ភ្នំពេញ: ក្លិបបាល់ទាត់ភ្នំពេញក្រោន កាលពីថ្ងៃចន្ទ បានចេញសេចក្តីថ្លែងការណ៍មួយ ដើម្បីជំទាស់ទៅនឹងកីឡាកររបស់ខ្លួនចំនួន ៥ នាក់ ដែលក្លិបវិសាខា ទើបបានប្រកាស និងបង្ហាញមុខថា ជាសមាជិកថ្មី កាលពីយប់ថ្ងៃអាទិត្យ។ ភ្នំពេញក្រោន បានចាត់ទុកការចាកចេញរបស់កីឡាករទាំង ៥ នាក់នោះ គឺធ្វើឡើងដោយគ្មានការពិភាក្សាជាមួយក្លិបភ្នំពេញក្រោន និងគ្មានការបង់ថ្លៃសំណងនៃការខិតខំបណ្តុះបណ្តាលដល់ក្លិប អ្វីទាំងអស់។
នៅក្នុងសេចក្តីថ្លែងការណ៍ដ៏វែងអន្លាយនោះ ក្លិបភ្នំពេញក្រោន បានរាប់រៀបលើការខិតខំបណ្តុះយុវជនថ្នាល និងការចំណាយផ្សេងទៅលើកីឡាករ ស៊ិន កក្កដា, អ៊ិន សុដាវីត, អ៊ុក សុវណ្ណ, គឹម ឆៃយ៉ា និង កែន ចាន់សុភ័ក្ដ ដែលទើបទៅរួមរស់ជាមួយក្លិបវិសាខា គឺក្នុងរយៈពេលបណ្តុះបណ្តាលជាង ៥ ឆ្នាំនេះ ភ្នំពេញក្រោន បានចំណាយទៅលើពួកគេទាំងការបង់ ថ្លៃ សាលារៀន ការស្នាក់នៅ ការ ហូបចុក ការហ្វឹកហាត់ សំបុត្រយន្តហោះធ្វើដំណើរក្នុងពេលបោះជំរំហ្វឹកហាត់នានា ក៏ដូចជាការប្រកួតអន្តរជាតិផ្សេងៗ រួមទាំងសេវាសុខភាពផងដែរ។
«កីឡាករទាំង ៥ នាក់នេះ បានចូលហ្វឹកហាត់នៅសាលាបណ្តុះបណ្តាលបាល់ទាត់ភ្នំពេញក្រោនកាលពីឆ្នាំ ២០១១ និងឆ្នាំ ២០១៣ ដោយមានអាណាព្យាបាលបានចុះកិច្ចសន្យាទាក់ទងទៅនឹងការទទួលស្គាល់តម្លៃសំណង លើការបណ្តុះបណ្តាល ផងដែរ។ ជាង នេះទៅទៀត ក្រោយមកក្លិបក៏បានផ្តល់កិច្ចសន្យាថ្មី លើស ទៅនឹងតម្លៃពលកម្ម លើកិច្ចសន្យាចាស់ នៅពេលដែលក្លិបបានផ្តល់ជូនកីឡាករទាំង ៥ នាក់ ក្នុងការឡើងទៅលេងក្នុងក្រុមធំ ដោយផ្អែកលើលក្ខខណ្ឌចរចារបស់សហព័ន្ធបាល់ទាត់ពិភពលោកហ្វីហ្វា (FIFA)»។
សេចក្តីថ្លែងការណ៍ដដែល នេះបានបន្តថា៖ «ប៉ុន្តែក្រោយរដូវកាលឆ្នាំ ២០១៨ បានបញ្ចប់ភ្លាម ពួកគេបានសម្រេចចិត្តចាកចេញ ដោយមិនមានការពិភាក្សាជាមួយក្លិបភ្នំពេញក្រោន រួមទាំងដោយមិនមានការបង់ថ្លៃលើសំណងអភិវឌ្ឍន៍សម្រាប់ក្លិបភ្នំពេញក្រោន ដែលធ្លាប់បានចំណាយធនធានទៅលើពួកគេ ស្របទៅតាមលក្ខខណ្ឌព្រមព្រៀង ដែលត្រូវបានទទួលស្គាល់ដោយគូភាគីកន្លងមកនោះឡើយ»។
ជាមួយគ្នានេះ ក្លិបភ្នំពេញក្រោន បានអះអាងថា បានដាក់លិខិតជូនទៅគណៈកម្មការជាតិរៀបចំការប្រកួតបាល់ទាត់កម្ពុជា និងសហព័ន្ធកីឡាបាល់ទាត់កម្ពុជាជុំវិញបញ្ហានេះផងដែរ ដោយភ្ជាប់ជាមួយច្បាប់លក្ខខណ្ឌនៃសំណងការអភិវឌ្ឍ រួមទាំងឯកសារយោងផ្សេងៗទៀត អមដោយកិច្ចសន្យារបស់កីឡាករទាំង ៥ នាក់ និងអាណាព្យាបាលរបស់ពួកគេផងដែរ។
បន្ថែមលើនេះ ភ្នំពេញក្រោន បានចាត់ទុក ស្ថានភាពបែបនេះថា ជាក្តីបារម្ភ១ និងជាផលវិបាករបស់វិស័យបាល់ទាត់កម្ពុជា ដោយហេតុថា ប្រសិនបើកីឡាករ ដែលទទួលការបណ្តុះបណ្តាលដោយក្លិប ប៉ុន្តែបែរជាចាកចេញដោយមិនមានសំណងអភិវឌ្ឍន៍អ្វីសោះបែបនេះ វាគឺជាសញ្ញានៃការដើរថយក្រោយនៃដំណើរការអភិវឌ្ឍបាល់ទាត់ ព្រោះនាពេលអនាគតអាចនឹងមិនមានក្លិបបាល់ទាត់ណាមួយហ៊ានចំណាយធនធានដើម្បីជំរុញការអភិវឌ្ឍបាល់ទាត់ថ្នាលទៀតឡើយ ព្រោះ អាចនឹងជួបប្រទះផលវិបាកដូច អ្វីដែលភ្នំពេញក្រោនកំពុងទទួលរង។
នៅពេលនេះក្លិបកំពុងរង់ចាំដំណោះស្រាយពីសហព័ន្ធ តែបើគ្មានដំណោះស្រាយលើការបង់សំណងពីក្លិបវិសាខាទេនោះ ពួកគេនឹងដកខ្លួន។
«ក្លិបនឹងមិនចេញលិខិតអនុញ្ញាតសម្រាប់កីឡាករណាម្នាក់ដែលស្ថិតក្នុងគម្រោងនៃការបណ្តុះបណ្តាលថ្នាលរបស់ភ្នំពេញក្រោនទៅកាន់ក្លិបដទៃដោយមិនមានតម្លៃសំណងអភិវឌ្ឍន៍នោះឡើយ ហើយប្រសិនបើបញ្ហានេះ មិនត្រូវបានដោះស្រាយ ដោយសមស្របទេ ក្លិបភ្នំពេញក្រោន នឹងបញ្ឈប់សកម្មភាពអភិវឌ្ឍន៍បាល់ទាត់ថ្នាលទាំងអស់ ហើយនឹងប្រកាសដកខ្លួនចេញពីការប្រកួតលីកកំពូលកម្ពុជា ឬមិត្តហ្វូនខេមបូឌានលីកផងដែរ»។
ការបញ្ជាក់ជំហរនេះ ត្រូវបានក្លិបភ្នំពេញក្រោនបន្ថែមថា ដើម្បីការពារបេសកកម្មអភិវឌ្ឍន៍បាល់ទាត់ថ្នាល និងជំរុញឲ្យក្លិបបាល់ទាត់ផ្សេងៗទៀត អនុវត្តការបណ្តុះបណ្តាលថ្នាលបន្ថែមទៀត ដើម្បីធានាឲ្យមានការប្រកួតប្រជែងក្នុងលីកកាន់តែខ្លាំងក្លា នាពេលអនាគត ព្រមទាំងរួមចំណែកកសាង និងពង្រឹងធនធានកីឡាករកម្ពុជាថែមទៀតផង។
ជុំវិញសេចក្តីថ្លែងការណ៍របស់ក្លិបភ្នំពេញក្រោននេះ លោក ហុក សុចិត្រា អ្នកចាត់ការទូទៅក្លិបបាល់ទាត់វិសាខា បានប្រាប់ភ្នំពេញប៉ុស្តិ៍ កាលពីថ្ងៃចន្ទថា៖ «កីឡាករទាំងអស់ ដែលមកខ្ញុំ គឺពួកគាត់បានកាន់កុងត្រាបញ្ចប់ការលេងជាមួយក្លិបភ្នំពេញក្រោន មកជួបខ្ញុំ ទើបខ្ញុំទទួលយកពួកគាត់ ហើយឯកសារទាំងអស់នោះបានទៅដល់សហព័ន្ធហើយ អ៊ីចឹងយើងរង់ចាំការដោះស្រាយ និងសម្របសម្រួលពីសហព័ន្ធ ដោយសារសហព័ន្ធ មានច្បាប់ជុំវិញការដោះដូរកីឡាករ ក្នុងការប្រកួតលីកកំពូលកម្ពុជានេះ»។
គួរបញ្ជាក់ថា នៅក្នុងសន្និសីទកាសែត នៅសណ្ឋាគារ ហួង សាន កាលពីថ្ងៃអាទិត្យ ក្លិបវិសាខាបានប្រកាស និងបង្ហាញសមាជិកថ្មីចំនួន ១២ នាក់ ដើម្បីត្រៀមការប្រកួតលីកកំពូលកម្ពុជា និងការប្រកួតពានរង្វាន់សម្តេច ហ៊ុន សែន រដូវកាលថ្មី ឆ្នាំ ២០១៩ ហើយកីឡាករទាំងនោះមាន ស៊ិន កក្កដា ខ្សែប្រយុទ្ធ អ៊ិន សុដាវីត ខ្សែការពារ អ៊ុក សុវណ្ណ ខ្សែការពារ គឹម ឆៃយ៉ា ខ្សែការពារ កែន ចាន់សុភ័ក្ដ ដែលពួកគេជាអតីតកីឡាកររបស់ក្លិបភ្នំពេញក្រោន។
ចំណែកកីឡាករ ៧ នាក់ទៀតមានខ្សែបម្រើប្រយុទ្ធ សារី ម៉ាត់ណូរ៉ូទីន និងខ្សែការពារ ឆេង ម៉េង ដែលធ្លាប់លេងឲ្យក្លិបណាហ្គាវើល រួមទាំងខ្សែការពារ ផុន តៃនិញ ខ្សែបម្រើ ឡុង ម៉េងហាវ ខ្សែបម្រើ ទូច គឹមឆាយ ខ្សែប្រយុទ្ធ ទៀត គឹមហេង និងអ្នកចាំទី គង់ ពីលុត ដែលពួកគេជាអតីតកីឡាករធ្លាប់ហ្វឹកហាត់រួមគ្នានៅមជ្ឈមណ្ឌល និងសាលា បាល់ទាត់ជាតិបាទី របស់សហព័ន្ធកីឡាបាល់ទាត់កម្ពុជា។
បន្ថែមទៅលើការបង្ហាញសមាជិកថ្មីទាំង ១២ នាក់ ដែលត្រូវបានធ្វើឡើង ក្រោមអធិបតីភាពដ៏ខ្ពង់ខ្ពស់របស់លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ រួមទាំងថ្នាក់ដឹកនាំជាច្រើនរូបទៀត កាលពីយប់ថ្ងៃអាទិត្យនោះ លោក ស សុខា ដែលជាកូនប្រុសរបស់លោក ស ខេង ក៏បានប្រកាសពីការតែងតែងភរិយារបស់លោកគឺលោកជំទាវ កែ សួនសុភី ឲ្យឡើងធ្វើជាប្រធានក្លិបបាល់ទាត់វិសាខា ជំនួសរូបលោកផងដែរ។
ទាក់ទងទៅនឹងការប្រកាសផ្ទេរ តំណែងប្រធានក្លិបទៅឲ្យភរិយានេះ លោក ស សុខា ដែលជារដ្ឋលេខាធិការក្រសួងអប់រំ យុវជន និងកីឡា ផងនោះ បានប្រាប់ពីមូលហេតុថា ដោយសារលោកមានភារកិច្ចមមាញឹកច្រើនក្នុងការងាររួមចំណែកអភិវឌ្ឍន៍សង្គមជាតិ ទើបលោកពុំមានពេលវេលាគ្រប់គ្រាន់ ក្នុងការដឹកនាំក្លិប ប៉ុន្ដែលោក ស សុខា បានសន្យានឹងឆ្លៀតពេលប្រាស្រ័យទាក់ទងជាមួយថ្នាក់ដឹកនាំក្លិប និងក្រុមការងារជានិច្ច ដើម្បីលើកទឹកចិត្ត និងបន្ដជំរុញការអភិវឌ្ឍក្លិបវិសាខាឲ្យមានការរីកចម្រើនជានិរន្ដរ៍៕