ភ្នំពេញ៖ កីឡាករ សោម វិឆ័យ បានបោះពាក្យសម្តីបែប «មើលស្រាល» ទៅលើសមត្ថភាពរបស់ រិន សារ័ត្ន មុនពេលអ្នកទាំង ២ ត្រូវប្រកួតផ្តាច់ព្រ័ត្រ ស្វែងរកម្ចាស់ពានរង្វាន់ TV5 Boxing Knock Out Series ក្នុងទម្ងន់ ៦៣,៥ អមជាមួយប្រាក់រង្វាន់ ៤ ០០០ ដុល្លារ នៅលើសង្វៀនប៉ុស្តិ៍លេខ ៥ នាល្ងាចថ្ងៃសៅរ៍នេះ ចំណែក ពុយ វណ្ណៈ ក៏ត្រូវប្រកួតដណ្តើមយកលេខ ៣ ជាមួយ វ៉ែន ហុងជីវ៉ុង ក្នុងពេលនោះដែរ។
នៅក្នុងការប្រកួតដ៏សំខាន់នេះ លោកគ្រូបង្វឹករបស់ សោម វិឆ័យ មិនសូវជារំពឹងខ្ពស់ប៉ុន្មានទេ ប៉ុន្តែ វិឆ័យ ផ្ទាល់បានបង្ហោះព័ត៌មានថា រឿង សារ័ត្ន មិនមែនសមជាដៃគូរបស់គេនោះទេ ហើយការបោះពាក្យសម្តីនេះ ធ្វើឲ្យក្រុមអ្នកតាមដានប្រដាល់ នាំគ្នាវិភាគថា សោម វិឆ័យវាយតម្លៃដៃគូខ្សោយពេក ឬនិយាយឲ្យចំថា មើលងាយដៃគូ បើទោះបីជា រិន សារ័ត្ន និងរូបគេ បានឈ្នះទាំង ៤ ប្រកួតជាប់ៗគ្នា មុននឹងឡើងមកជួបគ្នា នៅវគ្គផ្តាច់ព្រ័ត្រនេះ ក៏ដោយ។
លោក ឡុង វិបុល ជាគ្រូបង្វឹក សោម វិឆ័យ បាននិយាយថា៖ «ខ្ញុំមានទំនុកចិត្តថា សោម វិឆ័យ អាចយកឈ្នះ រិន សារ័ត្ន ត្រឹម ៦០ ភាគរយប៉ុណ្ណោះ ព្រោះការប្រកួតជាក់ស្តែង មិនត្រូវមើលស្រាលដៃគូទេ ហើយ សោម វិឆ័យ ក៏មិនធ្លាប់ឈ្នះជើងឯក ឬខ្សែក្រវាត់ពីមុនមកនោះដែរ»។
គ្រូបង្វឹករូបនេះបានបន្ថែមថា៖ «ខ្ញុំមិនហ៊ានមើលស្រាលដៃគូទេ ប៉ុន្តែ សោម វិឆ័យ ព្យាយាមហ្វឹកហាត់បានល្អ ដោយសង្ឃឹមឈ្នះច្រើន។ ទោះយ៉ាងណា ចាញ់ ឬឈ្នះ កុំនិយាយមុនតែអ្វីដែលខ្ញុំចង់បាន គឺសូមឲ្យចៅក្រមកាត់ក្តីឲ្យមានយុត្តិធម៌ គឺខ្ញុំពេញចិត្តណាស់ទៅហើយ»។
ផ្ទុយពីនេះ សោម វិឆ័យ មានមោទនភាពខ្លាំង ដោយបានបញ្ចេញនូវពត៌មានតាមបណ្តាញហ្វេសប៊ុកថា «រិន សារ័ត្ន មិនសមជាដៃគូរបស់ខ្លួនទេ» ហើយដំណឹងនេះ បានឮដល់ រិន សារ័ត្ន រួចហើយ។ សោម វិឆ័យ រំពឹងឈ្នះច្រើនជាងគ្រូបង្វឹក ឡុង វិបុល ដោយរូបគេបានអះអាងថា៖ «ខ្ញុំមានទំនុកចិត្តឈ្នះ ៩០ ភាគរយ ហើយខ្ញុំសុំឲ្យមានការកាត់ក្តីឲ្យសុក្រឹត យុត្តិធម៌ផង»។
ចំណែក រិន សារ័ត្ន ត្រូវបានអ្នកគ្រប់គ្រងមើលថែផ្ទាល់ម្នាក់បានប្រាប់ដោយសុំមិនបញ្ចេញឈ្មោះថា៖ «ខ្ញុំបានបញ្ជូន សារ័ត្ន ទៅហ្វឹកហាត់មួយរយៈចុងក្រោយជាមួយ លោកគ្រូ ហ៊ុន ចាន់រាជ ដើម្បីទទួលបានបទពិសោធបន្ថែម និងកម្លាំងល្អ ហើយការហ្វឹកហាត់របស់គេគ្មានថ្ងៃសៅរ៍ និងថ្ងៃអាទិត្យនោះទេ»។
អ្នកគ្រូរូបនេះបានបន្ថែមថា៖ «ខ្ញុំមិនរំពឹងច្រើនទេ ព្រោះ សោម វិឆ័យ ជើងចាស់ស៊េរីមុនហើយគេបានអះអាងពីសមត្ថភាពរបស់គេខ្ពស់ គឺខ្ញុំសុំសិទ្ធិមិននិយាយទេ ដោយសារដំណឹងនេះ សារ័ត្ន បានដឹងហើយ។ យ៉ាងណាក៏ដោយ ការប្រកួតនេះ មិនអាចទស្សន៍ទាយបានមុន ឬមាក់ងាយបានទេ ព្រោះត្រូវតែប្រកួតគ្នាអស់ពីកម្លាំងកាយ ចិត្ត ហើយលទ្ធផលជាក់ស្តែងមិនមែនចាញ់ ឬឈ្នះ ដោយស្រួលនោះទេ»។
យោងតាមប្រវត្តិប្រកួត សោម វិឆ័យ ធ្លាប់ប្រកួតបាន ៨៦ ដង ឈ្នះ ៦៥ ចាញ់ ២១ ដង ក្នុងនោះផ្តួលដៃគូឲ្យសន្លប់បាន ១៣ ដង ហើយបទពិសោធនេះ គឺច្រើនជាង រិន សារ័ត្ន ចំនួន ២ ដងឯណោះ។ ទោះយ៉ាងណា រិន សារ័ត្ន បាននិយាយថា៖ «ខ្ញុំសុំមិននិយាយ តែចាំមើលការប្រកួតទៅ គឺចាញ់ឬឈ្នះ មិនមែនស្រួលដូចគ្នា»។
ចំណែកគូដណ្តើមយកចំណាត់ថ្នាក់លេខ ៣ រវាង ពុយ វណ្ណៈ និង វ៉ែន ហ៊ុនជីវ៉ុង មិនសូវជាមានការចាប់អារម្មណ៍ប៉ុន្មានទេ ហើយចំពោះសមត្ថភាពវិញ ពុយ វណ្ណៈ អាចមានប្រៀបជាងបន្តិចបន្តួចលើ វ៉ែន ហ៊ុនជីវ៉ុង ខណៈប្រាក់រង្វាន់ក្នុងព្រឹត្តិការណ៍នេះ លេខ ១ នឹងទទួលបាន ៤ ០០០ ដុល្លារលេខ ២ បាន ២ ០០០ ដុល្លារ លេខ ៣ បាន ៧៥០ ដុល្លារ និងលេខ ៤ បាន ៥០០ ដុល្លារ៕