ទីក្រុងលូសាន៖ ទីភ្នាក់ងារប្រឆាំងសារធាតុលើកកម្លាំងពិភពលោក (WADA) កាលពីថ្ងៃចន្ទបានដាក់បម្រាមប្រទេស រុស្ស៊ី រយៈពេល ៤ ឆ្នាំ មិនឲ្យចូលរួមព្រឹត្តិការណ៍កីឡាសំខាន់ៗពិភពលោករួមទាំងការប្រកួតអូឡាំពិកក្រុងតូក្យូ ឆ្នាំ ២០២០ និងព្រឹត្តិការណ៍ World Cup ២០២២ រៀបចំនៅប្រទេស កាតា ផងដែរពាក់ព័ន្ធនឹងទិន្នន័យសារធាតុលើកកម្លាំងដែលធ្វើឲ្យប្រធានាធិបតីរុស្ស៊ីលោក Vladimir Putin ខឹងសម្បាចំពោះបម្រាមនេះ។
គណៈកម្មាធិការប្រតិបត្តិទីភ្នាក់ងារ WADA ដែលបានជួបប្រជុំនៅទីក្រុងលូសាន ប្រទេស ស្វ៊ីស បានសម្រេចដាក់បម្រាម ៤ ឆ្នាំ ទៅលើប្រទេស រុស្ស៊ី ក្រោយពីបានចោទប្រទេសនេះថា បានក្លែងទិន្នន័យពីមន្ទីរពិសោធន៍សារធាតុលើកកម្លាំងដែលត្រូវបានប្រគល់ទៅឲ្យក្រុមអ្នកស៊ើបអង្កេតនៅដើមឆ្នាំ ២០១៩ នេះ។
ទណ្ឌកម្មដ៏តឹងតែងបំផុតមិនធ្លាប់មានទៅលើមន្ត្រីអាជ្ញាធរប្រទេស រុស្ស៊ី នេះនឹងធ្វើឲ្យមន្ត្រីរដ្ឋាភិបាលមិនអាចចូលរួមព្រឹត្តិការណ៍សំខាន់ៗ ខណៈប្រទេសនេះនឹងបាត់បង់សិទ្ធិក្នុងការរៀបចំ ឬដេញថ្លៃរៀបចំព្រឹត្តិការណ៍កីឡា។
ប្រធានទីភ្នាក់ងារ WADA លោក Craig Reedie បាននិយាយថា៖ «អស់រយៈពេលជាយូរមកហើយ ដែលគេបានទុកពេលឲ្យប្រទេស រុស្ស៊ី បោសសម្អាតពីបញ្ហានេះ»។
ប្រធាន WADA រូបនេះបានបន្ថែមថា៖ «ប្រទេស រុស្ស៊ី ត្រូវបានគេទុកពេលឲ្យកែកំហុសឡើងវិញ ដើម្បីចូលរួមនឹងសហគមន៍ប្រឆាំងសារធាតុលើកកម្លាំងពិភពលោកនេះឡើងវិញ ប៉ុន្តែប្រទេសនេះបានសម្រេចបន្តទង្វើបែបនេះព្រមទាំងបដិសេធមិនទទួលកំហុសទៀតផង»។
តាមទណ្ឌកម្មនេះ កីឡាករ-កីឡាការិនីរុស្ស៊ីនឹងនៅតែអនុញ្ញាតឲ្យចូលរួមការប្រកួតអូឡាំពិកនៅឆ្នាំក្រោយ និងអូឡាំពិករដូវត្រជាក់នៅទីក្រុងប៉េកាំង ឆ្នាំ ២០២២ប្រសិនបើទីភ្នាក់ងារ WADA ជឿជាក់ថា ពួកគេមិនពាក់ព័ន្ធនឹងប្រព័ន្ធសារធាតុលើកកម្លាំងដែលគាំទ្រដោយរដ្ឋាភិបាលនេះ។
ប្រទេស រុស្ស៊ី ក៏នឹងអនុញ្ញាតឲ្យចូលរួមប្រកួតនៅវគ្គជម្រុះសម្រាប់ World Cup 2022 ផងដែរ ប៉ុន្តែអគ្គនាយក WADA លោក Olivier Niggli បានបន្ថែមថា ប្រសិនបើពួកគេឡើងដល់ជុំចុងក្រោយនៅប្រទេស កាតា «ក្រុមនេះនឹងមិនតំណាងឲ្យសហព័ន្ធបាល់ទាត់រុស្ស៊ីនោះទេ»។
ការចូលរួមរបស់ប្រទេស រុស្ស៊ី នៅយូរ៉ូឆ្នាំ ២០២០ ដែលនឹងត្រូវរៀបចំការប្រកួត ៤ លើកនៅទីក្រុង Saint Peterburg នោះនឹងមិនប៉ះពាល់ដែរ ព្រោះវាមិនត្រូវបានកំណត់ជាព្រឹត្តិការណ៍សំខាន់សម្រាប់បំណងប្រឆាំងសារធាតុលើកកម្លាំងនេះទេ។
ថ្លែងនៅក្នុងទីក្រុងប៉ារីស ប្រធានាធិបតីរុស្ស៊ីលោក ពូទីន បានរិះគន់ការសម្រេចចិត្តនេះថាជាមាន «ហេតុផលនយោបាយ» ដែលវាបាន «ផ្ទុយ» នឹងធម្មនុញ្ញប្រកួតអូឡាំពិក។
លោក ពូទីន បានបន្ថែមថា៖ «គ្មានអ្វីត្រូវស្ដីបន្ទោសគណៈកម្មាធិការអូឡាំពិករុស្ស៊ីនោះទេ ហើយប្រសិនបើគ្មានអ្វីត្រូវស្ដីបន្ទោសចំពោះគណៈកម្មាធិការនេះទេ ប្រទេសនេះគួរតែចូលរួមការប្រកួតក្រោមទង់ជាតិរបស់ខ្លួន»។
នាយករដ្ឋមន្ត្រីរុស្ស៊ីលោក Dmitry Medvedev ក៏បាននិយាយដែរថា បម្រាមនេះគឺមានហេតុផលនយោបាយ ហើយលោកបានប្រាប់ទីភ្នាក់ងារព័ត៌មានក្នុងស្រុកថា៖ «នេះជាការបន្តការប្រឆាំងប្រទេស រុស្ស៊ី ដែលកំពុងមានរួចទៅហើយនេះ»៕ AFP/SN