.jpg)
ម៉ន សាម៉េត និង ធន់ អៀងឡៃ បានត្រឹមស្មើគ្នា និងចែកប្រាក់រង្វាន់នៅថោន។ សហការី
ភ្នំពេញ៖ កីឡាករជើងចាស់ ម៉ន សាម៉េត មកពីក្លិបកងចក្ររាជសីហ៍ និង ធន់ អៀងឡៃ របស់សមាគមប្រដាល់កងយោធពលខេមរភូមិន្ទ ពិតជាមិនអាចផ្តួលគ្នាឲ្យសន្លប់ក្នុងរយៈពេល ៩ នាទី ដើម្បីក្លាយជាម្ចាស់ជើងឯកនៅក្នុងការប្រកួតម៉ារ៉ាតុងដណ្តើមប្រាក់លាននៃកម្មវិធី Mas Fight Cambodia នៅលើសង្វៀនថោនបាននោះទេ គឺពួកគេបានត្រឹមស្មើ និងចែកប្រាក់រង្វាន់ជា ២ ហើយលទ្ធផលនេះ បានធ្វើឲ្យអ្នកតាមដានទស្សនាមិនអស់ចិត្ត។
តាមរយៈការប្រកួតកាលពីថ្ងៃអាទិត្យនោះ ម៉ន សាម៉េត បានយកឈ្នះ យុគ យក្សផ្លែ ក្នុងវគ្គជម្រុះ ៣ ទឹក រីឯ ធន់ អៀងឡៃ បានឈ្នះ សេក គឹមសាន្ត ដូចគ្នា ដើម្បីឡើងទៅជួបគ្នានៅវគ្គផ្តាច់ព្រ័ត្រ ប៉ុន្តែតាមរយៈការប្រកួតចំនួន ៩ នាទីពេញ តាមច្បាប់ Mas Fight នោះ អ្នកទាំង ២ មិនអាចផ្តួលគ្នាឲ្យសន្លប់នោះ គឺបានត្រឹមស្មើគ្នា តាមច្បាប់ប្រកួត និងចែកប្រាក់រង្វាន់ជា ២ ស្មើគ្នា។
យ៉ាងណាក៏ដោយ ជុំវិញការមិនអាចផ្តួល ធន់ អៀងឡៃ ឲ្យសន្លប់នេះ ម៉ន សាម៉េត បានប្រាប់ភ្នំពេញប៉ុស្តិ៍ ក្រោយការប្រកួតថា៖ «ខ្ញុំទទួលស្គាល់ថា ធន់ អៀងឡៃ ឥឡូវល្អជាងមុនមែន គឺគេមានកម្លាំងរឹងមាំ ដែលវាយទប់ទល់ និងដកថយច្រើន ដែលជាហេតុនាំឲ្យខ្ញុំលំបាកចូលវាយសម្រុកផ្តួលគេបាន។
ជាមួយគ្នានេះ ម៉ន សាម៉េត បានទម្លាយអាថ៌កំបាំងពិតប្រាកដថា៖ «តាមពិត ខ្ញុំមានសុខភាពមិនសូវល្អ កម្លាំងធ្លាក់ចុះ និងឈឺសាច់ដុំ ដោយសារតែការហ្វឹកហាត់ខ្លាំង និងឡើងប្រកួតសឹងតែរាល់សប្តាហ៍ ប៉ុន្តែបញ្ហានេះ ខ្ញុំមិនអាចប្រាប់គេឲ្យដឹងមុននោះទេ ព្រោះកុំឲ្យដៃគូដឹង ឬខូចកម្មវិធីរបស់គេ ដែលត្រៀមយូរមកហើយនោះ»។
អ្នកប្រដាល់ជើងចាស់រូបនេះបានបន្ថែមថា៖ «កម្លាំងរបស់ខ្ញុំ គឺអាចវាយបានត្រឹមឈ្នះពិន្ទុប៉ុណ្ណោះ ហើយការព្យាយាម មិនវាយប្តូរសម្រុកខ្លាំងរបស់ ធន់ អៀងឡៃ គឺនាំឲ្យខ្ញុំលំបាក ចូលវាយសម្រុក ដោយខ្លាចភ្លាត់ស្នៀតសន្លប់របស់គេវិញ។ ខ្ញុំគិតថា បើចូលវាយសម្រុកខ្លាំង ខ្ញុំនឹងអស់ថាមពលមិនខាន គឺនាំឲ្យសន្លប់ក្រោមស្នៀតជង្គង់របស់គេ ហេតុនេះវាយចេញផង និងប្រឹងទប់ការពារផងដែរ ប៉ុន្តែបើមានចៅក្រមដាក់ពិន្ទុដូចប្រដាល់គុនខ្មែរ ខ្ញុំវ៉ៃស្រង់ពិន្ទុយកឈ្នះបាន»។
ចំណែកលោក ម៉ាង ម៉ន ជាឪពុក និងជាគ្រូបង្វឹកបាននិយាយថា៖ «ខ្ញុំមិនអាចបន្ទោសបានទេ ព្រោះ អាម៉េត មានវ័យចាស់ ថែមទាំងកូន ២ កម្លាំងពិតជាធ្លាក់ចុះជាងមុន អ៊ីចឹងបើវាយសម្រុក មិនប្រយ័ត្ន និងប្រើស្នៀតការពារឲ្យបានល្អទេនោះ អាចចាញ់គេបាន ឬសន្លប់ផងដែរ ហេតុនេះយើងវាយចាំស្រង់ដែរ ប៉ុន្តែខាង ធន់ អៀងឡៃ ក៏ញញើតយើង មិនហ៊ានសម្រុកខ្លាំងដូចគ្នា»។
លោក ធន់ សុភា គ្រូបង្វឹករបស់ ធន់ អៀងឡៃ បានប្រាប់ថា៖ «អៀងឡៃ ធ្លាប់ចាញ់ ម៉ន សាម៉េត ហេតុនេះមិនហ៊ានចូលប្រថុយប្រថាននោះទេ គឺវាយក្នុងលក្ខណៈបច្ចេកទេស តាមប្លង់និយាយទៅខ្លាចភ្លាត់ស្នៀតដូចគ្នា។ តាមពិតបើពួកគេវាយសម្រុកខ្លាំងនោះ ក៏មិនងាយនឹងចាញ់ឈ្នះដោយសន្លប់ដែរ ព្រោះសុទ្ធតែជាកីឡាករហ្វឹកហាត់បានល្អ គោរពវិន័យល្អ មានបទពិសោធច្រើនលើសង្វៀន អ៊ីចឹងការចាញ់ឬឈ្នះ សុទ្ធតែមានស្នៀតការពារខ្លួនល្អដូចគ្នា មិនមែនវាយលក្ខណៈផ្សងព្រេងដូចជើងថ្មីថ្មោងនោះឡើយ»។
អ្នកទស្សនាភាគច្រើន ព្រមទាំងគណៈកម្មការ និងពិធីករ សុទ្ធតែបញ្ចេញមតិយោបល់តាំងពីមុនពេលប្រកួត ដោយរំពឹងថា អ្នកទាំង ២ នេះ នឹងស្មើគ្នាតាមច្បាប់ Mas Fight ហើយលទ្ធផល គឺដូច្នេះមែន។ តាមរយៈការស្មើគ្នានេះ ម៉ន សាម៉េត និង ធន់ អៀងឡៃ ទទួលបានប្រាក់រង្វាន់ចំនួន ២ លានរៀលស្មើៗគ្នា៕
