ភ្នំពេញ: អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានរំឭកដល់ក្រុមប្រណាំងកង់ឲ្យស្គាល់ពីខ្លួនឯងថា ជាអ្នកជំនាញ និងបានចាត់ទុកវគ្គបណ្តុះបណ្តាល គ្រូបង្វឹកថ្នាល និងអត្តពលិកវ័យក្មេង កីឡាទោចក្រយានថា ជាពន្លឺដែលនាំផ្លូវឲ្យក្រុមកង់ឆ្ពោះទៅរកភាពជោគជ័យ ហើយថ្នាក់ដឹកនាំសហព័ន្ធខ្មែរកីឡាទោចក្រយានក៏បានទទួចសុំឲ្យសិក្ខាកាម បន្តមានសាមគ្គីភាព រួមចិត្ត រួមធ្វើ និងរួមទទួលខុសត្រូវដើម្បីជំរុញឲ្យកីឡាប្រណាំងកង់អាចទទួលបានលទ្ធផលក្នុងការប្រកួតស៊ីហ្គេមនៅឆ្នាំ ២០២៣ ផងដែរ។
ថ្លែងនៅក្នុងពិធីបិទវគ្គបណ្តុះបណ្តាលគ្រូបង្វឹកថ្នាល និងអត្តពលិកវ័យក្មេង កីឡាទោចក្រយាននៅទីស្នាក់ការ NOCC កាលពីថ្ងៃចន្ទលោក វ៉ាត់ ចំរើន បានលើកឡើងថា៖ «អ្វីដែលសំខាន់នៅថ្ងៃនេះគឺសិក្ខាកាមទាំងអស់ទោះមានអាយុច្រើនក្តី តិចក្តី ត្រូវច្បាស់ខ្លួនឯងថា យើងជាអ្នកជំនាញ អ៊ីចឹងបើយើងធ្វើការក្នុងជំនាញហើយ តែមិនចេះជំនាញមិនដឹងជាអភិវឌ្ឍយ៉ាងម៉េចទេ!»។
លោក វ៉ាត់ ចំរើន បានបន្ថែមថា៖ «ទ្រឹស្តីជំនាញស្រួលទេ ប៉ុន្តែការអនុវត្តជំនាញមានការពិបាកព្រោះការអនុវត្ត វាមានភាពទន់ភ្លន់គឺជំនាញបូកជាមួយភាពប៉ិនប្រសប់រួមទាំងចំណុចសំខាន់ជាច្រើនទៀត ប៉ុន្តែវគ្គសិក្សានេះជាពន្លឺនាំផ្លូវយើងទៅរកភាពជោគជ័យនៅក្នុងជំនាញ។ មានតែការបណ្តុះបណ្តាល និងការអប់រំទេដែលផ្តល់ឲ្យយើងនូវឯកទេសច្បាស់លាស់ អ៊ីចឹងសូមសិក្ខាកាមទាំងអស់ដែលបានចូលរួមក្នុងវគ្គនេះ សូមចែករំលែកជំនាញនេះទៅឲ្យអ្នកជិះកង់របស់យើង តែត្រូវមានឆន្ទៈក្នុងការសាកល្បង និងការអនុវត្ត ទើបយើងទទួលបានផលប្រយោជន៍»។
ជាមួយគ្នានេះលោកឧកញ៉ា វង្ស ខាន់ពៅ ដែលជាអគ្គលេខាធិការសហព័ន្ធខ្មែរកីឡាទោចក្រយានបានធ្វើការទទួចសុំឲ្យគ្រូបង្វឹក និងអត្តពលិកប្រណាំងកង់ តាំង ៣៨ នាក់ (៣នាក់) មកពីក្លិបចំនួន ៧ ដែលបានចូលរួមក្នុងវគ្គបណ្តុះបណ្តាលនេះបន្តឲ្យមាននូវសាមគ្គីភាព រួមធ្វើ និងរួមទទួលខុសត្រូវ ដើម្បីជំរុញឲ្យកីឡាប្រណាំងកង់អាចទទួលបានលទ្ធផលល្អពេលកម្ពុជាធ្វើជាម្ចាស់ផ្ទះស៊ីហ្គេមនៅឆ្នាំ ២០២៣។
លោក វង្ស ខាន់ពៅ បានថ្លែងនៅក្នុងពិធីបិទវគ្គបណ្តុះបណ្តាលកាលពីថ្ងៃចន្ទនោះថា៖ «តាមរយៈការសិក្សាទាំងទ្រឹស្តី និងការធ្វើតេស្តផ្ទាល់ទាំងក្រុមកង់ភ្នំ និងក្រុមកង់គួកគឺសិក្ខាកាមទាំងអស់បានយកចិត្តទុកដាក់ និងទទួលនូវចំណេះដឹង ជំនាញ និងបច្ចេកទេសបានល្អប្រសើរពីវគ្គនេះ ពិសេសពួកគាត់គោរពវិន័យបានល្អធ្វើឲ្យវគ្គបណ្តុះបណ្តាលនេះទទួលបាននូវភាពកក់ក្តៅ និងប្រព្រឹត្តទៅបានរលូន»។
អគ្គលេខាធិការជាអ្នកនិយមការជិះកង់ និងប្រណាំងម៉ូតូហោះរូបនេះបានបន្ថែមថា៖ «តាងនាមឲ្យសហព័ន្ធខ្មែរកីឡាទោចក្រយាន និងរូបខ្ញុំផ្ទាល់គឺយើងនឹងខិតខំប្រឹងប្រែងរៀបចំវគ្គបណ្តុះបណ្តាលគ្រូបង្វឹកគ្រប់កម្រិតថ្នាក់ជាតិ និងអន្តរជាតិ ហើយយើងនឹងជំរុញគ្រូបង្វឹកថ្នាក់ជាតិឲ្យទទួលបាននូវការបណ្តុះបណ្តាលនៅក្រៅប្រទេស ដើម្បីក្លាយជាគ្រូបង្វឹកអន្តរជាតិបន្ថែមទៀត»។
ទោះបីជាយ៉ាងណាលោក វង្ស ខាន់ពៅ បានទទូចសុំដល់សិក្ខាកាមចូលរួមទាំងអស់យ៉ាងដូច្នេះថា៖ «ខ្ញុំសូមឲ្យសិក្ខាកាមទាំងអស់បន្តឲ្យមាននូវសាមគ្គីភាព រួមចិត្ត រួមធ្វើ និងរួមទទួលខុសត្រូវក្នុងន័យរួមគ្នាអភិវឌ្ឍវិស័យកីឡាប្រណាំងកង់ឲ្យបានជោគជ័យ និងមានសក្តានុពលទាំងការប្រកួតថ្នាក់ជាតិ និងអន្តរជាតិ ដើម្បីឆ្ពោះទៅកាន់ការប្រកួតស៊ីហ្គេមឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ»៕