.jpg)
កីឡាករ នន់ ជំនិត (ស្តាំ) ព្យាយាមការពារការវាយរបស់កីឡាករអាល់បានី Gen Ci។ យឺន ពន្លក
ភ្នំពេញ: កីឡាករជើងចាស់របស់កម្ពុជានន់ ជំនិត មកពីស្វាយរលំមានរិទ្ធ បានផ្តួលកីឡាករមកពីអាល់បានី Gen Ci ឲ្យសុំចុះចាញ់ក្នុងទឹកទី ៤ ក្នុងការប្រកួតប្រដាល់គុនខ្មែរមិត្តភាពអន្តរជាតិក្នុងព្រឹត្តិការណ៍កំពូលអ្នកប្រយុទ្ធ Boostrong Fighter on Fire របស់សង្វៀនអាស៊ីអាគ្នេយ៍ កាលពីព្រឹកថ្ងៃអាទិត្យ ទី ២៤ ខែមិថុនា ឆ្នាំ ២០១៨។
ចំណែកកីឡាករជើងថ្មីជំនាន់ក្រោយ ២ នាក់ដែលកំពុងមានឈ្មោះបោះសំឡេងគឺសុខ សារិន ក្លិបអេលីតគុនខ្មែរ បានផ្តួលកីឡាករ Pin Ngen ឲ្យសន្លប់ទឹក ១ ហើយកីឡាករសេង កុសល មកពីក្លិបមោងឫស្សី ខេត្តបាត់ដំបង បានផ្តួលកីឡាករថៃ ឲ្យសន្លប់ធំក្នុងទឹកទី ២។
នេះជាលទ្ធផលប្រកួតប្រចាំសប្តាហ៍មួយគួរឲ្យចាប់អារម្មណ៍ខ្លាំងបំផុត ខណៈដែលកីឡាករកម្ពុជាបានឈ្នះកីឡាករបរទេសទាំង ៣ គូ ពិសេសសមត្ថភាពកីឡាករជើងថ្មីវ័យក្មេងទម្ងន់ស្រាលកម្ពុជា ២ នាក់នេះ បានធ្វើឲ្យពួកគេមានឈ្មោះកាន់តែល្បី។ នន់ ជំនិត ដែលបាត់មុខពីសង្វៀនយូរ ហើយបច្ចុប្បន្នបានឡើងទម្ងន់ឡើងទៅប្រកួតនៅប្រភេទ ៧១ គីឡូក្រាម និងធ្វើបានយ៉ាងល្អ។
ក្នុងការប្រកួតចំនួន ៣ ទឹកដំបូង ជំនិត មានប្រៀបបន្តិចបន្តួចសឹងតែគ្រប់ទឹកទៅលើដៃគូគឺកីឡាករមកពីអាល់បានី Gen Ci មុននឹងវាយឲ្យដៃគូរបស់គេចុះចាញ់ក្នុងទឹកទី ៤។
ចំណែក សេង កុសល ដែលជាកីឡាករវ័យក្មេងមកពីខេត្តបាត់ដំបងនោះ ក៏បានវាយសម្រុកយ៉ាងខ្លាំងក្លាដោយមិនបន្ធូរដៃឲ្យដៃគូឡើយ។
នៅទឹកទី ១ កីឡាករ Sing Phunsai ទប់ទល់ និងវាយបកវិញបានល្អ ទៅលើសេង កុសល ប៉ុន្តែ ក្នុងការប្រកួតដ៏ជក់ចិត្តនេះបានឈានចូលទឹកទី ២ កីឡាករសេន កុសល នៅតែមិនបន្ធូរដៃ ឬបណ្តោយពេលវេលាល្អកន្លងផុតទេ ដោយគេបានចេញក្បាច់បន្ថែមមានទាត់ជង្គង់ព្រមទាំងស្នៀតកែងមុខកាណូតធ្វើឲ្យកីឡាករថៃ Sing Phunsai ដួលសន្លប់ធំតែម្តងដោយអាជ្ញាកណ្តាលមិនបានរាប់ឡើយ ពីព្រោះស្ថានភាពសន្លប់មានសភាពធ្ងន់ធ្ងរពេក។
ក្រោយពីទទួលបានលទ្ធផលដ៏ល្អបែបនេះ កីឡាករសេង កុសល បានប្រាប់ ភ្នំពេញប៉ុស្តិ៍ ឲ្យដឹងថា៖ «នេះជាលើកទី ១ ហើយដែលខ្ញុំបានឡើងប្រកួតជាលក្ខណៈអន្តរជាតិ ហើយខ្ញុំបានផ្តួលកីឡាករថៃក្នុងទឹក ២ នេះ និងពិតជាសប្បាយចិត្តខ្លាំងបំផុត ហើយសង្ឃឹមថានឹងបានឡើងប្រកួតលក្ខណៈអន្តរជាតិពេលក្រោយៗទៀតមិនខាន»។
ចំណែកលទ្ធផលពីការប្រកួតគូដណ្តើមខ្សែក្រវាត់ខារ៉ាបាវវគ្គជម្រុះ កាលពីល្ងាចថ្ងៃសៅរ៍ កីឡាករឈុត សេរីវ៉ាន់ថង បានឈ្នះថៃដោយពិន្ទុទទួលបាន ៣ ពិន្ទុបន្ថែមទៀតដូចអ្វីដែលត្រូវបានរំពឹងទុក ហើយកីឡាករធន់ មករា ឈ្នះបាន ៣ ពិន្ទុដែរដោយសារតែដៃគូអវត្តមាន និងជំនួសដោយការប្រកួតកម្តៅសាច់ដុំជាមួយថៃ៕
