ភ្នំពេញៈ គ្រូបង្វឹកក្រុមជម្រើសជាតិម៉ាឡេស៊ី លោក Tan Cheng Hoe បានបង្ហាញពីទំនុកចិត្តខ្ពស់ ក្នុងការយកឈ្នះក្រុមម្ចាស់ផ្ទះកម្ពុជា ក្នុងការប្រកួតបើកឆាកប្រចាំពូល A ពានរង្វាន់ AFF Suzuki Cup 2018 នៅពហុកីឡដ្ឋានជាតិ នាល្ងាចម៉ោង ៦:៣០ ថ្ងៃព្រហស្បតិ៍នេះ ប៉ុន្តែលោក Felix Augustin ក៏រំពឹងលើក្រុមកម្ពុជាដែរ។
ក្នុងសន្និសីទកាសែត ស្តីពីការប្រកួតនេះ កាលពីថ្ងៃពុធ លោក Felix Augustin គ្រូបង្វឹកក្រុមជម្រើសជាតិកម្ពុជា បានបង្ហាញពីចំណុចរីកចម្រើនរបស់កូនក្រុមលោក។ បើទោះបីជា កម្ពុជា ធ្លាប់បានចាញ់ក្រុមម៉ាឡេស៊ី ៣-១ ក្នុងការប្រកួតមិត្តភាព នៅពហុកីឡដ្ឋានជាតិនេះ កាលពីថ្ងៃទី ១០ ខែកញ្ញា ឆ្នាំ ២០១៨ ប៉ុន្តែលោក Felix បង្ហើបថា លោកបានស្វែងយល់ពីក្រុមម៉ាឡេស៊ី បានច្រើនជាងមុន ហើយក៏បានកែប្រែកំហុសឆ្គងរបស់ក្រុមកម្ពុជា បានល្អជាងមុនផងដែរ។
លោក Felix បាននិយាយថា៖ «តាមរយៈការប្រកួតមិត្តភាពជាមួយម៉ាឡេស៊ី កន្លងមក គឺយើងរៀនសូត្របន្ថែមបានច្រើន សម្រាប់ការប្រកួតលើកនេះ ហើយយើងក៏បានសិក្សា និងស្វែងយល់បន្ថែមទៅលើកំហុសឆ្គងនានារបស់ក្រុមយើងផងដែរ ព្រោះយើងបាន ប្រឹងប្រែងខ្លាំងជាងមុន ហេតុនេះជំនួបលើកនេះ នឹងក្លាយជាការប្រកួតដ៏ល្អមួយ ហើយយើងក៏រំពឹងថា អ្នកគាំទ្រជាច្រើននឹងមកគាំទ្រ លើកទឹកចិត្តបន្ថែមទៀតដល់ពួកយើង»។
គ្រូបង្វឹកជនជាតិអាហ្សង់ទីនរូបនេះ បានបន្ថែមថា៖ «យើងសង្ឃឹមថា កំហុសឆ្លងកន្លងមក យើងនឹងធ្វើបានល្អ ព្រោះយើងដឹងហើយថា ម៉ាឡេស៊ី ជាក្រុមខ្លាំងមួយ ដែលអាចមានលទ្ធភាពឈ្នះពាននេះផងដែរ អ៊ីចឹងយើង ត្រូវតែប្រឹងប្រែងលេងឲ្យអស់ពីលទ្ធភាព។ ចំពោះគុណភាពកម្លាំងកីឡាករ យើងនឹងរៀបចំឲ្យមានតុល្យភាព តាំងពីការចាប់ផ្តើម ដល់នាទីទី ៩០ ព្រោះលើកនេះ យើងត្រៀមខ្លួនបានវែងជាងមុន»។
ចំណែកឯខ្សែការពារ សឿយ វិសាល បាននិយាយថា៖ «គិតមកដល់ពេលនេះ យើងបានយល់ច្រើនទៅលើទម្រង់លេងរបស់ក្រុម និងមានការយល់ចិត្តគ្នាច្រើន ព្រោះយើងបានប្រឹងប្រែងហ្វឹកហាត់ជាមួយគ្នា។ បើទោះបីជាយើងធ្លាប់បានចាញ់ ៣-១ កន្លងមកមែន តែការប្រកួតនោះ បានជួយឲ្យយើងអាចដកស្រង់បានបទពិសោធ និងស្វែងយល់ពីក្រុមម៉ាឡេស៊ី បានច្រើនជាងមុន ចំណែកការប្រកួតលើកនេះ យើងបានត្រៀមរួចជាស្រេច ហើយពួកយើងប្តេជ្ញាចិត្តថា នឹងយកជ័យជម្នះឲ្យបាន»។
បើទោះបីជា សឿយ វិសាល មានការប្តេជ្ញាចិត្តបែបនេះ ប៉ុន្តែ គ្រូបង្វឹកក្រុមម៉ាឡេស៊ីមិនបានចាត់ទុកកម្ពុជា ជាឧបសគ្គធំ ដែលអាចរារាំងពួកគេ ក្នុងការឆ្ពោះទៅកាន់វគ្គបន្តនោះទេ គឺនៅក្នុងពូល A នេះ លោក Tan Cheng Hoe មានការបារម្ភតែទៅលើក្រុមវៀតណាម និងមីយ៉ាន់ម៉ា ប៉ុណ្ណោះ។
ជាមួយគ្នានេះលោក Tan Cheng Hoe មានការរំពឹងថា កីឡាករចំណូលថ្មីរបស់លោក នឹងជួយឲ្យក្រុមលេងបានល្អ នឹងយកឈ្នះក្រុមកម្ពុជា ពិសេសខ្សែបម្រើប្រយុទ្ធជនជាតិ Gambia កម្ពស់ ១,៧៩ ម៉ែត្រ Mohamadou Sumareh ដែលទើបទទួលបានសញ្ជាតិម៉ាឡេស៊ី ហើយ កីឡាករ ពាក់លេខ ២៦ ដែលមានភាពលេចធ្លោខ្លាំងរូបនេះ ធ្លាប់ជាមិត្តរួមក្លិបរបស់ ចាន់ វឌ្ឍនាកា ពេលពួកគេលេងឲ្យ Pahang FA។
លោក Tan Cheng Hoe បាននិយាយថា៖ «យើងដឹងហើយថា នេះជាការប្រកួតផ្លូវការ មិនមែនការប្រកួតមិត្តភាពដូចមុនទេ ហើយលើកនេះយើងបានបញ្ចូលកីឡាករថ្មី ១០ រូប ដូចជា Mohamadou Sumareh ជាដើម។ ខ្ញុំសង្ឃឹមថា គាត់នឹងធ្វើបានល្អ ដើម្បីផ្តល់ឥទ្ធិពលទៅដល់ការលេងយ៉ាងល្អនៅក្នុងក្រុម និងធ្វើឲ្យមានស្មារតីលេងកាន់តែខ្លាំងក្នុងក្រុម ព្រោះយើងមកនេះ ដើម្បីទទួលបានផលជាវិជ្ជមាន គឺការទទួលបាន ៣ ពិន្ទុ»៕