.jpg)
សូត្រ ប៊ុនធី បានទប់ការធាក់របស់ Phat Ngam មុនពេលសន្លប់ដោយការវាយថែមពីក្រោយ។ រូប យឺន ពន្លក
ភ្នំពេញៈ អ្នកលេងកណ្តាប់ដៃចិត្តធំ ចាន់ សំអាត ត្រូវបានកាត់ក្តីឲ្យចាញ់ថៃ Den Sayam ទាំងមិនអស់ចិត្តក្នុងការប្រកួតវគ្គជម្រុះសន្សំពិន្ទុខ្សែក្រវាត់ខារ៉ាបាវនៅលើសង្វៀន SEATV ហើយ សូត្រ ប៊ុនធី បានសន្លប់ធំត្រឹមទឹកទី ៤ ដោយថៃ Phat Ngam វាយថែមពីក្រោយ ប៉ុន្តែគណៈកម្មការបានសម្រេចឲ្យ ប៊ុនធី ចាញ់ ដោយមើលឃើញត្រូវចំស្មាខាងក្រោយ នាំឲ្យកើតជារឿងចម្រូងចម្រាសមួយធ្វើឲ្យអ្នកទស្សនាមួយចំនួន និងសាមីខ្លួនសុទ្ធតែមិនអស់ចិត្តពីការសម្រេចក្តីនេះ។
នៅក្នុងការប្រកួតកាលពីថ្ងៃសៅរ៍នោះ ចាន់ សំអាត និង Den Sayam បានប្រកួតគ្នាយ៉ាងស្វិតស្វាញបំផុត និងបានវាយចំគោលដៅប្រហែលគ្នានៅ ៣ ទឹកដំបូង ប៉ុន្តែនៅទឹកទី ៤ និងទី ៥ សំអាត មានប្រៀបនាំមុខដោយចេញបានច្រើន ខណៈ Den Sayam វ៉ៃ រូបគេបែកឈាមហូរលើមុខត្រូវបានអាជ្ញាកណ្តាល ឡុង ស៊ីលីន ចាប់ជូតឈាមចំនួន ៣ ដង។
ទោះជាយ៉ាងណានៅទឹកទី ៥ ចាន់ សំអាត់ វ៉ៃចេញច្រើនទទួលបានផលល្អ និងបានម៉ាត់ឲ្យថៃរបូតធ្មេញចេញពីមាត់ ប៉ុន្តែលទ្ធផលពីចៅក្រមទាំង ៥ បានផ្តល់ពិន្ទុឲ្យ Den Sayam ឈ្នះក្នុងពិន្ទុ ៣ ទល់ ២ ធ្វើឲ្យ សំអាត បានចុះពីសង្វៀនទាំងមិនអស់ចិត្ត។
ចាន់ សំអាត និយាយថា៖ «មិនគួរឲ្យខ្ញុំចាញ់សោះ! ខ្ញុំមិនអស់ចិត្តសោះ ព្រោះសូម្បីតែចុងទឹក ៥ ខ្ញុំដាល់ឲ្យរបូតធ្មេញ ហេតុអីឲ្យវាឈ្នះ?»។ ចំពោះបញ្ហានេះ គណៈកម្មការលោក ឯម ហៀង អនុប្រធានវិនិច្ឆ័យបាននិយាយថា៖ «គូខ្សែក្រវាត់មិនអាចឲ្យស្មើ ឬវិនិច្ឆ័យទៅលើការដាក់ពិន្ទុរបស់ចៅក្រមទេ គឺចៅក្រមផ្តល់មកយ៉ាងណាឲ្យទៅតាមនោះ»។
ចំណែក សូត្រ ប៊ុនធី និងម្តាយបង្កើតរបស់គេបានហៅការសន្លប់របស់ខ្លួននៅទឹកទី ៤ នោះជាការប្រកួតល្មើសរបស់ថៃ Phat Ngam វាយថែមពីក្រោយបណ្តាលឲ្យសន្លប់ ហើយការបានសម្រេចឲ្យចាញ់ដោយមិនពិន័យកីឡាករថៃនាំឲ្យមានការតវ៉ាតាមមាត់។ ប៉ុន្តែតាមការប្រកួតជាក់ស្តែង ប៊ុនធី ចាញ់ប្រៀបពិន្ទុថៃដាច់តាំងពីទឹកទី ២ ហើយកម្លាំងចុះខ្សោយធ្វើឲ្យគេប្រកួតបែរខ្នងញឹកញាប់។
លោក រាជ សុផែន ដែលបានប្រកាសឲ្យ សូត្រ ប៊ុនធី ចាញ់ បានពន្យល់ថា តាមរូបភាពយឺតៗលោកពិនិត្យឃើញកីឡាករថៃវ៉ៃ ពីក្រោយមែន តែមិនត្រូវចំពីក្រោយក្បាលទេ។ លោកបញ្ជាក់ថា៖ «សូត្រ ប៊ុនធី បាត់បង់កម្លាំង និងចាញ់ប្រៀបពិន្ទុថៃដាច់ ហើយភាគច្រើនប្រកួតបែរក្រោយទំនងជាមានចេតនាចង់ស៊ីឡាក អ៊ីចឹងគណៈកម្មការមិនមែនធ្វើអ្វីតាមចិត្តទេ គឺធ្វើតាមច្បាប់ប្រកួត»។
ប៉ុន្តែលោក សួន ប៊ុនសូត្រ ជាគ្រូបង្វឹក និងជាឪពុក សូត្រ ប៊ុនធី បាននិយាយថា៖ «ខ្ញុំមើលឃើញពីវាចាញ់ប្រៀបគេមែន ប៉ុន្តែការវាយបន្ថែមចំកញ្ចឹងក នាំឲ្យហើមរបួសគឺខុសច្បាប់ ហេតុអីមិនពិន័យកីឡាករថៃឲ្យចាញ់ទៅ»៕
