.jpg)
ការប្រកួតបាល់បោះនារីដណ្តើមពានរង្វាន់ខេមអេដ ដែលបានដំណើរការប្រកួត កាលពីថ្ងៃអាទិត្យ។ សហការី
ភ្នំពេញ៖ និស្សិតនារីចំនួន ៨០ នាក់ របស់វិទ្យាស្ថានខេមអេដ បាននិងកំពុងធ្វើការប្រកួតប្រជែងគ្នា នៅលើទីលាន ក្នុងការប្រកួតកីឡាបាល់បោះនារីដណ្តើមពានរង្វាន់ខេមអេដ ប្រចាំឆ្នាំ ២០១៩ (CamEd Women''s Basketball Tournament 2019) ដើម្បីប្រជែងគ្នាក្លាយជាកីឡាការិនីឆ្នើម ដែលអាចជាប់ក្នុងជម្រើសរបស់សាលា សម្រាប់ត្រៀមការប្រកួតកីឡាសាកលវិទ្យាល័យ (University Games) លើកទី១ នៅឆ្នាំ ២០២០។
នៅក្នុងពិធីបើកការប្រកួតកាលពីព្រឹកថ្ងៃអាទិត្យ លោក Casey Barnett នាយកវិទ្យាស្ថានខេមអេដ និងជាអ្នកផ្តួចផ្តើមបង្កើតឲ្យមានការប្រកួតនេះឡើងបានថ្លែងថា ការប្រកួតឆ្នាំនេះប្រើរូបមន្តប្រកួត ៣ នាក់ ទល់ ៣ នាក់ ដោយ ១ ក្រុមមាន ៥ នាក់ ហើយនៅឆ្នាំនេះ មានក្រុមចូលរួមចំនួន ១៦ ស្មើនឹង ៨០ នាក់ គឺមានការកើនឡើងជាងឆ្នាំមុន។
លោក Casey បានបន្ថែមថា៖ «ការប្រើរូបមន្តប្រកួត ៣ នាក់ ទល់ ៣ នាក់ នេះ គឺជាយុទ្ធសាស្រ្តក្នុងការបណ្តុះបណ្តាលធនធាននារី និងជាការលើកទឹកចិត្តឲ្យនារី ចូលលេងកីឡាឲ្យបានកាន់តែច្រើន ហើយការខិតខំបង្កើនឲ្យមាននារីចូលរួមច្រើននេះ ដោយសារយើងទទួលបានការលើកទឹកចិត្តពីឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា គឺលោកឲ្យយើងបង្កើនចំនួននារីចូលលេងកីឡា ព្រោះក្រសួង នឹងរៀបចំការប្រកួតកីឡាសាកលវិទ្យា នៅរៀងរាល់ ២ ឆ្នាំម្តង ខណៈឆ្នាំ ២០២០ ជាការចាប់ផ្តើមលើកដំបូង»។
បន្ថែមទៅលើពង្រឹងគុណភាពលេងក្រុមបាល់បោះនារី ឲ្យបានកាន់តែប្រសើរ ដើម្បីឈានទៅរក្សាតំណែងជើងឯក ៣ សម័យកាល ដែលក្រុមបាល់បោះនារីខេមអេដ ដណ្តើមបានពីការប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសឆ្នាំនោះ លោក Casey ក៏នឹងរៀបចំឲ្យមានក្រុមហែលទឹក បន្ថែមទៅលើការប្រកួតបាល់បោះ (បុរស-នារី) បាល់ទាត់ (បុរស-នារី) និងអត្តពលកម្ម (បុរស-នារី) ព្រមទាំងពង្រឹងបន្ថែមលើការប្រកួតប៉េតង់ផងដែរ។
លោក Casey Barnett បានបញ្ជាក់ថា៖ «ឥឡូវនេះ យើងបានរៀបចំការហ្វឹកហាត់ កីឡាប៉េតង់ ព្រោះតាមរយៈការរៀបចំឲ្យមានការប្រកួតកន្លងមក យើងមើលឃើញថា កីឡាការិនីរបស់យើងមួយចំនួន មានសក្តានុពល និងលេងកីឡាប៉េតង់ បានពូកែអ៊ីចឹងបើពួកគេ បានហ្វឹកហាត់រយៈពេលយូរក៏អាចនឹងមានឱកាសក្លាយជាជម្រើសជាតិផងដែរ។
បន្ថែមពីលើនេះ និស្សិតរបស់យើង ក៏បានស្នើឲ្យយើង មានការប្រកួតកីឡាហែលទឹកផងដែរ ហេតុនេះយើងនឹងរៀបចំ ហើយរាល់ប្រភេទកីឡាទាំងអស់ ដែលយើងបានរៀបចំឲ្យមានការប្រកួត គឺយើងនឹង ដាក់ឲ្យចូលរួមក្នុងការប្រកួត កីឡាសាកលវិទ្យាល័យ នៅឆ្នាំ ២០២០»។
ជាមួយគ្នានេះលោក Casey បាននិយាយដែរថា ការជំរុញឲ្យនិស្សិតបានលេងកីឡា ជាការផ្តល់ឱកាសឲ្យពួកគេបានរៀនសូត្រពីការធ្វើការងារជាក្រុម មានបទពិសោធដឹកនាំ និងមានភាពអំណត់ ពេលពួកគេមានការងារធ្វើ៕
