ភ្នំពេញ៖ សិក្ខាកាម ២៥ នាក់ ត្រូវបានចាត់ទុកថា ជាក្រុមអាជ្ញាកណ្តាលមូលដ្ឋានថ្នាក់ជាតិ ដែលទទួលស្គាល់ដោយសហព័ន្ធកីឡាវាយកូនឃ្លីលើតុកម្ពុជា និងក្រសួងអប់រំ យុវជន និងកីឡា បន្ទាប់ពីអ្នកទាំងនេះ បានបញ្ចប់វគ្គបណ្តុះបណ្តាលអាជ្ញាកណ្តាលថ្នាក់ជាតិ ដែលបានធ្វើឡើងចំនួន ៥ ថ្ងៃ និងបានបញ្ចប់កាលពីថ្ងៃពុធ។
វគ្គបណ្តុះបណ្តាលនេះត្រូវបានធ្វើឡើង ក្រោមកញ្ចប់ថវិការបស់ក្រសួងអប់រំ យុវជន និងកីឡា ហើយពិធីបិទវគ្គនៅសាលដំបូលទូក នៃពហុកីឡដ្ឋានជាតិ កាលពីថ្ងៃពុធនោះ ត្រូវបានធ្វើឡើងក្រោមវត្តមានរបស់លោកនាយឧត្តមសេនីយ៍ គៀត ច័ន្ទថារិទ្ធ ដែលទើបត្រូវបានជ្រើសតាំងជាប្រធានសហព័ន្ធកីឡាវាយកូនឃ្លីលើតុកម្ពុជា។
នៅក្នុងពីធីបិទវគ្គបណ្តុះបណ្តាលបច្ចេកទេសដល់ក្រុមអាជ្ញាកណ្តាលកីឡាវាយកូនឃ្លីលើតុកម្រិតមូលដ្ឋាន ដែលមានរយៈពេល ៥ ថ្ងៃនេះ ត្រូវបានអង្គសិក្ខាសាលាវាយតម្លៃថា សិក្ខាកាម ៨០ ភាគរយ ទទួលបាននិទ្ទេសល្អ ខណៈវគ្គនេះបង្រៀនដោយលោកគ្រូ ស៊ុន រតនា ជាអាជ្ញាកណ្តាលកម្រិតអន្តរជាតិរបស់កម្ពុជា ដែលលោកបានប្រឡងជាប់កីឡាវាយកូនឃ្លីលើតុនេះ តាំងពីឆ្នាំ ២០១០ មកម្ល៉េះ។
លោក ស៊ុន សុទ្ធារិទ្ធ ជាអគ្គលេខាធិការសហព័ន្ធកីឡាវាយកូនឃ្លីលើតុកម្ពុជាបាននិយាយនៅក្នុងពិធីបិទ្ធវគ្គនោះថា៖ «វគ្គបណ្តុះបណ្តាលបច្ចេកទេសអាជ្ញាកណ្តាលនេះ សហព័ន្ធមានគោលបំណងចង់ពង្រឹងសមត្ថភាពអាជ្ញាកណ្តាលថ្នាក់ជាតិឲ្យបានរឹងមាំ និងមានចំណេះដឹងពិតប្រាកដ ហើយបន្ទាប់មកយើងនឹងជំរុញពួកគាត់ឲ្យបង្កើនសមត្ថភាពក្លាយជាអាជ្ញាកណ្តាលកម្រិតអន្តរជាតិទៅតាមភាពជាក់ស្តែង»។
លោកបានបន្ថែមថា៖ «ការជំរុញឲ្យក្លាយជាអាជ្ញាកណ្តាលកម្រិតអន្តរជាតិនេះ គឺសហព័ន្ធត្រៀមខ្លួនសម្រាប់ព្រឹត្តិការណ៍ស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះ អ៊ីចឹងយើងត្រូវប្រើប្រាស់ក្រុមអាជ្ញាកណ្តាលកម្រិតអន្តរជាតិរបស់កម្ពុជាឲ្យអស់សមត្ថភាព និងកាត់បន្ថយអាជ្ញាកណ្តាលអន្តរជាតិ ហើយតាមការសិក្សាវគ្គនេះ សិក្ខាកាមទាំង ២៥ នាក់នេះ ទទួលបាននិទ្ទេសល្អរហូតដល់ ៨០ ភាគរយ គឺជាអ្វីដែលយើងចង់បាន»។
យ៉ាងណាក៏ដោយ លោក គៀត ច័ន្ទថារិទ្ធ បានបានថ្លែងថា៖ «សិក្ខាកាម ដែលជាអាជ្ញាកណ្តាលកម្រិតជាតិទំាងអស់ ត្រូវខិតខំប្រឹងថែមទៀត ដើម្បីក្លាយជាអាជ្ញាកណ្តាលកម្រិតអន្តរជាតិ ក្នុងការជួយអភិឌ្ឍនវិស័យកីឡាវាយកូនឃ្លីលើតុកម្ពុជា ឲ្យមានការរីកចម្រើនកាន់តែល្អ ដើម្បីឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ និងដណ្តើមបានមេដាយលើឆាកអន្តរជាតិ ខណៈពេលនេះ សហព័ន្ធរបស់យើងបាននិងកំពុងតែសម្រិតសម្រាំង និងរៀបចំខ្លួននិងគោរពគោលការណ៍ទៅតាមសហព័ន្ធកីឡាវាយកូនឃ្លីលើតុអន្តរជាតិដែលមានស្តង់ដាបច្ចេកទេសល្អ និងមានភាពរីករីកចម្រើនជាវិជ្ជមាន»៕