.jpg)
ក្រុមមហាហង្ស បាននាំគ្នាស្រែកហ៊ោអបអរ នៅក្នុងពិធីលើកពាន កាលពីថ្ងៃអាទិត្យ។ យូសុះ អាប់ឌុលរ៉ាស់ហ៊ីម
ភ្នំពេញ៖ អគ្គលេខាធិការក្លិបមហាហង្សអលស្តារ លោក យិន សុខុម បានចាត់ទុកការក្រសោបបានពានរហូតដល់ទៅ ៥ ពីការប្រកួតក្នុងសាលថ្នាក់ជាតិ ឬជើងឯកពានរង្វាន់ក្នុងសាល TIGER ឆ្នាំ ២០២០ ថា ជាមោទនភាពយ៉ាងធំធេង ដែលកម្រនឹងមានក្រុមណាអាចធ្វើបាន ហើយក្រុមរបស់លោកនឹងប្រឹងប្រែងបន្ថែមទៀត ដើម្បីប្រកួតតំណែងឱ្យកម្ពុជាក្នុងពានរង្វាន់ AFF Futsal Championship។
លោក យិន សុខុម បានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា៖ «សម្រាប់ មហាហង្ស ពិតជាមានមោទនភាពខ្លាំង ដែលកម្រមានក្រុមណាអាចធ្វើបានដូចយើងណាស់ ព្រោះយើងជាក្រុមក្មេងខ្ចីមួយ ដែលទើបតែចូលប្រឡូកទៅក្នុងវិស័យបាល់ទាត់ក្នុងសាល ប៉ុន្តែយើងទទួលបានលទ្ធផលគួរជាទីមោទនៈមែនទែន គឺយើងបានឈ្នះរហូតដល់ទៅ ៥ ពាន ក្នុងចំណោមពានទាំង ៦ មានន័យថា យើងអត់បានតែពានកីឡាករទាត់បាល់បញ្ចូលទីច្រើនជាងគេ ១ ប៉ុណ្ណោះ»។
សម្រាប់ការចូលរួមប្រកួតបាល់ទាត់ក្នុងសាលថ្នាក់ជាតិ ពេញមួយរដូវកាលនេះ ក្រុមមហាហង្ស បានបង្កើតនូវកំណត់ត្រាប្រកួតល្អបំផុត គឺពួកគេមិនធ្លាប់ចាញ់សោះ ដោយក្នុងនោះ មហាហង្ស បានឈ្នះ ៣ និងស្មើ ១ នៅក្នុងការប្រកួតវិលជុំ ដើម្បីឈរនៅលេខ ១ ប្រចាំពូល C មុនពេលពួកគេ បានបន្តទៅទម្លាក់ក្រុម Panda FC នៅវគ្គខ្វែង ៨ ក្រុម ជាមួយការយកឈ្នះ ៨-១ និងបន្តទៅលត់ក្រុម Loading FC ៩-១ នៅ វគ្គពាក់កណ្តាលផ្តាច់ព្រ័ត្រ។
ចំណែកការប្រកួតផ្តាច់ព្រ័ត្រកាលពីថ្ងៃអាទិត្យ ក្រុមមហាហង្ស បានឈ្នះក្រុមឪម៉ាល់អេហ្វស៊ី ៩-៤ ដើម្បីលើកពានធំ ដ៏គួរឱ្យកត់សម្គាល់បំផុត ហើយពួកគេក៏ទទួលបានពានជាក្រុមលេង Fair play ព្រមទាំងពានឯកជនចំនួន ៣ ទៀតផងដែរ គឺពានអ្នកចាំទីល្អ របស់អ្នកចាំទី វង្ស ដារ៉ា ពានគ្រូបង្វឹកល្អរបស់លោកគ្រូ នៃ ប៊ុន សុភ័ក្រា និងពានកីឡាករលេងល្អជាងគេ របស់កីឡាករពាក់លេខ ៨ កែវ ជាតួ។ រីឯពានរង្វាន់កីឡាករស៊ុតបាល់បញ្ចូលទីបានច្រើនជាងគេ បានទៅលើកីឡាករ ឌុក សុផាត របស់ក្រុម Tai Chi FT ប៉ុន្តែ Tai Chi បានចាញ់ Loading FC ១៣-១១ ក្នុងការប្រកួតដណ្តើមយកលេខ ៣។
ចំពោះការដណ្តើមបានលទ្ធផលដ៏ល្អនេះ លោក យិន សុខុម បានលម្អិតថា៖ «ការសម្រេចបានជោគជ័យយ៉ាងធំនេះ វាមានការកត្តារួមផ្សំច្រើន គឺយើងត្រៀមខ្លួន និងហ្វឹកហាត់បានល្អ ដោយយើងហាត់ពី ៤ ទៅ ៥ ថ្ងៃ ក្នុង ១ សប្តាហ៍ ដែលធ្វើឱ្យក្រុមយើងមានអាទិភាពខ្ពស់។ បន្ថែមលើនេះ កីឡាករយើងសម្បូរអ្នកមានគុណភាព ហើយក្រុមទាំងមូលមានការយល់ចិត្តគ្នា លេងស៊ីចង្វាក់គ្នា និងមានការតាំងចិត្តខ្ពស់ក្នុងការប្រកួតតាំងពីដើមរដូវកាល រហូតដល់ចប់រដូវកាល ជាពិសេស គឺពួកគាត់មានភាពអត់ធ្មត់ខ្លាំង ព្រោះខ្ញុំតែងណែនាំពួកគាត់ទៅលើបញ្ហានេះថា ស៊ូឱ្យគូប្រកួតដាក់យើងចុះ តែយើងត្រូវអត់ធ្មត់ក្នុងការលេង ហើយចំណុចទាំងនេះហើយ ដែលនាំឱ្យក្រុមយើងទទួលបានជោគជ័យធំ»។
សម្រាប់ការឈ្នះបានជើងឯកពីការប្រកួតហ្វុតសាល ប្រចាំឆ្នាំ ២០២០ នេះ ក្រុមមហាហង្សនឹងទទួលបានឱកាសដ៏ពិសេសមួយបន្ថែមទៀត គឺពួកគេនឹងក្លាយជាក្រុមតំណាងឱ្យកម្ពុជា ដើម្បីទៅចូលរួមការប្រកួតពានរង្វាន់ AFF Futsal Championship ជាមួយក្រុមខ្លាំងផ្សេងៗទៀត នៅក្នុងតំបន់អាស៊ាន។
លោក យិន សុខុម បានបញ្ជាក់ថា៖ «ក្រុមមហាហង្សពិតជារំភើប ដែលបានលេងតំណាងឱ្យកម្ពុជា ហើយពួកយើងនឹងប្រឹងប្រែងឱ្យអស់ពីសមត្ថភាព ដើម្បីដណ្តើមឱ្យបានលទ្ធផលល្អជូនជាតិ ព្រោះកីឡាករយើងមួយចំនួន ធ្លាប់មានបទពិសោធប្រកួតកម្រិតអន្តរជាតិខ្លះហើយ ចំណែករូបខ្ញុំផ្ទាល់ ក៏ធ្លាប់ជាទីប្រឹក្សារបស់ក្លិបដោនថោនស្ពត នៅពេលក្រុមនេះ បានឡើងទៅវគ្គ ១/២ ផ្តាច់ព្រ័ត្រ ក្នុងការប្រកួត AFF Futsal Championship 2019 កន្លងមកផងដែរ អ៊ីចឹងមានន័យថា យើងមានមូលដ្ឋានខ្លះរួចទៅហើយ»៕
