.jpg)
ការប្រកួតធ្វើតេស្តរបស់ក្រុមជម្រើសជាតិចំបាប់ ដើម្បីរកអ្នកមានសមត្ថភាពទៅប្រកួតកីឡាអាស៊ី។ ណន
ភ្នំពេញៈ សហព័ន្ធកីឡាចំបាប់កម្ពុជា បានឯកភាពគ្នាប្រើប្រាស់នូវគោលការណ៍ និងទិសដៅថ្មី គឺការប្រកួតធ្វើ «តេស្ត» ទៅលើក្រុមជម្រើសជាតិ ទាំងក្រុមថ្នាល និង ឈុតធំ ដើម្បីជ្រើសរើសរកអ្នកមានសមត្ថភាពពិតប្រាកដ ចេញទៅប្រកួតតំណាងឲ្យប្រទេសជាតិ នៅលើឆាកអន្តរជាតិ ហើយទិសដៅថ្មីនេះត្រូវបានអ្នកជំនាញប្រាប់ថា នឹងធ្វើឲ្យក្រុមចំបាប់កម្ពុជា កាន់តែមានការអភិវឌ្ឍប្រសើរឡើង សម្រាប់ការប្រជែងរកមេដាយឲ្យកម្ពុជា។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បានប្រាប់ ភ្នំពេញ ប៉ុស្តិ៍ កាលពីថ្ងៃពុធថា៖ «ការដាក់គោលដៅថ្មីឲ្យធ្វើតេស្ត ជាលើកទី ១ នេះ ដោយសារពេលនេះយើងមានធនធានកីឡាករច្រើន គឺមានរហូតដល់ជាង ៣០ នាក់ ទាំងក្រុមថ្នាល និងឈុតធំជម្រើសជាតិ ហើយការធ្វើតេស្តនេះដែរ ដើម្បីពញ្ញាក់អារម្មណ៍ដល់ក្រុមឈុតធំ ដែលគាត់កន្លងមកគិតថា ហាត់ដោយ ឯករាជ្យ និងដឹងតែបានចេញទៅក្រៅប្រទេស ព្រោះគ្មានអ្នកប្រជែងនោះ ឲ្យខំប្រឹងហ្វឹកហាត់ឡើងវិញ ដើម្បីប្រកួតប្រជែងដណ្តើមយកកៅអីជាមួយក្រុមថ្នាល»។
ជាមួយទិសដៅថ្មីនេះ សហព័ន្ធកីឡាចំបាប់កម្ពុជា កាលពីថ្ងៃអង្គារ បានបើកការធ្វើតេស្តជាលើកដំបូងរវាងក្រុមថ្នាល និងក្រុមធំជម្រើសជាតិ ដើម្បីស្វែងរកអ្នកមានសមត្ថភាពចំនួន ៤ នាក់ នៅលើប្រភេទទម្ងន់ ៥០ និង ៥៧ គ.ក្រផ្នែកនារី និងទម្ងន់ ៦៣ និង៨៦ គ.ក្រ ផ្នែកបុរស សម្រាប់ត្រៀមចេញទៅប្រកួតកីឡាអាស៊ី (Asian Games 2018) ដែលនឹងត្រូវធ្វើនៅប្រទេសឥណ្ឌូនេស៊ី ចាប់ពីថ្ងៃទី ១៨ ខែសីហា ដល់ថ្ងៃទី ២ ខែកញ្ញា ខាងមុខនេះ។
លោក ធិន វិចិត្រ បញ្ជាក់ថា៖ «ចាប់ពីពេលនេះទៅ គឺរាល់ការប្រកួតចេញទៅក្រៅស្រុក ត្រូវតែមានការធ្វើតេស្តបែបនេះ ដើម្បីរកអ្នកមានសមត្ថភាពពិត។ ការធ្វើបែបនេះ វាល្អសម្រាប់ប្រយោជន៍រួម តែមិនល្អសម្រាប់ប្រយោជន៍បុគ្គល ព្រោះកីឡាករ កីឡាការិនីមួយចំនួនតូច គាត់មិនសូវជាសប្បាយចិត្ត ពេលយើងឲ្យធ្វើតេស្តបែបនេះ»។
ប៉ុន្តែលោកបន្ថែមថា៖ «អត្តពលិកភាគច្រើន សប្បាយចិត្ត ទទួលយកការធ្វើតេស្តនេះ ដ្បិតអីធ្វើឲ្យគាត់ដឹងពីសមត្ថភាពខ្លួនឯង ថាតើគាត់គួរទទួលបានឱកាសទៅប្រកួតតំណាងឲ្យជាតិឬយ៉ាងណា? ម្យ៉ាងទៀត ការធ្វើតេស្តនេះ បានផ្តល់ភាពយុត្តិធម៌ និងធ្វើឲ្យអត្តពលិក មានកម្លាំងចិត្តក្នុងការប្រឹងប្រែងហ្វឹកហាត់»។
អគ្គលេខាធិការរូបនេះ បានសង្កត់ធ្ងន់ថា៖«ការដាក់ឲ្យធ្វើតេស្តនេះ ជាគោលការណ៍ថ្មីរបស់សហព័ន្ធ ដែលធ្វើឲ្យមានការប្រឹងប្រែងទាំងអស់គ្នា ទាំងគ្រូបង្វឹកក្រុមថ្នាល ក្រុមឈុតធំ និងគណៈកម្មការប្រតិបត្តិរបស់យើង ព្រោះនេះជាវឌ្ឍនភាពមួយរបស់សហព័ន្ធ ក្នុងការជួយជំរុញឲ្យអត្តពលិកមានការកើនឡើងផ្នែកគុណផល និងបច្ចេកទេស ដែលយើងអាចសម្រិតសម្រាំងរកបានអ្នកមានសមត្ថភាពពិតប្រាកដ សម្រាប់ចេញទៅប្រកួតតំណាងឲ្យជាតិ ក្នុងព្រឹត្តិការណ៍ផ្សេងៗ នៅលើឆាកអន្តរជាតិ»។
នៅក្នុងការធ្វើតេស្ត ជ្រើសរើសអ្នកមានសមត្ថភាព ត្រៀមចេញទៅប្រកួតកីឡាអាស៊ី កាលពីថ្ងៃអង្គារ គឺទាំងក្រុមថ្នាល និងក្រុមឈុតធំជម្រើសជាតិ បានធ្វើការប្រកួតប្រជែងគ្នា យ៉ាងស្វិតស្វាញបំផុត ដើម្បីដណ្តើមយកជ័យជម្នះ ប៉ុន្តែលទ្ធផលការប្រកួតរបស់ពួកគេ នូវមិនទាន់ប្រកាសជាផ្លូវការនៅឡើយទេ គឺនៅរង់ចាំការពិនិត្យមើល និងការសម្រេចចុងក្រោយរបស់គណៈកម្មការ បច្ចេកទេស ពិសេសលោក វ៉ាត់ ចំរើន ដែលជាប្រធានសហព័ន្ធកីឡាចំបាប់កម្ពុជា។
នៅត្រង់ចំណុចនេះ លោក ធិន វិចិត្រ បានបញ្ជាក់ថា៖ «ការធ្វើតេស្តរបស់យើងនេះ យើងមិនទាន់ប្រកាសលទ្ធផលភ្លាមៗនោះទេ ព្រោះការធ្វើតេស្តនេះ យើងមានថតវីដេអូ ជាឯកសារ សម្រាប់យកទៅឲ្យ ឯកឧត្តមប្រធាន និងគណៈកម្មការបច្ចេកទេស ពិនិត្យមើលបន្ថែមទៀត ទើបយើងសម្រេចយកអ្នកត្រូវទៅប្រកួតកីឡាអាស៊ី ជាផ្លូវការ ព្រោះឯកឧត្តមប្រធាន បានថ្លែងថា ការធ្វើតេស្តជារឿងមួយ ឯការជ្រើសរើសជារឿងផ្សេងមួយទៀត ដើម្បីយើងអាចជ្រើសរើសបានអ្នកមានសមត្ថភាពពិតប្រាកដ ចេញទៅប្រកួតតំណាងឲ្យជាតិ ក្នុងការប្រកួតអន្តរជាតិ នានា»៕
