ភ្នំពេញ៖ អ្នកលេងកណ្តាប់ដៃវ័យក្មេង ពេជ្រ ប៊ុនសិដ្ឋ ដែលត្រូវបានវាយតម្លៃមុនការប្រកួតថា មានសមត្ថភាពនៅស្ទើរ និងខ្ចីជាងបេក្ខភាព ៣ នាក់ផ្សេងទៀត នៅក្នុងការប្រកួតម៉ារ៉ាតុងដណ្តើមប្រាក់លានទម្ងន់ ៥៤ គីឡូក្រាមនោះ បែរជាបង្កើតបាននូវភាពអស្ចារ្យ ដែលគ្មានអ្នកណាម្នាក់នឹកស្មានដល់ បន្ទាប់ពីរូបគេបានទម្លាក់ជើងខ្លាំង ជាម្ចាស់មេដាយសំរឹទ្ធស៊ីហ្គេម ខេម ចាន់ រួចបានបន្តទៅផ្តួល ឃួន ឡាំកូនស៊ីន ឲ្យសន្លប់ធំ ដើម្បីក្លាយជាម្ចាស់ប្រាក់លានចំនួន ៣,៤ លានរៀល នៅលើសង្វៀនថោននោះ។
ការចាប់ឆ្នោតប៉ះជើងខ្លាំង ខេម ចាន់ នៅវគ្គជម្រុះ ៣ ទឹកកាលពីថ្ងៃអាទិត្យ នោះ បានធ្វើឲ្យមានការលើកឡើងមុន ការប្រកួតថា ប៊ុនសិដ្ឋ អាចនឹងសន្លប់ ឬក៏ចាញ់ដោយពិន្ទុដាច់ដោយគ្មានអ្វីត្រូវសង្ស័យនោះទេ ព្រោះ ខេម ចាន់ ជាបេក្ខភាព មានសមត្ថភាពខ្ពស់ជាងគេនៅក្នុងចំណោមបេក្ខភាពទាំង ៤ នាក់នេះ ប៉ុន្តែតាមរយៈការប្រកួតដ៏ស្វិតស្វាញនោះ ប៊ុនសិដ្ឋ បែរជាអាចយកឈ្នះលើ ខេម ចាន់ ដោយពិន្ទុដាច់ ៥-០។
លោក ពេជ្រ សុផាន់ ជាគ្រូបង្វឹកបាននិយាយថា៖ «នៅពេលជួបជាមួយជើងខ្លាំង ខេម ចាន់ ខ្ញុំរំពឹងឈ្នះតិចណាស់ ប៉ុន្តែការប្រកួតជាក់ស្តែង វាវ៉ៃឆ្លាត ដោយចេញចូល និងគេចបានលឿន ធ្វើឲ្យវាឈ្នះពិន្ទុដាច់តែម្តង។ ជាមួយគ្នានេះ ទោះបីឃើញមានប្រៀបជាង ខេម ចាន់ ខ្ញុំក៏មិនទាន់ប្រាកដក្នុងចិត្តថា គេលើកដៃឬអត់? ប៉ុន្តែការសម្រេចក្តីនៅសង្វៀនថោន គឺយុត្តិធម៌ល្អណាស់ សុំយកជាគំរូ»។
បន្ថែមលើភាពអស្ចារ្យនេះ ការឡើងទៅជួប ឃួន ឡាំកូស៊ីន ដែលបានទម្លាក់ម្ចាស់មេដាយសំរឹទ្ធ ហ៊ឹម គឹមរៀង ដោយការឈ្នះពិន្ទុមិនឯកច្ឆន្ទ ៣-២ នៅវគ្គផ្តាច់ព្រ័ត្រមានត្រឹម ១ ទឹក ស្មើ ៩ នាទីនោះ ការបញ្ចេញកណ្តាប់របស់ ពេជ្រ ប៊ុនសិដ្ឋ កាន់តែមានប្រសិទ្ធភាព ដោយរូបគេបានម៉ាត់ឆ្វេងចូលថ្គាមបណ្តាលឲ្យ ឡាំកូស៊ីន សន្លប់ធំ ដោយប្រើរយៈពេលត្រឹម ៥:២០ នាទី ដើម្បីក្លាយជាម្ចាស់ជើងឯក។
ជាមួយជ័យជម្នះនេះ ពេជ្រ ប៊ុនសិដ្ឋ បាននិយាយថា៖ «ខ្ញុំពិតជាសប្បាយចិត្តខ្លាំង ដែលប្រកួតឈ្នះ ហើយការសន្លប់របស់ ឃួន ឡាំកូស៊ីន អាចមកពីគាត់ភ្លាត់ស្នៀត ព្រោះគាត់ភ្លេចបិទ ធ្វើឲ្យខ្ញុំអាចម៉ាត់ឆ្វេងចូលថ្គាម»។ ចំណែកលោក ពេជ្រ សុផាន់ បន្ថែមថា៖ «ខ្ញុំមិនហ៊ានអួតទេ ព្រោះ ប៊ុនសិដ្ឋ នៅខ្ចីណាស់ តែបន្តិចទៀត គេនឹងរឹងមាំខ្លាំងជាងនេះ»។
ជាមួយគ្នានេះលោក សាន់ សៅយ៉ាន់ ជាគ្រូបង្វឹក ឃួន ឡាំកូស៊ីន បានប្រាប់ថា៖ «ការចាញ់របស់ ឡាំកូស៊ីន នេះ គឺខ្ញុំអស់ចិត្ត ព្រោះការប្រកួតវ៉ៃប្តូរគ្នាបែបនេះ ប្រឈមខ្ពស់ណាស់ទៅនឹងការសន្លប់បែបនេះ ប៉ុន្តែខ្ញុំគិតថា នៅពេលខាងមុខ ឡាំកូស៊ីន នឹងអាចប្រកួតសងសឹកម្តងទៀតបាន»។
យ៉ាងណាមិញ ឃួន ឡាំកូស៊ីន ដែលសន្លប់រហូតមិនអាចឡើងទៅទទួលប្រាក់រង្វាន់ ១,៨ លានរៀល ចំពោះការចាញ់នោះ បាននិយាយថា៖ «ខ្ញុំចាញ់ទាំងមិនអស់ចិត្ត ព្រោះវាលឿនពេក មិនដឹងត្រូវអី។ ពេលគេវាយឲ្យរាប់ម្តង អត់សូវអីទេ ព្រោះគ្រាន់តែវិល និងទន់ជើង អាចងើបឡើងបាន ប៉ុន្តែចុងក្រោយនេះ អត់ដឹងអីតែម្តង គឺងងឹតមុខឈឹង»។
ចំណែក លោក ជួប វុត្ថា ពិធីករប្រចាំសង្វៀនថោន បាននិយាយថា៖ «ការប្រកួតដែលមានផ្សាយផ្ទាល់តាមហ្វេសប៊ុកនោះ ទទួលបានការខមមិន ពីអ្នកទស្សនាជាច្រើន ដោយពួកគាត់ពេញចិត្ត និងការប្រកួត Mas Fight Cambodia នេះ ហើយការសម្រេចសេចក្តីពីគណៈកម្មការធ្វើឡើងក្នុងតម្លាភាព និងយុត្តិធម៌ គឺមហាជនបានកោតសរសើរដល់មន្ត្រីបច្ចេកទេសរបស់សហព័ន្ធប្រដាល់គុនខ្មែរយើង ពិសេសសមាសភាពកីឡាករ ដែលយើងជ្រើសរើសមកប្រកួតត្រូវបានសម្រិតសម្រាំង ក្រោមការឯកភាពគ្នា ទាំងគណៈកម្មការផ្គូផ្គង ខាងម្ចាស់សង្វៀន អ្នកគ្រប់គ្រង និងខាងស្ពនស័រផងដែរ»៕