.jpg)
ខ្សែប្រយុទ្ធ Bata (ឆ្វេង) បានលោតទៅគ្រប់គ្រងបាល់ពេលជួបសាលាកីឡាបាល់ទាត់ជាតិបាទី។ ភ្នំពេញក្រោន
ភ្នំពេញៈ ក្រុមភ្នំពេញក្រោន បានបង្ហាញការភ្ញាក់ផ្អើលទៅនឹងជ័យជម្នះយ៉ាងធំធេងរបស់ខ្លួន ខណៈពួកគេបានយកឈ្នះក្រុមសាលាកីឡាបាល់ទាត់ជាតិបាទីរហូតដល់ ១២-១ ក្នុងការប្រកួតលីកកំពូលកម្ពុជាប្រចាំសប្តាហ៍ទី ១៥ នោះ ចំណែកក្រុមណាហ្គាវើល និងបឹងកេតបានសងសឹកទៅលើក្រុមក្រសួងការពារជាតិ (ទ័ព) និងអគ្គិសនីកម្ពុជាសម្រេចដូចគ្នា ប៉ុន្តែគ្រូក្រុមអង្គរថាយហ្គឺរ បានសរសើរក្រុមខេត្តកំពង់ចាមថាមានការរីកចម្រើនជាងការប្រកួតជើងទី ១។
ល17C4ក ស៊ុំ វណ្ណា ដែលជាគ្រូបង្គោលបណ្តោះអាសន្នរបស់ក្រុមភ្នំពេញក្រោន បានចាត់ទុកការយកឈ្នះក្រុមសាលាបាល់ទាត់ជាតិបាទី ១២-១ លើកនេះថាជាជ័យជម្នះដែលលើសពីអ្វីដែលលោកបានរំពឹងទុក ខណៈការប្រកួតជើងទី ១ ភ្នំពេញក្រោនបានយកឈ្នះត្រឹម ២-០ ទាំងលំបាកនោះ។
លោក ស៊ុំ វណ្ណា បាននិយាយក្រោយការប្រកួតថា៖ «យើងគិតថាយើងយក ៣ ពិន្ទុពីពួកគាត់ ហើយសម្រាប់គ្រាប់បាល់វិញ យើងរំពឹងត្រឹមតែ ២ ឬ ៣ គ្រាប់ទេ ប៉ុន្តែស្ថានភាពជាក់ស្តែងនៅលើទីលានគឺយើងធ្វើបានល្អលើសពីការរំពឹងទុក។ ទោះជានៅតង់ទី ១ យើងធ្វើមិនបានល្អ តែយើងបានធ្វើការផ្លាស់ប្តូរយុទ្ធសាស្ត្រលេងនៅតង់ទី ២ ដោយប្រើប្រាស់ការពារ ៣ នាក់បម្រើ ៤ នាក់ និងប្រយុទ្ធ ៣ នាក់ ហើយយើងព្យាយាមបញ្ចូនបាល់ និងព្យាយាមបង្កើតឱកាសច្រើនដែលនេះជាចំណុចវិជ្ជមានរបស់យើង»។
ជាមួយការឈ្នះក្រុមសាលាកីឡាបាល់ទាត់ជាតិបាទី ១២-១ នៅកីឡដ្ឋាន RSN កាលពីយប់ថ្ងៃអាទិត្យនោះ ខ្សែប្រយុទ្ធ Bata ដែលទើបចេញពីក្រុមទ័ព ទៅលេងឲ្យភ្នំពេញក្រោន ក្នុងជើងទី ២ នេះរកបាន ៦ គ្រាប់តែម្នាក់ឯង ដើម្បីឡើងទៅឈរនៅលេខ ១ ក្នុងតារាងអ្នកស៊ុតបាល់បញ្ចូលទីបានច្រើនជាងគេវិញម្តង ដោយរូបគេរកបានសរុប ២០ គ្រាប់គឺខ្សែប្រយុទ្ធ Timothy របស់ក្រុមអង្គរថាយហ្គឺរ និង Privat របស់ក្រុមព្រះខ័នរាជស្វាយរៀងដែលពេលនេះពួកគេរកបានសរុប ១៨ គ្រាប់ស្មើគ្នា។
សម្រាប់ការជួបខេត្តកំពង់ចាមលើកនេះខ្សែប្រយុទ្ធ Timothy ដែលធ្លាប់ឈរនៅលេខ ១ ក្នុងនាមជាអ្នកស៊ុតបាល់បានច្រើនជាងគេនោះគឺរកបាន ២ គ្រាប់ នៅពេលអង្គរថាយហ្គឺរ បានថមថយក្នុងការយកឈ្នះក្រុមខេត្តកំពង់ចាមពី ១១-០ កាលជើងទី ១ មកឈ្នះត្រឹម ៤-០ នោះ។
ទោះបីជាយ៉ាងណាលោក Oriol Mohedano គ្រូបង្វឹកអង្គរថាយហ្គឺរ បានសរសើរទៅដល់ភាពរីកចម្រើនរបស់ក្រុមខេត្តកំពង់ចាមដោយលោកបាននិយាយប្រាប់ CNCC ថា៖ «កំពង់ចាមបច្ចុប្បន្នជាក្រុមដ៏តឹងជាងមុនដោយមិនមែនចេះតែរបូតគ្រាប់បាល់ទៀតទេ ប៉ុន្តែបើពួកគេលេងដូចរបៀបនេះគ្រប់ការប្រកួត វាក៏ជារឿងដ៏រីករាយមួយសម្រាប់ខ្ញុំដែរ ព្រោះនេះជាអ្វីដែលខ្ញុំចង់ឃើញគ្រប់ការប្រកួត»។
ចំណែកខ្សែប្រយុទ្ធ Privat រកបាន ៣ គ្រាប់តែម្នាក់ឯង ដើម្បីជួយឲ្យក្រុមព្រះខ័នរាជស្វាយរៀង បន្តឈ្នះក្រុមសូលទីឡូអង្គរ ៦-១ ចំណែកខ្សែបម្រើ គួច ដានី ជាអ្នកជួយឲ្យក្រុមណាហ្គាវើល ឈ្នះក្រុមទ័ព ១-០ដើម្បីសម្រេចការសងសឹកចំពោះការចាញ់ ៤-២ កាលជើងទី ១ ហើយលទ្ធផលនេះបានជួយឲ្យណាហ្គាវើលបន្តឈរនៅលេខ ២ ដោយមាន ៣៤ ពិន្ទុតិចជាក្រុមឈរនៅកំពូលតារាងស្វាយរៀង ៥ ពិន្ទុដដែល ខណៈអង្គរថាយហ្គឺរឈរនៅលេខ ៣ ដដែលមាន ៣៣ ពិន្ទុ។
ជាមួយគ្នានេះក្រុមវិសាខាបានបន្តឈ្នះក្រុមគិរីវង់សុខសែនជ័យ ៤-១ ដើម្បីឈរនៅលេខ ៤ មាន ៣១ ពិន្ទុ ឯក្រុមបឹងកេតបានយកឈ្នះក្រុមអគ្គិសនីកម្ពុជា ៤-០ ដើម្បីលុបចោលការចាញ់ ១-០ ទាំងមិនគួរឲ្យចង់ជឿកាលជើងទី ១ និងបន្តឈរនៅលេខ ៥ មាន ៣០ ពិន្ទុលើភ្នំពេញក្រោនដែលមាន ២៨ ពិន្ទុ តែក្រុមទ័ពមាន ២៣ ពិន្ទុដដែល ហើយក្រុមអាស៊ីអឺរ៉ុបបានវាយបកតាមស្មើជាមួយក្រុមប៉ូលិស ១-១ ជំនួសការចាញ់ប៉ូលិស ៣-២ កាលពីប្រកួតជើងទី ១៕
