ម៉ា្រឌីដ៖ ក្រុម Real Madrid រងបរាជ័យយ៉ាងអាម៉ាស់ ក្នុងលទ្ធផល ៤-០ ក្រោមថ្វីជើងរបស់ក្រុមម្ចាស់ផ្ទះ Valencia អំឡុងការប្រកួត ក្របខ័ណ្ឌ La Liga កាលពីថ្ងៃអាទិត្យ ដោយក្នុងនោះខ្សែបម្រើ Carlos Soler ធ្វើបានហ៊ែតទ្រីក (ស៊ុត ៣ គ្រាប់) ពីការស៊ុតបាល់ប៉េណាល់ទី ៣ លើក។
ក្រុម Real មានឱកាសនាំមុខក្រុមម្ចាស់ផ្ទះ ដោយ Karim Benzema តែការផ្ដល់កាដូ ៤ លើកឱ្យក្រុម Valencia សម្រាប់ការប្រកួតនៅកីឡដ្ឋាន Mestalla ដូចជាការពិន័យទាត់បាល់ ១១ ម៉ែត្រ ដល់ទៅ ៣ លើក និងការធ្វើឱ្យចូលទីខ្លួនឯងពី Raphael Varane ១ គ្រាប់ គ្រប់គ្រាន់បន្ថែមការចាញ់ដ៏គួរឱ្យភ្ញាក់ផ្អើលដល់ក្រុមជើងឯកចាស់។
គ្រូបង្វឹករបស់ក្រុម Real លោក Zinedine Zidane បាននិយាយថា៖ «គ្មានការពន្យល់ហេតុផល និងលេសអ្វីទាំងអស់។ វាជាការប្រកួតដ៏អាក្រក់ និងថ្ងៃដ៏អាក្រក់»។
នេះជាលើកទី១ ដែលក្រុមអធិរាជស របូតដល់ទៅ ៤ គ្រាប់ គិតតាំងពីត្រូវក្រុមគូប្រជែងស្លាប់រស់ Barcelona ស៊ុតស្ពឹកមុខ ៥ គ្រាប់ កាលពីខែតុលា ឆ្នាំ ២០១៨ ហើយវាក៏ជាការរាំងស្ទះនូវទម្រង់ប្រសើរឡើងវិញរបស់ពួកគេ ក្រោយការចាប់ផ្ដើមរាងទ្រេតទ្រោត នាដើមរដូវកាលនេះ។
ក្រោយប្រកួតចាញ់ជាប់ៗគ្នា ដោយសារ Cadiz និង Shakhtar Donestsk កាលពីខែមុន ក្រុមរបស់លោក Zidane ហាក់ដូចជាល្អឡើងវិញ ១ កម្រិត ដោយការយកឈ្នះទាំងប្រកួតក្នុងស្រុក និងតំបន់អឺរ៉ុប លើក្រុម Barca, Huesca និង Inter Milan។
តែលទ្ធផលនេះ បានធ្វើឱ្យមានសម្ពាធម្ដងទៀតលើក្រុម មុនសម្រាកប្រកួតអន្តរជាតិរបស់ក្រុមជម្រើសជាតិ ដោយឥឡូវនេះ Real នៅលេខ ៤ ក្នុងតារាងពិន្ទុរបស់ La Liga ជាមួយនឹង ១៦ ពិន្ទុ ពោល គឺតាមពីក្រោយក្រុមទីកំពូល Real Sociedad ៤ ពិន្ទុ។
នៅមានបញ្ហា ១ ទៀត ដែលធ្វើឱ្យលោក Zidane មានអារម្មណ៍មិនស្រួល ប្រហែលនឹងបរាជ័យនេះដែរ នោះគឺ Benzema របួសក្រលៀន ដែលអាចនឹងធ្វើឱ្យរូបគេបាត់មុខនៅប្រកួតក្រោយ ដោយលោកបានប្រាប់ខ្លីៗថា៖ «គ្រប់យ៉ាង បានកើតឡើងចំពោះក្រុមយើង»៕ AFP/VN