.jpg)
មន្រ្តីបច្ចេកទេសខាងប្រដាល់ដែលបានចូលរួមសិក្ខាសាលា។ យឺន ពន្លក
ភ្នំពេញៈ សហព័ន្ធកីឡាប្រដាល់គុនខ្មែរ បានបើកសិក្ខាសាលា ស្តីពីការ «លើកកម្ពស់ក្រមសីលធម៌» មានរយៈពេល ៥ ថ្ងៃ គឺពីថ្ងៃទី ៦ ដល់ថ្ងៃទី ១០ ខែកញ្ញា ដើម្បីពង្រឹងសមត្ថភាពកីឡាករ គ្រូបង្វឹក និងមន្ត្រីបច្ចេកទេស ក្រោមឱវាទ កាលពីព្រឹកម្សិលមិញ នៅនាយកដ្ឋានអប់រំកាយ និងកីឡា នាពហុកីឡដ្ឋានជាតិអូឡាំពិកកម្ពុជា។
លោក តែម ម៉ឺន ប្រធានសហព័ន្ធប្រដាល់គុនខ្មែរ,លោកវេជ្ជបណ្ឌិត ឆឹង យ៉ៅយ៉េនប្រធានសហព័ន្ធកីឡាប្រដាល់សកលកម្ពុជា និងលោក ម៉ិល កាដូ អគ្គលេខាធិការសហព័ន្ធនិងជាអគ្គនាយករងកីឡា បានឡើងធ្វើជាវាគ្មិន ខណៈដែលមន្ត្រី ចៅក្រម អាជ្ញាកណ្តាល និងមន្ត្រីបច្ចេកទេសចំណុះឲ្យសហព័ន្ធទាំង ២ ត្រូវបានអនុញ្ញាតឲ្យ ចូលរួមជាង ១០០ នាក់។
លោក ម៉ិល កាដូ បានប្រាប់ភ្នំពេញ ប៉ុស្តិ៍ ថា៖ «នេះជាវគ្គមួយក្នុងចំណោមវគ្គចំនួន ៥ ប្រចាំឆ្នាំ ២០១៨ ដែលគាំទ្រថវិកាដោយក្រសួងអប់រំ យុវជន និងកីឡា ដោយក្នុងនោះមាន វគ្គបណ្តុះបណ្តាលសមត្ថភាពគ្រូបង្វឹក មានចំនួន ២ លើក វគ្គសិក្ខាសាលាចំនួន ២ លើក និងវគ្គផ្សព្វផ្សាយចំនួន ១ លើក។ ចំណែកវគ្គនេះ មានសិក្ខាកាម ១២៦ នាក់ ដែលជាគ្រូបង្វឹក ព្រមទាំងអាជ្ញាកណ្តាល ចៅក្រម មកពីសមាគម និងក្លិបទាំងអស់ គឺភាគច្រើនបំផុតនៅរាជធានីភ្នំពេញ»។
លោក តែម ម៉ឺន ឧទ្ទេសនាមជូនសិក្ខាកាម នូវក្រមសីលធម៌របស់កីឡាករ តួនាទីរបស់កីឡាករត្រូវគោរពតាមការសម្រេចចិត្តរបស់គណៈកម្មការប្រកួត ដោយមិនសម្តែងអាការៈមិនសមរម្យដាក់ទស្សនិកជន ក្រោយប្រកាសលទ្ធផល។ ជាមួយគ្នានេះកីឡាករត្រូវយល់ពីកាតព្វកិច្ចរបស់ខ្លួន គឺខំថែទាំសុខភាព ហ្វឹកហាត់ តាមកាលវិភាគ ដែលគ្រូដាក់ជូន និងឡើងប្រកួតអស់ពីសមត្ថភាព ចៀសវាងការធ្វើខុសពីច្បាប់។
លោក តែម ម៉ឺន បានបញ្ជាក់ប្រាប់ថា៖ «មន្ត្រី គ្រូបង្វឹក ដែលជាគណៈកម្មការ មានចៅក្រម អាជ្ញាកណ្តាល ក្នុងសហព័ន្ធប្រដាល់ទាំងអស់ គឺជាមន្ត្រីស័គ្រចិត្ត បម្រើការងារទៅតាមជំនាញ ទទួលតម្លៃពលកម្មតាមការព្រមព្រៀងគ្នា គឺគ្មានក្របខ័ណ្ឌជាមន្ត្រីរាជការទេ។ ហេតុនេះអ្នកណាពេញចិត្តធ្វើការបានសូមអញ្ជើញធ្វើ ចំណែកអ្នកណាមិនពេញចិត្តក៏ស្រេចតែចិត្ត គឺគ្មានបង្ខិតបង្ខំនោះឡើយ»។
ចំណែកលោក ឆឹង យៅយ៉េន បង្រៀនអំពីការងារគ្រប់គ្រងកីឡាករ ការអប់រំផ្នែកសុខភាពរបស់កីឡាករ ដោយមើលខុសត្រូវទាំងមុនប្រកួត ពេលប្រកួត និងក្រោយប្រកួត ព្រមទាំងតាមដានសុខភាព គឺមិនអនុញ្ញាតឲ្យកីឡាករឡើងប្រកួតទាំងឈឺ ដោយសារចង់បានលុយនោះឡើយ។
លោក ឆឹង យ៉ៅយ៉េន ក៏បានរំឭកពីការប្រើប្រាស់សង្គមហ្វេសប៊ុក ដែលគប្បីត្រូវគោរពសិទ្ធិគេដទៃផង ព្រោះកន្លងមកក្នុងពិភពប្រដាល់របស់យើង ចេះតែមានការទម្លាយព័ត៌មានខុសពីការពិត ធ្វើឲ្យប៉ះពាល់ដល់ស្ថាប័ន និងថ្នាក់ដឹកនាំយើងមួយចំនួន។
លោកបានបន្ថែមថា៖ «ជាការពិតណាស់គ្រប់សហព័ន្ធ សមាគម ក្លិប កើតឡើងដោយមានការចូលរួមរបស់អ្នកស្ម័គ្រចិត្ត ហេតុនេះអ្នកស្ម័គ្រចិត្ត ជាធាតុមួយយ៉ាងសំខាន់។ កន្លងមក យើងធ្លាប់ ប្រើ ពាក្យថា «អ្នកស្ម័គ្រចិត្ត» ប៉ុន្តែវត្ថុបំណង និយមន័យ តួនាទីភារកិច្ចកាតព្វកិច្ចរបស់អ្នកស្ម័គ្រចិត្តយើង ពុំទាន់យល់ឲ្យបានស៊ីជម្រៅ ជាពិសេសគឺក្រមសីលធម៌នេះតែម្តង។ អ៊ីចឹងសម្រាប់សិក្ខាសាលាពេលនេះ យើងមានឳកាសស្វែងរកឲ្យឃើញនូវ ចំណុចខ្វះខាត ជាពិសេស គឺ ក្រមសីលធម៌ នៃការអនុវត្តការងារ ត្រូវពង្រឹងឲ្យកាន់តែមានប្រសិទ្ធភាពខ្ពស់»៕
