.jpg)
សូត្រ ប៊ុនធី បានចាប់បួង រួចបុកជង្គង់ទៅលើកីឡាករចិន Moserwooda បណ្តាលឲ្យសន្លប់ នៅ Mas Fight។ សហការី
ភ្នំពេញ៖ កីឡាករលំដាប់ឆ្នើមរបស់កម្ពុជា ៣ នាក់ មាន សូត្រ ប៊ុនធី ក្លិបបក្សីស្លាបដែក ឡុង សុវណ្ណឌឿន ក្លិបឡុងសាលវ័ន្តកីឡា និង រឿង សោភ័ណ្ឌ ក្លិបមកុដរាជសីហ៍ សុទ្ធតែបានផ្តួលអ្នកប្រដាល់ចិន បារាំង និងថៃ ឲ្យសន្លប់ ក្រោមរយៈពេល ៩ នាទី នៅ Mas Fight នៃសង្វៀនថោន កាលពីយប់ថ្ងៃអាទិត្យ ដើម្បីបានប្រាក់រង្វាន់ដ៏សន្ធឹកសន្ធាប់ដូចក្តីរំពឹង។ ចំណែក លី ភា និង ម៉ឺន មេឃា បានត្រឹមស្មើថៃ និងចិន។
ជាមួយគ្នានេះអ្នកប្រដាល់ លីភា ក្លិបប៉ែនកាក់បានលទ្ធផលស្មើជាមួយកីឡាករថៃ Piyanut Phongan របស់ថៃ និងកីឡាករម៉ឺន មេឃា សមាគម ប្រដាល់ក្រសួងការពារជាតិស្មើពិន្ទុជាមួយកីឡាករចិន Su Faming បានត្រឹមតម្លៃខ្លួនប៉ុណ្ណោះ។
សកម្មភាពប្រកួតដ៏ទាក់ទាញបំផុតនោះ សូត្រ ប៊ុនធី បានចំណាយពេលតស៊ូជិតអស់ ៩ នាទី ទើបអាចផ្តួលចិន Moserwooda ឲ្យសន្លប់បាន។ អ្នកទាំង ២ នេះបានប្រកួតយ៉ាងស្វិតស្វាញ ប៉ុន្តែនៅក្នុងនាទីទី ៩ ប៊ុនធី បានចាប់បុកជង្គង់ផ្ទួនៗ និងបន្ថែមដោយស្នៀតកែង នាំឲ្យ Moserwooda សន្លប់តែម្តង ហើយភ្លាមៗ ក្រោយប្រកាសលទ្ធផលជាផ្លូវការនោះ សូត្រ ប៊ុនធី ទទួលបានប្រាក់រង្វាន់បន្ថែមលើតម្លៃខ្លួនប្រកួតចំនួន ៦០០ ដុល្លារទៀត។
សូត្រ ប៊ុនធី បាននិយាយក្រោយការប្រកួតថា៖ «ខ្ញុំក៏អាចចូលសម្រុកផ្តួលតាំងពីដើមទឹកបានដែរ ប៉ុន្តែនៅខ្លាចញញើតក្បាច់កណ្តាប់ដៃ ព្រោះបើគេវាយចំ ខ្ញុំក៏អាចសន្លប់ដូចគ្នា ហេតុនេះខ្ញុំរង់ចាំមើលស្ថានភាព គឺអូសបន្លាយឲ្យគេស្រុតអស់កម្លាំងបន្តិច ទើបចូលចាប់ឱបវាយជង្គង់តែម្តង ហើយខ្ញុំធ្វើបានសម្រេចដូចបំណង»។
ចំណែកកីឡាករ ឡុង សុវណ្ណឌឿន ដែលមិនរំពឹងអាចផ្តួលកីឡាករថៃ Denkronbunriសោះនោះ បែរជាធ្វើបានល្អ ដោយចូលវាយសម្រុកភ្លាមៗ គឺប្តូរកែងគ្មានបង្អង់។ នៅក្នុងការប្រកួតពេញ ៩ នាទីនោះ សុវណ្ណឌឿន បានប្រើពេលអស់ជាង ៦ នាទី ទើបអាចផ្តួល Denkronbunri ឲ្យដេកស្អាត បន្ទាប់ពីរងកណ្តាប់ដៃ និងកែងផ្តួនៗ ហើយជ័យជម្នះនេះនាំឲ្យ សុវណ្ណឌឿន ទទួលបានប្រាក់រង្វាន់បន្ថែមចំនួន ២០០ ដុល្លារ។
ចំណែកគូឯកប្រចាំសប្តាហ៍ រឿង សោភ័ណ្ឌ បានប្រើពេលប្រមាណតែ ៣ វិនាទី ដោយការដាល់ចូលពោះ បណ្តាលឲ្យកីឡាករបារាំង Sam Sityodtong MTM ស្រុតកម្លាំង រហូតអាជ្ញាកណ្តាល អ៊ិន ខេមរិន្ទ បញ្ឈប់ការប្រកួត បន្ទាប់ពីបានធ្វើការរាប់ទៅលើបារាំងម្នាក់នេះ ១ លើក ប៉ុន្តែការផ្តួលគូប្រកួតឲ្យសន្លប់លើកនេះ ធ្វើឲ្យ រឿង សោភ័ណ្ឌ បានប្រាក់រង្វាន់បន្ថែមត្រឹម ២០០ ដុល្លារប៉ុណ្ណោះ។
រឿង សោភ័ណ្ឌ បាននិយាយក្រោយប្រកួតថា៖ «ពីដំបូងគិតថា លំបាកចូលវាយព្រោះគេខ្ពស់ជាងពេក ប៉ុន្តែតាមរយៈការសម្រុកមួយប្រាវ ធ្វើឲ្យខ្ញុំដឹងថា គេខ្សោយពោះ ទើបខ្ញុំចូលវាយបន្ថែម ផ្តួលគេឲ្យសន្លប់តែម្តងទៅ»។
ចំណែកកីឡាករ ម៉ឺន មេឃា ដែលប្រកួតជាមួយចិន Su Faming និង លី ភា ដែលប៉ះថៃ Piyanut មិនអាចផ្តួលដៃគូប្រកួតឲ្យសន្លប់នោះទេ ហើយតាមច្បាប់ប្រកួតរបស់សង្វៀន Mas Fight របស់ទូរទស្សន៍ថោន គឺទទួលបានលទ្ធផលស្មើគ្នា ដោយមិនគិតពីការផ្តល់ពិន្ទុនោះឡើយ។
លោក ស៊្រុន កុសល អ្នកគ្រប់គ្រងកម្មវិធី Mas Fight បានថ្លែងថា៖ «ប្រតិបត្តិការរៀបចំការប្រកួតនេះ យើងទទួលបានការគាំទ្រថវិកាពីវិស័យឯកជន គឺក្រុមហ៊ុន Khmer Beverages ហើយមហាជនចូលរួមទស្សនាយ៉ាងច្រើនកុះករពេញផ្ទៃសង្វៀនតែម្តង។ យើងនឹងរៀបចំធ្វើការប្រកួតដោយមានការផ្គូផ្គងពីដៃគូ Mas fight នៅហុងកុង ព្រមទាំងសហការជាមួយគណៈកម្មការសហព័ន្ធកីឡាប្រដាល់គុនខ្មែរ ដោយមានការឯកភាពពីភាគីស្ពនស័រផងដែរ ដើម្បីឲ្យកម្មវិធីប្រកួតនេះ ដំណើរការបានល្អ និងរលូន»៕
