបានដឹងនោះទេ។
ថ្លែងនៅក្នុងពិធីបិទការប្រជុំបូកសរុបការងារអនុវិស័យអប់រំកាយ និងកីឡាក្នុងឆ្នាំ ២០១៧-២០១៨ និងលើកទិសដៅឆ្នាំ ២០១៩ នៅសណ្ឋាគារទន្លេបាសាក់ ២ កាលពីព្រឹកថ្ងៃអង្គារម្សិលមិញលោក ហង់ ជួនណារ៉ុន បានលើកឡើងថា៖ «សហព័ន្ធខ្លះគឺមាននៅក្នុងការប្រកួតស៊ីហ្គេម ប៉ុន្តែអ្វីដែលសហព័ន្ធកំពុងធ្វើគឺមិនទាន់បានឆ្លើយតបទេ។ ខ្ញុំអត់ចង់លើកចំឈ្មោះទេ ដើម្បីកុំឲ្យប៉ះពាល់ ប៉ុន្តែសហព័ន្ធខ្លួនឯងត្រូវដឹងថា ប្រសិនបើមិនពង្រឹងសហព័ន្ធខ្លួនឯង ហើយមិនពង្រីកក្លិបទៅកាន់ក្រសួង ឬខេត្ត-ក្រុងផ្សេងៗទេ គឺអត្តពលិកជ្រើសរើសបានមជ្ឈដ្ឋានតិចតួចប៉ុណ្ណោះ អ៊ីចឹងនឹងមិនអាចរកអ្នកដែលទៅប្រកួតនៅស៊ីហ្គេមបាននោះទេ»។
លោកបន្ថែមថា៖ «បើទោះបីជាសហព័ន្ធនោះមានឈ្មោះនៅស៊ីហ្គេម ប៉ុន្តែបើសហព័ន្ធរៀបចំខ្លួនមិនបានល្អ អ្នកហាត់ដដែលៗហើយអត់មានការផ្លាស់ប្តូរបទពិសោធជាមួយដៃគូនៅអន្តរជាតិ ដោយសារតែការរៀបចំរបស់យើងមិនបានល្អមិនមានការគាំទ្រ ហើយមិនដែលបញ្ជូនកីឡាករកីឡាការិនីទៅប្រកួតនៅក្រៅប្រទេសគឺមិនអាចមានការអភិវឌ្ឍបាននោះទេ»។
ជាមួយគ្នានេះលោករដ្ឋមន្ត្រីក៏បានក្រើនរំឭកដល់សហព័ន្ធដែលមានលទ្ធភាព តែបែរជានៅដេកលក់មិនបញ្ជូនអត្តពលិកទៅប្រកួតនៅក្រៅប្រទេសផងដែរ។ លោកថ្លែងថា៖ «ខ្ញុំសង្កេតឃើញថាសហព័ន្ធខ្លះមានប្រភេទកីឡាអាចចូលប្រកួតជាមួយគេបានទាំងនៅក្នុងស៊ីហ្គេម និងនៅអន្តរជាតិ ក៏ប៉ុន្តែក្នុងរយៈពេល ៥ ឆ្នាំនេះ ខ្ញុំមិនដែលឃើញសហព័ន្ធនោះបញ្ជូនអត្តពលិកទៅប្រកួតនៅក្រៅប្រទេសនោះឡើយ»។
មន្ត្រីកីឡាមកពីតាមបណ្តាខេត្ត ក្រុង ដែលចូលរួមក្នុងពិធីបូកសរុបការងារអនុវិស័យអប់រំកាយ និងកីឡា។ ណន
លោក ជួនណារ៉ុន បានបន្ថែមថា៖ «បើយើងមិនដែលបញ្ជូនអត្តពលិកទៅប្រកួតនៅក្រៅប្រទេស ឬមួយមិនដែលហាត់ហ្វឹកហ្វឺនបានជាប់លាប់ គ្មានការត្រួតពិនិត្យ ហើយទទួលតែថវិកាឧបត្ថម្ភ គឺយើងនឹងមិនអាចទទួលបានមេដាយនោះឡើយ ហេតុនេះយើងគួរតែមានប្រព័ន្ធលើកទឹកចិត្តថាអ្នកណាធ្វើគ្រាន់តែដើម្បីធ្វើ ហើយអ្នកណាធ្វើដើម្បីទទួលការអភិវឌ្ឍ»។
លោករដ្ឋមន្ត្រីបានសង្កត់ធ្ងន់ថា៖ «បើសិនជាគ្មានការលើកទឹកចិត្តទេ អ្នកដែលខំ ក៏ខំទៅ អ្នកដែលមិនខំ ក៏មិនខំទៅ ហើយជាលទ្ធផលគឺអត់បានអីនោះទេ អ៊ីចឹងសហព័ន្ធដែលខ្ញុំបាននិយាយនេះក៏គួរតែដឹងខ្លួនដែរ ព្រោះខ្ញុំឃើញថា សហព័ន្ធខ្លះមានសកម្មភាព តែសហព័ន្ធខ្លះទៀតនៅតែម្តុំតូច គឺសូម្បីតែនៅតាមខេត្តក៏អត់មានក្លិប ដោយមានតែក្លិប ២ ទៅ ៣ នៅភ្នំពេញ»។
លោករដ្ឋមន្ត្រី ហង់ ជួនណារ៉ុន បានចាត់ទុកភាពអសកម្មរបស់សហព័ន្ធកីឡាជាតិមួយចំនួនដែលបានលើកឡើងខាងលើថាជាបញ្ហាប្រឈមក្នុងការឆ្ពោះទៅទទួលបានជោគជ័យ សម្រាប់ការធ្វើជាម្ចាស់ផ្ទះការប្រកួតស៊ីហ្គេម ឆ្នាំ ២០២៣ នៅកម្ពុជាដែលត្រូវតែធ្វើការដោះស្រាយ និងរៀបចំផែនការឲ្យបានច្បាស់លាស់ចាប់ពីឆ្នាំនេះទៅ។
«យើងមើលឃើញច្បាស់តែម្តងថា ប្រភេទកីឡាដែលដណ្តើមបានមេដាយគឺកីឡាដែលមានសហព័ន្ធសកម្មផ្ទុយពីនេះប្រភេទកីឡាដែលត្រូវប្រើប្រាស់ ការហ្វឹកហាត់ខ្លាំង តែបើមិនដែលបានប្រកួតផង រឿងអីអាចនឹងបានមេដាយ។ នេះជាបញ្ហាប្រឈមរបស់យើងគឺដោយសារតែប្រព័ន្ធរបស់យើងនៅមិនទាន់មានវិជ្ជាជីវៈមានស្តង់ដាឲ្យបានត្រឹមត្រូវនៅឡើយ»។
លោក ជួនណារ៉ុន បានបញ្ជាក់ថា៖ «អ៊ីចឹងបើសិនជាយើងចង់បានការប្រកួតមួយប្រកបដោយវិជ្ជាជីវៈ និងបានមេដាយនៅស៊ីហ្គេមគឺយើងត្រូវចាប់ផ្តើមធ្វើឲ្យប្រភេទកីឡាទាំងនេះមានលក្ខណៈវិជ្ជាជីវៈ។ មានន័យថាការត្រៀមរៀបចំរបស់អគ្គនាយកដ្ឋានកីឡាគឺត្រូវតែពង្រឹងបន្ថែមទៀតរួមទាំងការបណ្តុះបណ្តាលធនធានមនុស្ស ហើយបែងចែកឲ្យបានត្រឹមត្រូវ ព្រោះយើងនៅសល់ពេល ៥ ឆ្នាំទៀតទេដល់ពេលធ្វើម្ចាស់ផ្ទះស៊ីហ្គេមហើយ»។
ឆ្នាំ ២០១៩ នេះយើងធ្វើឲ្យបានមែនទែន ទើបបាន ដូច្នេះខ្ញុំសូមឲ្យមានការប្រជុំ និងជជែកគ្នាបន្ថែមទៀតដើម្បីត្រៀម ហើយត្រូវមានផែនការច្បាស់លាស់ជាមួយនឹងប្រភេទកីឡានីមួយៗ និងសហព័ន្ធកីឡាជាតិ ដើម្បីដាក់ចេញនៅវិធានការលម្អិតក្នុងការអនុវត្តការងារពីឥឡូវនេះរហូតដល់ស៊ីហ្គេមឆ្នាំ ២០២៣។
តាមលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានប្រាប់ថានៅក្នុងឆ្នាំ ២០១៩ នេះ NOCC នឹងធ្វើការវាយតម្លៃ និងដាក់ជាចំណាត់ថ្នាក់ទៅលើសហព័ន្ធកីឡាជាតិជាលើកដំបូង ដើម្បីធ្វើការវាយតម្លៃឲ្យបានច្បាស់ទៅលើសហព័ន្ធកីឡាជាតិដែលមានសកម្មភាព និងមានការអភិវឌ្ឍ និងឈានដល់ការកាត់ចេញនូវសហព័ន្ធណាដែលនៅតែគ្មាន ការកែទម្រង់។
លោកបានថ្លែងថា៖ «ដើម្បីវាយតម្លៃនៅឆ្នាំ ២០១៩ នេះបាន NOCC បានធ្វើស្តង់ដាវាយតម្លៃមួយទៅលើសហព័ន្ធកីឡាជាតិដោយការដាក់ពិន្ទុ គឺសហព័ន្ធណាធ្វើបានល្អនូវលក្ខខណ្ឌដែលដាក់ទៅនឹងបានចំណាត់ថ្នាក់លេខ ១ លេខ ២ និងលេខ ៣ ទៅតាមនោះ ហើយការវាយតម្លៃស្តង់ដានេះគឺដើម្បីឲ្យស្ថាប័នទទួលបន្ទុកកីឡាមានការចាប់អារម្មណ៍ ហើយដើម្បីឲ្យដឹងថា យើងមានកម្រិតសហព័ន្ធខ្សោយច្រើនជាង ឬសហព័ន្ធខ្លាំងច្រើនជាង»។
លោក វ៉ាត់ ចំរើន បានបញ្ជាក់ថា៖ «យើងត្រូវធ្វើឲ្យច្បាស់គឺយើងត្រូវដាក់ចំណាត់ថ្នាក់ទៅដល់សហព័ន្ធតែម្តង ដើម្បីជំរុញការគាំទ្រការឧបត្ថម្ភ និងការអភិវឌ្ឍរបស់សហព័ន្ធដែលមិនទាន់ឈានដល់ចំណាត់ថ្នាក់ល្អ ហើយក្រៅពីការវាយតម្លៃធ្វើចំណាត់ថ្នាក់សហព័ន្ធកីឡាជាតិហើយ គឺយើងត្រូវមានយន្តការត្រួតពិនិត្យ និងវាយតម្លៃនេះទៅតាមអ្វីដែលយើងបានដាក់ចេញ»៕
