ក្រុងម៉ូណាកូ: ការ​ដេញ​ថ្លៃ​មួយ​របស់​ប្រទេស​នៅ​ទ្វីប​អាហ្វ្រិក​ដើម្បី​រៀបចំ​ព្រឹត្តិការណ៍​កីឡា​អូឡាំពិក​ជា​លើក​ទី​១​នឹង​ទទួល​បាន​ការ​គាំទ្រ​ជាទូទៅ​ក្នុង​គណៈកម្មាធិការ​អូឡាំពិក​អន្តរជាតិ (IOC) ក្រោយពី​ការ​កែទម្រង់​ថ្មី​របស់​ខ្លួន​។ នេះ​បើ​យោង​ទៅ​តាម​ការ​បញ្ជាក់​របស់​លោក Thomas Bach ដែល​ជា​ប្រធាន IOC កាលពី​ថ្ងៃ​ពុធ​ម្សិលមិញ​។ ខណៈ​ដែល​ទីក្រុង Durban ក្នុង​ប្រទេស​អាហ្វ្រិក​ខាង​ត្បូង កំពុងតែ​ពិចារណា​ទៅលើ​ការ​ដេញ​ថ្លៃ​ធ្វើ​ជា​ម្ចាស់ផ្ទះ​រៀបចំ​ព្រឹត្តិការណ៍​អូឡាំពិក​ឆ្នាំ​២០២៤ លោក Bach បាន​ប្រាប់ AFP ក្នុង​កិច្ចសម្ភាសន៍​មួយ​ថា វា​អាស្រ័យ​ទៅលើ​ទ្វីប​អាហ្វ្រិក​ក្នុង​ការ​ធ្វើឲ្យ​ករណី​នេះ «អាច​កើតឡើង​»​។