.jpg)
ពេជ្រ សុផាន់ ក្នុងអំឡុងពេលបង្វឹកកូនសិស្សពីរបៀបនៃការដាល់ នាពេលកន្លងមក។ ភ្នំពេញ ប៉ុសិ៍្ត
ភ្នំពេញ៖ អតីតអ្នកប្រដាល់លំដាប់ឆ្នើមជួរមុខរបស់កម្ពុជា ពេជ្រ សុផាន់ ដែលធ្លាប់ជាម្ចាស់ខ្សែក្រវាត់ទម្ងន់ ៥៧ គីឡូក្រាម នៅសង្វៀនប៉ុស្តិ៍លេខ ៥ ក្នុងឆ្នាំ ២០០៤ នោះ គឺបច្ចុប្បន្នកំពុងតែមានការពេញចិត្តយ៉ាងខ្លាំង ក្នុងឋានៈជាគ្រូបង្វឹកម្នាក់ នៃក្លិបប្រដាល់ចលនាយុវជន ១៥៧ ក្នុងរាជធានីភ្នំពេញ ដែលទទួលបានប្រាក់កម្រៃពីតម្លៃពលកម្មនេះ អាចរស់បានក្នុងជីវភាពមួយសាមញ្ញ និងសមរម្យ។
ជាមួយនឹងបទពិសោធតស៊ូលំបាកខ្លាំង កាលនៅជាកីឡាករ និងធ្លាប់ធ្វើជាគ្រូបង្វឹកនៅឯប្រទេស អូស្ត្រាលី ចំនួន ៤ ឆ្នាំ កន្លងមក ពេជ្រ សុផាន់ អះអាងថា បច្ចុប្បន្ន រូបគេទទួលបានលទ្ធផលជាទីគាប់ចិត្ត គឺជាគ្រូបង្វឹកផង និងជាគណៈកម្មការប្រកួតផង ដែលមានក្របខ័ណ្ឌមន្ត្រីរាជការជាទាហានក្នុងកងយោធពលខេមរភូមិន្ទផង ហើយអ្វីៗទាំងអស់នេះ បានធ្វើឲ្យការប្រឡូកចូលនៅក្នុងវិស័យកីឡាប្រដាល់អស់ពេលជាង ២០ ឆ្នាំនេះ គឺ សុផាន់ សប្បាយចិត្តនឹងទទួលយកជំនាញនេះ។
ជាកូនកសិករមានលំនៅ ឃុំពោធិ៍រំចាក ស្រុកព្រៃកប្បាស ខេត្តតាកែវ អតីតកីឡាករឆ្នើម ពេជ្រ សុផាន់ មានបងប្អូនចំនួន ៥ នាក់ ក្នុងនោះមានតែ ២ នាក់ប៉ុណ្ណោះ គឺ ពេជ្រ សីហា និង ពេជ្រ សុផាន់ នេះឯងដែលបានភ្ជាប់ខ្លួនក្នុងការប្រដាល់ក្បាច់បុរាណខ្មែរ ហើយការវិវឌ្ឍខ្លួនពីកីឡាករជើងខ្លាំង មកធ្វើជាគ្រូបង្វឹកដោយពេញចិត្តពេញថ្លើមនេះ ពេជ្រ សុផាន់ បានអះអាងប្រាប់ភ្នំពេញប៉ុស្តិ៍ថា៖ «ភាពល្បីល្បាញទៅបាន គឺចេញពីខ្លួនយើងមានសមត្ថភាពខ្លាំងជាមុនសិន បន្ទាប់មកទើបមានមជ្ឈដ្ឋាន ឬស្ថាប័នផ្សេងៗជួយយើង។
កាលពីអតីតកាល ពេជ្រ សុផាន់ ជាអ្នកប្រដាល់ចិត្តធំ មានកណ្តាប់ដៃវ៉ៃចេញលឿន មិនដែលចេះបន្ធូរដៃឲ្យដៃគូនោះទេ ហើយរូបគេបានសាងភាពល្បីល្បាញ ហើយក៏បានដឹកនាំប្អូនបង្កើតគឺ ពេជ្រ សីហា ឲ្យដើរតាមគន្លងនេះផងដែរ។ ក្នុងនាមជាកីឡាកររបស់សមាគមកីឡាប្រដាល់ក្រសួងការពារជាតិ សុផាន់ ធ្លាប់ឈ្នះការប្រកួតជម្រើសជាតិប្រចាំឆ្នាំ ជាបន្តបន្ទាប់ក្នុងទម្ងន់ ៥៧ គីឡូក្រាម ៦៣,៥ គីឡូក្រាម និង ៦៧ គីឡូក្រាម ពិសេសគេធ្លាប់ឈ្នះខ្សែក្រវាត់ទម្ងន់ ៥៧ គីឡូក្រាម នៅសង្វៀនប៉ុស្តិ៍លេខ ៥ ក្នុងឆ្នាំ ២០០៤។
អតីតកីឡាករជើងខ្លាំង ពេជ្រ សុផាន់ បានថតជាមួយសិស្សរបស់ខ្លួន ខណៈ ពេលនេះរូបគេកំពុងមានការពេញចិត្ត នឹងមុខរបរគ្រូបង្វឹក។ សហការី
ពេជ្រ សុផាន់ បាននិយាយថា៖ «ខ្ញុំចូលហាត់ និងប្រកួតដំបូងក្នុងឆ្នាំ ១៩៩៩ នៅស្តាតចាស់ ហើយខ្ញុំល្បីល្បាញខ្លាំង ក្នុងទម្ងន់ ៥៧ គីឡូក្រាម និងទម្ងន់ ៦៣,៥ គីឡូក្រាម។ ក្រៅពីឈ្នះការប្រកួតជម្រើសជាតិ ជាច្រើនឆ្នាំ ខ្ញុំឈ្នះបានខ្សែក្រវាត់ ១ ក្រោយយកឈ្នះកីឡាករ ទ្រី គន្ធរ នៅវគ្គផ្តាច់ព្រ័ត្រ និងយកឈ្នះលើកីឡាករជើងខ្លាំងមួយចំនួនដូចជា ម៉ី សុភាព, សេង ប៊ុនថេន, វ៉ោយ សុធន់, ឡោ សំណាង និង ផាវ ភឿក ជាដើម។ បន្ទាប់មក ក្នុងទម្ងន់ ៦៧ គីឡូក្រាម ខ្ញុំមានប្រៀបឈ្នះគេជានិច្ច ដោយវ៉ៃដាច់ទាំងអស់ គឺមានតែ ផល សុផាត ប៉ុណ្ណោះដែលមានចាញ់ ឈ្នះជាមួយខ្ញុំ រហូតដល់ឆ្នាំ ២០០៩ ទើបខ្ញុំមានបញ្ហាកម្លាំងធ្លាក់ចុះខ្លាំង ក៏សម្រាកពីកីឡាករ មកជាចូលបម្រើការជាគណៈកម្មការប្រកួតវិញម្តង»។
សុផាន់ បានបន្តថា៖ «ក្នុងរយៈពេលជាបន្តបន្ទាប់ ខ្ញុំជាគ្រូបង្វឹកប្រដាល់គុនខ្មែរនៅប្រទេស អូស្ត្រាលី ចំនួន ៦ លើក ក្នុងរយៈពេល ៤ ឆ្នាំផងដែរ ហើយសព្វថ្ងៃនេះ ខ្ញុំពេញចិត្តចំពោះមុខរបរជាគ្រូបង្វឹក គឺបង្វឹកឲ្យក្លិបប្រដាល់ចលនាយុវជន ១៥៧ ដែលមានទីតាំង នៅទួលពង្រ សង្កាត់ចោមចៅ ២ រាជធានីភ្នំពេញ ដោយទទួលបានកម្រៃឧបត្ថម្ភពីម្ចាស់ក្លិបសមរម្យ អាចធ្វើឲ្យជីវភាពល្អសាមញ្ញ គឺរស់បានប្រសើរ»។
ទាក់ទងទៅនឹងអតីតកីឡាករ ក៏ដូចជាគ្រូប្រដាល់មួយចំនួន តែងតែលើកឡើងពីជីវភាពក្រលំបាក លោក ពេជ្រ សុផាន់ និយាយថា៖ «ធម្មតា ការលំបាកនរណាក៏ជួបដែរ វាមិនដែលចេះគ្រប់គ្រាន់តាមការចង់បាននោះទេ ប៉ុន្តែយើងគួរតែចេះកែច្នៃ និងទទួលយកអ្វីៗទៅតាមសមត្ថភាពរបស់យើង គឺគ្រប់គ្រាន់។ ដូចជាប្អូនខ្ញុំ ពេជ្រ សីហា ធ្វើបាបខ្ញុំច្រើនលើក ដោយវាគោរពវិន័យមិនល្អ ប្រព្រឹត្តផ្តេសផ្តាស ប៉ុន្តែខ្ញុំមិនដែលបោះបង់គេចោលទេ ហើយសព្វថ្ងៃ សីហា មានការងារមួយនៅខេត្តព្រះសីហនុ ដើម្បីកែខ្លួនហើយបន្តិចទៀតខ្ញុំ នឹងនាំគេមកជាគ្រូបង្វឹកជំនួយក្នុងប្រដាល់ផងដែរ»។
តាមរយៈបទពិសោធក្នុងកីឡា ប្រដាល់នេះ ពេជ្រ សុផាន់ បច្ចុប្បន្នទទួលបាន គឺជាសមាជិកគណៈកម្មការប្រដាល់នៅសង្វៀនបាយ័ន ជាគ្រូបង្វឹករបស់ក្លិបចលនាយុវជន ១៥៧ និងជាទាហានបម្រើការនៅក្នុងមជ្ឈមណ្ឌលកីឡាយោធពលខេមរភូមិន្ទស្តាតចាស់ ដោយចូលបម្រើការងាររយៈពេលជាង ៥ ឆ្នាំ មិនទាន់ទទួលបានស័ក្តិ ១ នៅឡើយ។
យ៉ាងណាក៏ដោយ លោក ពេជ្រ សុផាន់ បានអះអាងថា ពេញចិត្តចំពោះមុខរបរគ្រូបង្វឹក ហើយកូនសិស្សរបស់លោក គឺជ្រើសរើសយកកីឡាករក្មេងៗមកបណ្តុះបណ្តាល ដោយផ្តល់ការហូបចុកស្នាក់នៅ ប៉ុន្តែមានការលំបាកខ្លាំង ដោយសារក្មេងសព្វថ្ងៃ ខ្សោយខាងវិន័យ ខ្វះការតស៊ូ ហើយបើគិតក្នុងរយៈពេល ៣ ឆ្នាំមកនេះ មានកីឡាកររត់ចោលការហ្វឹកហាត់ចំនួន ១៦៤ នាក់ ខណៈបច្ចុប្បន្នមានតែ ៦ នាក់ប៉ុណ្ណោះ ហាត់ជាប្រចាំនៅក្នុងក្លិប៕
