ក្រុងមីឡាន៖ ក្រុមជើងឯកក្របខ័ណ្ឌ Serie A គឺសេះបង្កង់ Juventus (Juve) បានធ្វើឲ្យវិស័យបាល់ទាត់នៅប្រទេសអ៊ីតាលី ស្រឡាំងកាំង ដោយការតែងតាំង Andrea Pirlo អតីតខ្សែបម្រើម្ចាស់ជយលាភី World Cup ជាគ្រូបង្វឹកថ្មីរបស់ក្រុមរយៈពេល ២ ឆ្នាំ បើទោះបីជាអតីតកីឡាកររបស់ខ្លួនរូបនេះ មិនធ្លាប់មានបទពិសោធក្នុងតួនាទីនេះ ពីមុនមកក៏ដោយ។
លោក Pirlo វ័យ ៤១ ឆ្នាំ ត្រូវបានដំឡើងមកកាន់មុខងារធំនេះ ត្រឹមតែ ១ សប្ដាហ៍ ក្រោយទទួលឋានៈជាគ្រូបង្វឹកនៃក្រុម Juve អាយុក្រោម ២៣ ឆ្នាំ ដែលលេងនៅលីកទី ៣ ហើយមិនទាន់បានដឹកនាំក្រុមធ្វើការប្រកួត សូម្បី ១ លើក។
ការសម្រេចនេះ កើតឡើងតែប៉ុន្មានម៉ោងប៉ុណ្ណោះ បន្ទាប់ពីក្លិបដែលមានទីតាំងនៅក្រុងទូរីនមួយនេះ បានបណ្ដេញគ្រូបង្វឹកចាស់លោក Maurizio Sarri ក្រោយក្រុមធ្លាក់ពីក្របខ័ណ្ឌ Champions League ត្រឹមវគ្គ ១៦ ក្រុម ក្រោមថ្វីជើងរបស់ក្រុមរបស់បារាំង Olympique Lyonnais ដោយសារតែគ្រាប់បាល់ក្រៅទឹកដី។
អតីតអ្នកចាត់ការរបស់ក្រុមនៅអង់គ្លេស Chelsea លោក Sarri កាន់តួនាទីបាន ១ រដូវកាល ដោយដឹកនាំក្រុម Juve ឲ្យឈ្នះពាន Serie A ដែលជាលើកទី៩ បន្តបន្ទាប់គ្នា តែនៅមិនទាន់ល្អគ្រប់គ្រាន់តាមការរំពឹងទុករបស់ក្រុម ដែលមានមហិច្ឆតាចង់លើកពាន Champions League នោះឡើយ។
ក្រោយមានការតែងតាំងនេះ ក្រុម Juve ឲ្យដឹងក្នុងសេចក្ដីថ្លែងការណ៍ថា៖ «ចាប់ពីថ្ងៃនេះតទៅ លោក Pirlo នឹងក្លាយជាគ្រូបង្វឹកសម្រាប់ក្រុម Juventus ដូចដែលក្លិប បានផ្ដល់ទំនុកចិត្តលើគាត់ជាមួយនឹងការប្រគល់តំណែងជាប្រធានដឹកនាំបច្ចេកទេសរបស់ក្រុមធំ បន្ទាប់ពីបានជ្រើសរើសគាត់ឲ្យធ្វើជាគ្រូបង្វឹករបស់ក្រុមអាយុក្រោម ២៣ ឆ្នាំ រួចហើយ»។
ក្រុមសេះបង្កង់ ទំនងជារំពឹងថា លោក Pirlo អាចកូពីភាពជោគជ័យរបស់លោក Zinedine Zidane អតីតកីឡាករលំដាប់ពិភពលោកម្នាក់ផ្សេងទៀត ដែលកំពុងទទួលបានសមិទ្ធផលល្អជាច្រើនជាមួយក្រុម Real Madrid បើទោះជាមិនធ្លាប់ឆ្លងកាត់បទពិសោធន៍ជាគ្រូបង្វឹកពីមុនមកក៏ដោយ។
លោក Zidane ដែលជាអតីតកីឡាករក្រុម Juve ១ រូបដែរនោះ ដឹកនាំក្រុម Real ឲ្យឈ្នះពានក្របខ័ណ្ឌ La Liga ២ ដង និង Champions League ៣ ដង ក្នុងចំណោមការមកធ្វើជាគ្រូបង្វឹកចំនួន ២ លើក ជាមួយក្រុមអេស្ប៉ាញ។
នាយកបាល់ទាត់របស់ក្លិប លោក Fabio Paratici បានថ្លែងថា៖ «ការតែងតាំងលោក Pirlo ជារឿងធម្មតា ពោលគឺតាមវិធីសាស្ត្ររបស់ក្រុម Juve ព្រោះគាត់ គឺជាមនុស្សម្នាក់ ដែលធ្លាប់លេងឲ្យក្លិប តែងតែភ្ជាប់ទំនាក់ទំនងជាមួយគ្រប់គ្នានៅទីនេះ ហើយមានអារម្មណ៍សាមញ្ញធម្មតា។ យើងក៏ជឿផងដែរថា គាត់នឹងក្លាយជាគ្រូបង្វឹកល្អមា្នក់ ដូចកាលគាត់នៅជាកីឡាករអ៊ីចឹង»។
កាលនៅជាកីឡាករ Pirlo ធ្លាប់ឈ្នះពាន Champions League ២ ដងជាមួយក្រុម AC Milan (Milan) ហើយធ្លាប់លើកពាន Serie A ២ ដងជាមួយក្រុម Milan និង ៤ លើកជាមួយក្រុម Juve។ រួមចំណែកជួយឲ្យ Milan កា្លយជាជើងឯកពានរង្វាន់កម្មវិធី Club World Cup។ ធ្លាប់កាន់ពាន Coppa Italia ជាមួយនឹងក្រុម Milan និង Juve៕ AFP/VN