.jpg)
លោក តែម ម៉ឺន ពេលថ្លែងសុំឲ្យតំណាងស្ថានីយទូរទស្សន៍ ផ្អាកការប្រកួតប្រដាល់ ក្នុងអង្គប្រជុំ។ រូប ឈន ណន
ភ្នំពេញ៖ អ្នកគ្រប់គ្រងសង្វៀនប្រដាល់ប្រចាំស្ថានីយទូរទស្សន៍ចំនួន ៤ រួមមានបាយ័ន CNC អាស៊ីអាគ្នេយ៍ និង PNN បានសុំឲ្យមានការប្រកួតជាធម្មតាក្នុងសប្តាហ៍នេះ តែជាការប្រកួតបិទទ្វារ គ្មានអ្នកទស្សនា ចំណែកសង្វៀនថោន និងប៉ុស្តិ៍លេខ ៥ បានសម្រេចពន្យារពេលចាប់ពីសប្តាហ៍នេះទៅ ទៅតាមសំណើរបស់សហព័ន្ធកីឡាប្រដាល់កម្ពុជា។
នៅក្នុងកិច្ចប្រជុំនៅពហុកីឡដ្ឋានជាតិកាលពីព្រឹកម្សិលមិញ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានស្នើសុំឲ្យពន្យារពេលការប្រកួតជាបណ្តោះអាសន្ននៅគ្រប់សង្វៀនទាំងអស់ ដើម្បីឲ្យស្របទៅតាមសេចក្តីប្រកាសរបស់ក្រសួងសុខាភិបាលក៏ដូចជារាជរដ្ឋាភិបាលកម្ពុជាក្នុងការបង្ការ និងជួយទប់ស្កាត់ការរីករាលដាលជំងឺកូវីដ ១៩។
ជាមួយគ្នានោះ តំណាងទូរទស្សន៍ទាំង ៦ ស្ថាប័ន សុទ្ធតែឡើងថ្លែងគាំទ្រចំណាត់ការរបស់សហព័ន្ធ ព្រោះការជួបជុំត្រូវបានហាម ហើយការប្រកួតប្រដាល់នេះ មានមហាជនចូលទស្សនាច្រើនបំផុត ដែលអាចនឹងមានហានិភ័យខ្ពស់ក្នុងការឆ្លងជំងឺកូវីដ ស្របពេលដែលសង្វៀនប្រដាល់នៅប្រទេស ថៃ ជិត ១០ កម្មវីធី ក្នុង ១ សប្តាហ៍ ត្រូវបានគេជូនដំណឹងថាផ្អាកការប្រកួតអស់ហើយ។
យ៉ាងណាក៏ដោយ លោក នាង ស៊ីវុត្ថា នាយកគ្រប់គ្រងសង្វៀនបាយ័ន និងលោក ម៉ា ស៊ីថេត អ្នកគ្រប់គ្រងប្រដាល់នៅសង្វៀន CNC ដែលមានកម្មវិធីប្រកួតច្រើនជាងគេក្នុងមួយសប្តាហ៍ៗនោះ បានស្នើសុំបើកការប្រកួតបិទទ្វារ មិនឲ្យមានអ្នកទស្សនានោះឡើយ គឺអនុញ្ញាតឲ្យតែកីឡាករអ្នកឲ្យទឹក និងគណៈកម្មករប្រកួតដែលមិនឲ្យច្រើនជាង ៥០ នាក់។
លោក នាង ស៊ីវុត្ថា និងលោក ម៉ា ស៊ីថេត បានអះអាងស្រដៀងគ្នាថា៖ កម្មវិធីបានរៀបរយរួចជាស្រេច គឺទាំងកីឡាករខ្មែរ និងកីឡាករមកពីបរទេស បានមកដល់រួចជាស្រេច ហើយអ្វីៗគឺលំបាកដោះស្រាយទៅលើការខាតបង់ថវិកា ដែលពាក់ព័ន្ធនឹងអ្នកឧបត្ថម្ភ កីឡាករបរទេសកីឡាករខ្មែរ ព្រមទាំងគណៈកម្មការរៀបចំ។ តំណាងទូរទស្សន៍ទាំង ២ បានស្នើសុំប្រកួតបិទទ្វារនេះ ដោយមានការផ្សាយផ្ទាល់ជូនមហាជនទស្សនា និងបានប្តេជ្ញាខិតខំសហការជាមួយគ្រូពេទ្យប្រចាំសង្វៀន ក្នុងការពិនិត្យវាស់កម្ដៅ និងអនាម័យឲ្យកាន់តែប្រសើរជាងមុន។
ជាមួយគ្នានេះ លោក ស្រ៊ឺ ស្រេង អ្នកគ្រប់គ្រងកីឡាប្រចាំនៅ PNN និងលោក ញាណ សុធី តំណាងឲ្យសង្វៀនអាស៊ីអាគ្នេយ៍ក៏បានសុំប្រកួតបិទទ្វារ ១ សប្តាហ៍នេះទៀតដែរ ប៉ុន្តែលោក អូ ឡាឡា មកពីសង្វៀនប៉ុស្តិ៍លេខ ៥ និង លោក ស្រ៊ុន កុសល មកពីសង្វៀនថោនបានសម្រេចពន្យារការប្រកួតចាប់ពីសប្តាហ៍នេះតទៅ ដោយរង់ចាំបទបញ្ជាថ្មី។
លោក តែម ម៉ឺន ក្នុងនាមជាប្រធានអង្គប្រជុំបានសម្រេចជាចុងក្រោយថា នឹងទទួលតាមសំណើ និងហេតុផលមួយចំនួនដែលភាគីតំណាងទូរទស្សន៍ បានលើកឡើង ប៉ុន្តែលោកបញ្ជាក់ថា៖ «ការខាតបង់យ៉ាងណា ក៏មិនស្មើទៅនឹងអាយុជីវិត និងសុខភាពរបស់ប្រជាពលរដ្ឋយើងនោះដែរ»។
ចំណែកលោក ម៉ិល កាដូ អគ្គលេខាធិការសហព័ន្ធកីឡាប្រដាល់គុនខ្មែរ និងជាអគ្គនាយករងកីឡា នៃក្រសួងអប់រំ យុវជន និងកីឡា បាននិយាយថា៖ «អង្គប្រជុំ នឹងធ្វើកំណត់ហេតុពិសេស ជូនទៅក្រសួង ដើម្បីពិនិត្យសម្រេចលើសំណើរបស់ដៃគូអភិវឌ្ឍខាងទូរទស្សន៍ ដែលស្នើសុំប្រកួតបិទទ្វារ ដោយកាត់បន្ថយចំនួនមនុស្សតិចជាង ៥០ នាក់ ស្របតាមការប្រកាសរបស់ក្រសួងសុខាភិបាល ថាបានឬក៏យ៉ាងណា គឺយើងនៅរង់ចាំអនុវត្តតាម»៕
