ភ្នំពេញៈ អ្នកប្រដាល់ ខេម ចាន់ មកពីក្លិបកងពលតូចទ័ពឆត្រយោង ៩១១ ត្រូវបានគេរំពឹងថា នឹងអាចយកឈ្នះកីឡាករជើងថ្មី ជី ឆៃលី របស់សមាគមកីឡាប្រដាល់ក្រសួងការពារជាតិក្នុងការប្រកួតផ្តាច់ព្រ័ត្រនៅសង្វៀនប៉ុស្តិ៍លេខ ៥ នាយប់ថ្ងៃសៅរ៍នេះ ដើម្បីក្លាយជាម្ចាស់ពានរង្វាន់ជើងឯក TV5 Boxing Knock Out Series ទម្ងន់ ៥៤ គីឡូក្រាម បើទោះបីជាគ្រូបង្វឹកលោក ធន់ សុភា មានទំនុកចិត្តខ្ពស់ទៅលើ ជី ឆៃលី ថា សង្ឃឹមឈ្នះ ៧០ ភាគរយក៏ដោយ។
មុននឹងឡើងមកដល់វគ្គផ្តាច់ព្រ័ត្រនេះ ខេម ចាន់ ដែលជាអតីតម្ចាស់ជើងឯកមេដាយមាស កីឡាជាតិលើកទី ២ ឆ្នាំ ២០១៨ បានបង្ហាញការប្រកួតយ៉ាងល្អបំផុតក្នុងការប្រកួតជម្រុះទាំង ៤ លើកកន្លងមកនេះដោយរូបគេបានផ្តួល សំណាង សុខនឿន មកពីក្លិបកងចក្ររាជសីហ៍មានរិទ្ធ ឲ្យសន្លប់ក្នុងទឹកទី ២ ឈ្នះ គឿម សុវណ្ណឌឿត ក្លិបមោងឫស្សីមរតកគុនខ្មែរខេត្តបាត់ដំបងក្នុងទឹកទី ២ ដែរ រួចឈ្នះ គីន ខ្លឹម (សិស្សប្អូនទំនងដូចបន្ធូរដៃ) មកពីក្លិបកងពលតូចទ័ពឆត្រយោង ៩១១ ជាមួយគ្នាដោយពិន្ទុ និងវគ្គពាក់កណ្តាលផ្តាច់ព្រ័ត្រ ខេម ចាន់ បានឈ្នះ ឡុង ណងសៅ មកពីក្លិបសាលវ័ន្តកីឡាដោយពិន្ទុ។
ចំណែក ជី ឆៃលី វិញទោះបីជាបទពិសោធនៅខ្ចីជាង ប៉ុន្តែក្នុងការប្រកួតចំនួន ៣០ លើកចាញ់តែ ៦ លើកប៉ុណ្ណោះ ហើយក្នុងវគ្គជម្រុះ TV5 Boxing Knock Out Series ចំនួន ៤ កន្លងមកនេះគេបានឈ្នះ សល់ ស្រស់ ក្លិបកុសលកីឡា ក្នុងទឹកទី ៣ ឈ្នះ អេ អាំម៉ារិន ក្លិបអេភូថងកីឡាដោយពិន្ទុទាំងចម្រូងចម្រាស ឈ្នះ សូត្រ វាសនា ក្លិបបក្សីស្លាបដែក និងលើកចុងក្រោយឈ្នះ លី តក់ របស់ក្លិបគុនខ្មែរក្នុងទឹកទី ២។
ទោះបីជាយ៉ាងណាប្រភពពីអ្នកតាមដានភាគច្រើនលើសលប់សុទ្ធតែមានទំនុកចិត្តលើ ខេម ចាន់ ជាអ្នកឈ្នះ និងក្លាយជាជើងឯក ហើយលោក ហង្ស ស៊ឺន គ្រូបង្វឹក ខេម ចាន់ បានប្រាប់យ៉ាងខ្លីថា លោកសង្ឃឹមឈ្នះច្រើន ប៉ុន្តែចាំមើលវាវ៉ៃគ្នាសិន ព្រោះដៃគូគេល្អដែរ។ សម្រាប់យុទ្ធសាស្ត្រប្រកួតវិញ លោកបញ្ជាក់ថា៖ «ទុកឲ្យវាវ៉ៃខ្លួនវា និងតាមបច្ចេកទេសរបស់វាទៅ ចំណែកខ្ញុំមិនចេះនិយាយមុនទេ កុំឲ្យគេថា យើងអួត»។
ផ្ទុយទៅវិញលោក ធន់ សុភា គ្រូបង្វឹក ជី ឆៃលី បានអះអាងថា មានទំនុកចិត្តឈ្នះ ៧០ ភាគរយ ប៉ុន្តែសម្រាប់ក្បាច់ប្រកួតនៅវគ្គផ្តាច់ព្រ័ត្រនេះ សុំមិននិយាយនោះទេ ខ្លាចដៃគូគេដឹង។ លោកបន្ថែមថា៖ «ជី ឆៃលី ហ្វឹកហាត់ទើបតែ ១២ ខែប៉ុណ្ណោះ តែការប្រកួតកាន់តែល្អដូចសិស្សច្បង ធន់ អៀងឡៃ ដែរ ហេតុនេះខ្ញុំមានទំនុកចិត្តខ្ពស់ ព្រោះខ្ញុំបង្វឹក និងថែទាំវាផ្ទាល់ដៃ។ ទោះជាយ៉ាងណាការចាញ់ឈ្នះមិនមែនងាយអាចកំណត់បាននោះទេ ព្រោះការប្រកួតត្រឹម ៣ ទឹក យើងមិនអាចស្ទាបស្ទង់សមត្ថភាពសិនទេ គឺចូលវាយសម្រុកតែម្តង ហើយចាញ់ ឬឈ្នះនៅលើកម្លាំងជាចម្បង»។
ចំណែកអ្នកប្រដាល់ ឡុង ណងសៅ ត្រូវប្រកួតដណ្តើមយកលេខ ៣ និងលេខ ៤ ជាមួយ លី តក់ ខណៈប្រាក់រង្វាន់ដែលនឹងទទួលបានក្នុងព្រឹត្តិការណ៍នេះគឺអ្នកលេខ ១ បាន ៤០០០ ដុល្លារលេខ ២ បាន ២០០០ ដុល្លារលេខ ៣ បាន ៧៥០ ដុល្លារ និងអ្នកលេខ ៤ បាន ៥០០ ដុល្លារ៕