ភ្នំពេញ៖ គ្រូប្រដាល់មានវ័យជាង ៧០ ឆ្នាំ លោក ឈិន ខ្វាន់ចៃ ដែលបានធ្លាក់ខ្លួនឈឺធ្ងន់ធ្ងរសម្រាកនៅមួយកន្លែង អស់រយៈពេល ៥ ខែមកហើយនោះ កំពុងជួបការលំបាកក្នុងជីវភាពកាន់តែខ្លាំង និងសុំឱ្យសប្បុរជនមេត្តាជួយ ដើម្បីបានរស់ ព្រោះប្រាក់ចំណូលធ្លាប់បានពីការបង្វឹក និងបម្រើការជាគណៈកម្មការប្រកួតនៅតាមសង្វៀន ត្រូវបានដាច់ទាំងស្រុង ហើយតាមស្ថានភាពជំងឺរបស់លោកក្នុងវ័យចាស់ផងមិនងាយនឹងមានសភាពវិលមកប្រក្រតីឡើងវិញទេ ខណៈការហូបចុកក៏មិនសូវគ្រប់គ្រាន់។
ជាមួយស្ថានភាពដ៏លំបាករបស់លោក ឈិន ខ្វាន់ចៃ នេះ មានមិត្តភក្តិរួមអាជីព និងកូនសិស្សគណមួយចំនួន ជាពិសេសថ្នាក់ដឹកនាំកីឡាក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ ដែលដឹកនាំដោយ លោក គង់ ចាន់ធីណា ជាប្រធានក្លិបបានរៃលុយគ្នាយកទៅជួយសម្រួលការលំបាកដល់លោក ខ្វាន់ចៃ កាលពីដើមសប្តាហ៍កន្លងមកនេះ។
លោក គង់ ចាន់ធីណា បានប្រាប់ថា ស្ថានភាពជំងឺរបស់ លោក ឈិន ខ្វាន់ចៃ ពេលនេះ មានអាការទន់ដៃជើងអស់កម្លាំង និងឡើងសម្ពាធឈាម ដើរមិនរួច ដោយបានត្រឹមអង្គុយ និងដេកមួយកន្លែង នៅក្នុងនៅផ្ទះខាងគ្រួសារប្រពន្ធស្ថិតនៅភូមិចុងក្រូច ឃុំរាប ស្រុកពារាំង ខេត្តព្រៃវែង។
លោក គង់ ចាន់ធីណា បន្តថា៖ «ធម្មតាមុខរបរគ្រូប្រដាល់ភាគច្រើន បំពេញការងារបានប្រាក់ចំណូលប្រចាំថ្ងៃប៉ុណ្ណោះ លុះដល់ចាស់ ឬបាត់បង់សមត្ថភាពពលកម្ម គឺពិតជាលំបាកអ៊ីចឹងហើយ ព្រោះការងារគ្រូកីឡាប្រដាល់តាមក្លិបគ្មានប្រាក់ខែដូចតែគ្នាហ្នឹង។ ចំណែកលោក ឈិន ខ្វាន់ចៃ មានជីវភាពក្រីក្រហើយថែមទាំងមានជំងឺធ្ងន់ទៀត គឺពិតជាលំបាកខ្លាំងណាស់ អ៊ីចឹងហើយទើបមិត្តភក្តិ កូនសិស្សខ្លះ និងថ្នាក់ដឹកនាំកីឡា លោកជួយសម្រួលការលំបាករបស់លោកគ្រូ បានខ្លះ ប៉ុន្តែមិនអាចជួយបានគ្រប់គ្រាន់ ឬរៀងរហូតនោះទេ គ្រាន់តែជួយសម្រាលបានខ្លះ»។
សម្រាប់ការជួយឧបត្ថម្ភជាលើកទី២ នេះ លោក គង់ ចាន់ធីណា រួមទាំងកូនសិស្ស និងថ្នាក់ដឹកនាំកីឡារបស់ក្លិបមកុដរាជសីហ៍បានរៃអង្គាសថវិការួមគ្នាបានចំនួន ៦៤ ម៉ឺនរៀល ព្រមទាំងបានអង្គរ ១ បាវ ទឹកដោះគោ ២ កេស និងថ្នាំប៉ូវកម្លាំងចំនួន ១ កំប៉ុង ដើម្បីយកទៅជូនដល់លោក ឈិន ខ្វាន់ចៃ។
អ្នកស្រី សោម រ៉ែន ជាប្រពន្ធប្រាប់ថា៖ «ប្តីរបស់ខ្ញុំ បានធ្លាក់ខ្លួនឈឺធ្ងន់ចូល ៥ ខែហើយ គឺមួយរយៈនេះងើបពីកន្ទេលមិនរួចទេ ហើយគ្មានមុខរបរអ្វីឡើយ គឺបង្វឹកកីឡាករមិនកើត និងគ្មានចំណូលទេ ចំណែកជីវភាពរាល់ថ្ងៃបានដោយសារបងប្អូនគេស្គាល់ជួយផ្តល់ប៉ុណ្ណោះ»។
ជាមួយគ្នានេះ អ្នកស្រី រ៉ែន បានលើកដៃសុំអង្វរដល់សប្បុរជនជិតឆ្ងាយ មេត្តាជួយឧបត្ថម្ភដល់ប្តីប្រពន្ធដ៏កម្សត់នេះផង ព្រោះពួកគាត់ពិតជាគ្មានលទ្ធភាពរកប្រាក់ព្យាបាលលោក ខ្វាន់ចៃ នោះទេ ហើយបន្ថែមទៅលើភាពទីទ័លនេះ អ្នកទាំង ២ ក៏ត្រូវរ៉ាប់រងកូនតូចៗចំនួន ៣ នាក់ទៀតផងដែរ ដែលកូនទាំង ៣ នេះ នៅមិនទាន់មាននរណាម្នាក់បានចូលរៀននោះទេ។
ទាំងសំឡេងអួលដើមក អ្នកស្រី សោម រ៉ែម និយាយថា៖ «ក្រុមកូនសិស្ស និងសប្បុរសជនមួយចំនួនបានជួយពួកខ្ញុំតាមលទ្ធភាពតិចតួច ដើម្បីសម្រាលការលំបាកបានមួយគ្រាៗប៉ុណ្ណោះ ហេតុនេះសូមសប្បុរសជនជិតឆ្ងាយមេត្តាបន្តជួយឧបត្ថម្ភដល់ប្តីប្រពន្ធយើងផង ព្រោះពួកខ្ញុំពិតជាគ្មានលទ្ធភាព និងគ្មានទីពឹងឯណា ដើម្បីគេចចេញពីភាពទីទ័លនេះទេ»។
គួររំឭកថា លោក ឈិន ខ្វាន់ចៃ ជាអ្នកប្រដាល់បន្តវេនពីជីតា និងលោកឪពុកឈ្មោះ តាខ្វាន់ ដែលជាអ្នកប្រដាល់ល្បីល្បាញ នៅខេត្តបាត់ដំបង ក្នុងជំនាន់ទសវត្សរ៍ ៥០ និង ៦០។ លោក ខ្វាន់ចៃ ធ្លាប់ជាកីឡាករប្រដាល់ នៅតាមខេត្ត ក្នុងទសវត្សរ៍ឆ្នាំ ១៩៨០ ហើយនៅឆ្នាំ ២០០០ លោកបានចាកចេញពីស្រុកកំណើតក្នុងខេត្តបាត់ដំបង មករស់នៅផ្ទះជួលនាក្រុងភ្នំពេញ ដោយធ្វើជាគ្រូបង្វឹកស្ម័គ្រចិត្ត និងមានមុខរបរបន្ថែមជាអ្នករត់ម៉ូតូឌុប។
រហូតដល់ឆ្នាំ ២០១១ លោក ខ្វាន់ចៃ បាន ព្យាយាមបង្វឹកកូនប្រុស ឈិន ខ្វាន់ង៉ុយ (កូនប្រពន្ធដើម) ឱ្យក្លាយជាអ្នកប្រដាល់ឆ្នើមម្នាក់ ដែលប្រកួតដណ្តើមបានខ្សែក្រវាត់ចំនួន ២ គ្រឿង ហើយលោកជាគ្រូបង្វឹកឱ្យក្លិបមកុដរាជសីហ៍ និងជាប់ជាចៅក្រម អាជ្ញាកណ្តាល គណៈកម្មការរបស់សហព័ន្ធកីឡាប្រដាល់ប្រចាំនៅសង្វៀនអាស៊ីអាគ្នេយ៍ ប៉ុន្តែបន្ទាប់មកសង្វៀននេះ បានបិទធ្វើឱ្យលោកអស់ការងារធ្វើ គ្មានប្រាក់ចំណូល និងធ្លាក់ខ្លួនឈឺបន្តិចម្តងៗ រហូតមកដល់បច្ចុប្បន្នតែម្តង។
លោក ឈិន ក្វាន់ចៃ មានបងប្អូន ៤ នាក់ ស្រី ១ និងប្រុស ៣ នាក់ ជាអ្នកប្រដាល់ទាំងអស់ តែមានវ័យចាស់ៗទៅហើយ ហើយនៅមុនធ្លាក់ខ្លួនឈឺនេះ លោក ខ្វាន់ចៃ បណ្តុះបណ្តាលបានកីឡាករមានសមត្ថភាពល្អច្រើន ដែលមានឈ្មោះល្បីចូលប្រកួតប្រជែងបានលំដាប់ជួរមុខមួយចំនួនដូចជា រឿង សោភ័ណ្ឌ, ឌុម កែវដា, រិន មុន្នី, សេក គឹមរួន, រឿង សារិទ្ធ និង ធា នុរាជ ជាដើម ប៉ុន្តែពេលនេះ លោកនិយាយមិនច្បាស់ ស្តាប់មិនបាន ហើយកំពុងស្នាក់នៅជាបណ្តោះអាសន្នជាមួយប្រពន្ធក្រោយក្នុងលក្ខណៈក្រលំបាកបំផុត៕