.jpg)
លោក ឆយ វីរ៉ា (ស្តាំ) ពេលប្រកួតកីឡាអុកចត្រង្គជើងឯកថ្នាក់ជាតិ កាលពីឆ្នាំ ២០១៨។ រូបថត ឈន ណន
ភ្នំពេញ៖ សហព័ន្ធកីឡាអុកចត្រង្គកម្ពុជា បានត្រៀមសមាសភាពកីឡាករ និងគ្រូបង្វឹកសម្រាប់ចូលរួមប្រមូលផ្តុំជាក្រុមជម្រើសជាតិ ជាមួយមជ្ឈមណ្ឌលជាតិហ្វឹកហ្វឺនកីឡារួចរាល់ហើយ ប៉ុន្តែការងារដ៏ធំ និងចាំបាច់បំផុត ជុំវិញការដាក់កីឡាអុកចូលទៅក្នុងការប្រកួតស៊ីហ្គេម ឆ្នាំ ២០២៣ នៅកម្ពុជានោះ គឺសហព័ន្ធកីឡាអុកចត្រង្គកម្ពុជា នៅមិនទាន់បានធ្វើនៅឡើយទេ។
តាមការប្រកាសកាលពីពេលថ្មីៗនេះបានឲ្យដឹងថា មជ្ឈមណ្ឌលជាតិហ្វឹកហ្វឺនកីឡា នឹងបើកទទួលការប្រមូលផ្តុំក្រុមជម្រើសជាតិ នៅថ្ងៃទី ១៧កកដ្កា ឆ្នាំ ២០២០។ ជាមួយគ្នានេះ សហព័ន្ធកីឡាអុកចត្រង្គកម្ពុជាបានជ្រើសរើសកីឡាករឆ្នើមជើងចាស់ចំនួន ៦ នាក់ និងគ្រូបង្វឹកចំនួន ២ នាក់ សម្រាប់ចូលរួមការប្រកួតប្រមូលផ្តុំនេះ ទៅតាមការណែនាំរបស់ក្រសួងអប់រំ យុវជន និងកីឡា។
ចំពោះសមាសភាពកីឡាករជើងចាស់ទាំង ៦ នាក់ ដែលត្រូវបានជ្រើសរើសជាជម្រើសជាតិ នៅឆ្នាំ ២០២០ នេះ រួមមាន លោក ម៉េង សេរីសម្បត្តិ, លោក ប៉ុន មាលីកា, លោកយ៉ាន សុខលាង, លោក ទេស សារ៉ាវី, លោក ឆយ វីរ៉ា និងលោក ប៊ិន គាសេង។ ចំណែកគ្រូបង្វឹកមាន លោក គ្រួច ចន្ថារិទ្ធ និងលោក ហ៊ូយ ស៊ីណា ហើយអ្នកទាំងនេះ សុទ្ធសឹងមានបទពិសោធលេងល្អ និងមានស្នាដៃកន្លងមក។
យ៉ាងណាក៏ដោយចំពោះបេសកកម្មដ៏ធំ គឺការបញ្ជូនគ្រូបង្វឹក ទៅបង្ហាត់បង្ហាញពីច្បាប់ និងលក្ខន្តិកៈប្រកួតផ្សេងៗ ទៅដល់បណ្តាប្រទេស ដែលបានគាំទ្រឲ្យមានការដាក់កីឡាអុកចត្រង្គ ចូលទៅក្នុងការប្រកួតស៊ីហ្គេមលើកទី ៣២ ឆ្នាំ ២០២៣ នៅប្រទេសកម្ពុជា នោះ នៅមិនទាន់បានធ្វើនៅឡើយទេ។
លោក គ្រួច ចន្ថារិទ្ធ គ្រូបង្វឹកជម្រើសជាតិកីឡាអុកចត្រង្គកម្ពុជា បានប្រាប់ថា៖ «កីឡាប្រពៃណីជាតិខ្មែរយើងមួយនេះ មានសក្ដានុពលខ្លាំងណាស់ និងពេញនិយមសម្រាប់មហាជនធម្មតារហូតថ្នាក់ដឹកនាំធំៗនិយមលេង។ បន្ថែមពីលើនេះ តាមផែនការរបស់គណៈកម្មាធិការជាតិអូឡាំពិកកម្ពុជា (NOCC) ក៏ដូចសហព័ន្ធ គឺត្រៀមផែនការចេញទៅទំនាក់ទំនងបណ្តុះបណ្តាលឲ្យប្រទេសជាដៃគូ ក្នុងតំបន់អាស៊ាន ចេះលេង និងនាំមកប្រកួត ក្នុងព្រឹត្តិការណ៍ស៊ីហ្គេម ឆ្នាំ ២០២៣»។
លោក គ្រួច ចន្ថារិទ្ធ បានប្រាប់បន្ថែមថា៖ «កម្ពុជាត្រៀមបញ្ជូនគ្រូ ឲ្យចេញទៅបង្ហាត់ដល់បណ្ដាប្រទេសជិតខាងពីរបៀបលេង បទបញ្ជានៃការប្រកួត ការកំណត់របៀបចាញ់ ឈ្នះ និងពេលវេលាប្រកួតជាដើម ប៉ុន្តែគម្រោងផែនការដ៏សំខាន់នេះ ត្រូវបានខកខាន ដោយសារបញ្ហាការរីករាលដាលជំងឺកូវីដ ១៩»។
ចំណែកលោក សុខ សំបូរ អនុប្រធានសហព័ន្ធកីឡាអុកចត្រង្គកម្ពុជាបានប្រាប់ថា តាមរយៈសហព័ន្ធ និង NOCC គិតមកដល់ពេលនេះ យើងបានទំនាក់ទំនងប្រទេសក្នុងតំបន់អាស៊ានបាន ៤ ទៅ ៥ ប្រទេសហើយ ដែលបានគាំទ្រកម្ពុជាក្នុងការដាក់ប្រភេទកីឡាអុកចត្រង្គនៅស៊ីហ្គេមឆ្នាំ ២០២៣ ហើយដោយសារតែមានការគាំទ្របែបនេះ កម្ពុជាត្រូវតែរៀបចំឲ្យបានឆាប់ នូវបទបញ្ជា បច្ចេកទេសនៃការប្រកួត និងបញ្ជូនគ្រូទៅបង្ហាត់ដល់ប្រទេសដែលគាំទ្រទាំងនោះ»។
លោក វ៉ាត់ ចំរើន អគ្គលេខាធិការរបស់ CAMSOC និង NOCC បានថ្លែងប្រាប់ភ្នំពេញប៉ុស្តិ៍ថា៖ «តាមច្បាប់កីឡាការប្រកួតក្នុងអាស៊ាន គឺម្ចាស់ផ្ទះ អាចដាក់ប្រភេទកីឡាចូលទៅក្នុងការប្រកួតបាន លុះត្រាមានប្រតិភូកីឡាចូលលេងយ៉ាងតិច ៤ ប្រទេស ហេតុនេះបន្ទាប់ពីជំងឺកូវីដ ១៩ ស្ងាត់ យើងនឹងជំរុញឲ្យបានលឿនជាងនេះ ហើយខ្ញុំមានជំនឿចិត្តថា ប្រភេទកីឡាអុកនេះ កម្ពុជានឹងប្រជែងបានមេដាយជូនជាតិ ដូច្នេះសាមីសហព័ន្ធត្រូវតែធ្វើការងារខាងលើនេះឲ្យបានឆាប់រហ័សជាទីបំផុត ខណៈដែល CAMSOC រង់ចាំគាំទ្រ និងលើកទឹកចិត្ត»៕
