.jpg)
សន្និសីទកាសែត ស្តីពីការប្រកួត កម្ពុជាសង្វៀនគុនខ្មែរ នៅស្ថានីយទូរទស្សន៍ CNC កាលពីព្រឹកថ្ងៃសុក្រ។
ភ្នំពេញ៖ ក្រុមហ៊ុន CBS របស់ស្ថានីយទូរទស្សន៍ CNC, CTN និង MyTV បានចាប់ដៃជាមួយក្រុមហ៊ុនស្រាបៀរកម្ពុជា ដើម្បីបង្កើតឲ្យមានកម្មវិធីប្រកួតប្រដាល់ថ្មីមួយទៀត ឈ្មោះថា «កម្ពុជាសង្វៀនគុនខ្មែរ» ហើយព្រឹត្តិការណ៍ថ្មីនេះ មានរូបមន្តប្រកួតប្លែកគួរឲ្យចាប់អារម្មណ៍ ហើយអ្នកឈ្នះតំណែងជើងឯក បានទទួលទាំងប្រាក់រង្វាន់ និងម៉ូតូ Zoomer X មួយគ្រឿងទៀតផង។
ទាក់ទងទៅនឹងការប្រកួតនេះ លោក ស៊ីថូ ណាថាន់ ប្រធានក្រុមហ៊ុន CBS បាននិយាយ ក្នុងសន្និសីទកាសែត កាលពីព្រឹកថ្ងៃសុក្រនេះថា៖ «នេះជាមោទនភាពថ្មីមួយទៀតរបស់ក្រុមហ៊ុន CBS ដែលបានសហការគ្នាជាមួយក្រុមហ៊ុនស្រាបៀរកម្ពុជា ក្នុងការផលិតកម្មវិធីប្រដាល់កម្ពុជាសង្វៀនគុនខ្មែរ នេះឡើង ហើយនិតិវិធីនៃការរៀបចំ គឺមានការប្លែក និងមានន័យទាំងសម្រាប់កីឡាករ និងបងប្អូនទស្សនិកជន ដែលត្រូវតាមដាន»។
តាមខ្លឹមសារ ដែលត្រូវបានប្រកាស នៅក្នុងសន្និសីទកាសែត នៅស្ថានីយទូរទស្សន៍ CNC កាលពីព្រឹកថ្ងៃសុក្រនេះ បានឲ្យដឹងថា ព្រឹត្តិការណ៍ «កម្ពុជាសង្វៀនគុនខ្មែរ» បានសម្រិតសម្រាំងកីឡាករកម្ពុជាស្ថិតក្នុងកម្រិត B ចំនួន ៨នាក់ និងកីឡាករបរទេសចំនួន ៨ នាក់ ដើម្បីឲ្យប្រកួតគ្នា។
ចំពោះរូបមន្តប្រកួតវិញ ត្រូវបានលោក ស៊ីថូ ណាថាន់ រៀបរាប់ថា កីឡាករកម្ពុជា និងបរទេស ទាំង ១៨ នាក់នោះ ត្រូវបានចែកការប្រកួតជា ២ គ្រុប (Group) គឺគ្រុបទី ១ មានកីឡាករខ្មែរ ៤ នាក់ និងកីឡាករបរទេស ៤ នាក់ ដែលត្រូវប្រកួតជម្រុះចាញ់ធ្លាក់ៗ ដើម្បីរកអ្នកបានចំណាត់ថ្នាក់លេខ ១ ប្រចាំគ្រុបនេះ ឡើងទៅប្រកួតផ្តាច់ព្រ័ត្រជាមួយអ្នកបានលេខ ១ នៅគ្រុបទី ២ ដែលមានការប្រកួតជម្រុះដូចគ្នា ទៅនឹងគ្រុបទី ១ ដែរ។
ជាមួយគ្នានេះ អ្នកទទួលបានចំណាត់ថ្នាក់លេខ ១ ក្នុងគ្រុបនីមួយៗ នឹងទទួលបានប្រាក់រង្វាន់ ៥០០ ដុល្លារ និងម៉ូតូ Zoomer X មួយគ្រឿង ឯអ្នកលេខ ២ បាន ២០០០ ដុល្លារ លេខ ៣ បាន ១៥០០ ដុល្លារ និងលេខ ៤ បាន ១០០០ ដុល្លារ។ រីឯការប្រកួតផ្តាច់ព្រ័ត្ររវាងអ្នកលេខ ១ គ្រុបទី ១ និងគ្រុបទី ២ គឺអ្នកឈ្នះបានតំណែងជើងឯកជាម្ចាស់ខ្សែក្រវាត់ នឹងទទួលបានប្រាក់រង្វាន់ចំនួន ៦០០០ ដុល្លារទៀត ហើយអ្នកចាញ់ បាន ៣០០០ ដុល្លារ ផងដែរ។
ចំណែកលោក វ៉ាន់ដាវីត ស៊ីធីគន្ធ អ្នកគ្រប់គ្រងម៉ាករបស់ស្រាបៀរកម្ពុជា បានថ្លែងថា៖«ស្រាបៀរកម្ពុជា ជាក្រុមហ៊ុនរបស់កូនខ្មែរ ១០០ ភាគរយ ដូច្នេះហើយទើបយើងបានគាំទ្រ និងឧបត្ថម្ភទៅក្នុងកម្មវិធីប្រកួតប្រដាល់ កម្ពុជាសង្វៀនគុនខ្មែរ នេះ ហើយយើងនឹងនៅតែបន្តជួយគាំទ្រនៅក្នុងកម្មវិធីនេះ»។
ជាមួយគ្នានេះ លោក ឆឹង យ៉ៅយ៉េន អនុប្រធានសហព័ន្ធប្រដាល់គុនខ្មែរ បានសម្តែងការស្វាគមន៍យ៉ាងកក់ក្តៅ ចំពោះការបង្កើតមានព្រឹត្តិការណ៍ប្រដាល់ថ្មីនេះឡើង។ លោកបានថ្លែងថា៖«ខ្ញុំសូមថ្លែងអំណរគុណដល់ខាងស្រាបៀរកម្ពុជា និងក្រុមហ៊ុន CBS ដែលបានសហការជាមួយសហព័ន្ធកីឡាប្រដាល់គុនខ្មែរ ក្នុងការបង្កើតឲ្យមានព្រឹត្តិការណ៍ប្រដាល់នេះឡើង ហើយតាមរយៈការប្រកួតនេះ វាបានចូលរួមជួយជំរុញ និងអភិរក្សលើវិស័យកីឡាគុនខ្មែរនេះ ដើម្បីជាទិសដៅ ឆ្ពោះទៅកាន់ការប្រកួតស៊ីហ្គេម ឆ្នាំ២០២៣ នៅកម្ពុជា»។
លោក បានបន្ថែមថា៖«ព្រឹត្តិការណ៍នេះ ក៏បានចូលរួមជួយលើកស្ទួយកម្រិតជីវភាពគ្រួសាររបស់កីឡាករ និងគណៈកម្មការបច្ចេកទេស របស់យើងផងដែរ ហេតុនេះសូមប្អូនៗជាកីឡាករ ត្រូវខំប្រឹងប្រែងប្រកួតឲ្យអស់ពីសមត្ថភាព ដើម្បីបង្ហាញឲ្យឃើញពីភាពអស្ចារ្យ នៅក្នុងការប្រកួតនេះ ហើយគណៈកម្មការបច្ចេកទេសរបស់យើង ត្រូវបំពេញការងារឲ្យបានសុក្រឹត យុត្តិធម៌ ដើម្បីធ្វើឲ្យការប្រកួត ដំណើរការទៅបានរលូន»។
គួរបញ្ជាក់ថា ព្រឹត្តិការណ៍ «កម្ពុជាសង្វៀនគុនខ្មែរ» ក្នុងប្រភេទទម្ងន់៦០គីឡូក្រាមនេះ នឹងចាប់ដំណើរការប្រកួត នៅព្រឹកម៉ោង៨ រហូតដល់ ម៉ោង១០ ថ្ងៃសៅរ៍ស្អែកនេះ ដែលជាការប្រកួតជម្រុះបើកឆាករវាងកីឡាករកម្ពុជា និងថៃ ក្នុងគ្រុបទី១ ដោយក្នុងនោះ ឡូញ វ៉ាន់ឌី ត្រូវប៉ះថៃ Nakrub ហើយ អេលីត សាន់ ត្រូវជួបថៃ Phitnam Ek។ ក្រៅពីគូខ្សែក្រវាត់នេះ ក៏មានការប្រកួតគូអន្តរជាតិមិត្តភាពរវាង បាង កាយ៉ាក និងកីឡាករអ៊ីរ៉ង់ Ghodratisraskan ក្នុងទម្ងន់៥៧គីឡូក្រាម ផងដែរ៕
